ეს არის ფორმატი, სადაც მოქალაქემ უნდა დაინახოს, ვინ უნდა ყოფილიყო მომავალი ხელისუფალი, რას აპირებს ეს მომავალი ხელისუფალი და რა ხედვა აქვს, – ასე უპასუხა პოლიტიკური გაერთიანება „ლელოს“ გენერალურმა მდივანმა, ირაკლი კუპრაძემ საქართველოს პირველი არხის გადაცემის „დღის თემა“ წამყვანის შეკითხვას, რას შეცვლის ახალი სტრატეგიული ცენტრის ფორმირება და რას შეცვლის ეს მაშინ, როდესაც ოპოზიცია ერთად იკრიბება სალომე ზურაბიშვილთან, აქვთ კონსულტაციები, ერთად იმუშავეს ახალი არჩევნების მიღწევის გზებზე და ა.შ.
„ჩვენ არ ვსაუბრობთ ბიუროკრატიულ ორგანიზმზე, რომელიც ყოველდღიურად შეიკრიბება, კომიტეტებს ჩაატარებს და დუბლირებას გააკეთებს ე.წ. პარლამენტის. ამის საჭიროება ხომ არ არსებობს? მთავარი არის, რომ პასუხისმგებლობა აიღოს პოლიტიკურმა სპექტრმა. ხშირად ისმის, რომ მოქალაქეები, რომლებიც რუსთაველზე დგანან, თავად განკარგავენ და თავად გეგმავენ საპროტესტო აქციებს, რაც სწორია, მაგრამ აქ მნიშვნელოვანია, პოლიტიკურმა პარტიებმა და პოლიტიკურმა სუბიექტებმაც ავიღოთ ეს პასუხისმგებლობა, როგორი მძიმეც არ უნდა იყოს ამ პასუხისმგებლობის აღება“, – განაცხადა კუპრაძემ.
თამთა სანიკიძის შეკითხვაზე, რაში გამოიხატება პასუხისმგებლობის აღება, ირაკლი კუპრაძემ განაცხადა, რომ ეს არის გადაწყვეტილებების მიღება და მათ შორის, რუსთაველზე მდგომ მოქალაქეებთან, ახალგაზრდებთან ამ გადაწყვეტილებების მიტანა, შეთანხმება.
„მოქალაქეს ხომ არ შეუძლია მაგალითად, ვაშინგტონში, ბრიუსელსა და სტრასბურგში გამართოს საერთაშორისო ვიზიტები? სამწუხაროდ, არ შეუძლია. იმიტომ, რომ ამას სხვა ტიპის პოლიტიკური ლეგიტიმაცია სჭირდება, რომელიც მაგალითად, ჩემს კოალიციას და პარტიას გააჩნია და ჩვენ ამას ვაწარმოებთ. ახლახან მოვიარეთ ვაშინგტონი, უმნიშვნელოვანესი პოლიტიკური მაღალი რანგის შეხვედრები გვქონდა. უახლოეს მომავალში მივემგზავრებით ბრიტანეთში, ვიყავით ბრიუსელში, სტრასბურგში, ესტონეთში იმყოფება ახლა ჩვენი პარტიის საგარეო მდივანი და ა.შ“, – განაცხადა კუპრავამ.
შეკითხვაზე, არის თუ არა ასეთი ტიპის ცენტრის შექმნა მოქალაქეების დაკვეთა, იგულისხმება ის ადამიანები, რომლებიც არ თვლიან დღეს საჭიროდ, რომ პოლიტიკოსები ჩანდნენ იმ აქციებზე, პოლიტიკურ სცენაზე საერთოდ და ჰქონდეთ გამოსვლები, ირაკლი კუპრავამ თქვა, რომ ფიქრობს, არის.
„ეს აზრი ორად არის გაყოფილი. ნამდვილად არსებობს მოქალაქეების ნაწილი, რომელიც ამბობს, რომ პოლიტიკოსები იყვნენ ჩრდილში, ჩვენთან ერთად, როგორც რიგითი მოქალაქეები და ამას ისედაც ვაკეთებთ ჩვენ. ისევე გვიჭერენ, გვაჯარიმებენ, გვდევნიან, გვცემენ, გვხვდებიან და დანებს გვიქნევენ. საბა ბუაძეზე თავდასხმა ყველამ ნახა ხომ, ეს კადრები და ა.შ.? ჩვენც ისევე ვიბრძვით და უფრო დიდი რისკის ქვეშ ვართ ხშირ შემთხვევაში, ვიდრე რიგითი მოქალაქეები. ეს არ გვაკლია, მაგრამ თავის მხრივ, მნიშვნელოვანია მეორე ნაწილი, რომელიც გვეუბნება, სად ხართ პოლიტიკოსები, რატომ არ იღებთ პასუხისმგებლობას. ამ დროს, ჩვენ ვამბობთ, რომ აქ ვდგავართ და მზად ვართ, თან ავიღოთ პასუხისმგებლობა“, – განაცხადა კუპრაძემ.
ირაკლი კუპრაძემ განმარტა, რა ბირთვის შექმნაზე საუბრობს მამუკა ხაზარაძე.
„მოდით, ასე განვიხილოთ, რა ბირთვი შეიძლება, იყოს, რასაც მამუკა ხაზარაძე გულისხმობს. მე ვთვლი, რომ ეს არჩევნები გაყალბდა, ზეწოლით, მუქარით, მანიპულაციით და ა.შ. ამ გაყალბებული არჩევნების შედეგად, მიუხედავად გაყალბებისა, ამ ოთხ ბარიერგადალახულ პარტიას მხარი დაუჭირა, ამ შედეგების მიუხედავადაც კი, თითქმის მილიონმა ადამიანმა. რვაასი ათას რაღაც მოქალაქემ, ხომ? რვაასი ათასზე მეტი მოქალაქის ხმა დღეს არ ისმის პოლიტიკაში. პოლიტიკიდან განიდევნა, პარლამენტიდან. პარლამენტი არის პოლიტიკის მთავარი ღერძი და „ქართულმა ოცნებამ“ საკუთარი გადაწყვეტილებით პოლიტიკიდან განდევნა საქართველოს 800 000 მოქალაქე“, – განაცხადა კუპრაძემ.
გადაცემის წამყვანმა სტუმარს შეახსენა, რომ მათ თავად თქვეს უარი პარლამენტის მანდატებზე, რაზეც კუპრავამ თქვა, რომ მათ სამართლიანი პირობა დააყენეს ახალი არჩევნების შესახებ, ოღონდ სამართლიან პირობებში.
