„ველოდები ბევრად უკეთეს შედეგს, მას შემდეგ, რაც რეალური დათვლა დაიწყება. მინდა გითხრათ, რომ ეგზიტპოლებში ცდომილება საკმაოდ დიდია, ამიტომ არის ამხელა სხვაობები. ყველაზე მნიშვნელოვანია, თითოეული უბნიდან ხმების დაცვა, ყველა სახის ზეიმი მხოლოდ ამის შემდეგ." - ამის შესახებ „გახარია – საქართველოსთვის“ ლიდერმა გიორგი გახარიამ განაცხადა.
"მერწმუნეთ, როდესაც დათვლა დასრულდება, ჩვენი შედეგი, მათ შორის ოპოზიციური პარტიების შედეგი, ბევრად უკეთესი იქნება. გამოგვივლია, რომ არჩევნების შემდეგ საქართველოში სხვადასხვა ტელევიზიებში განსხვავებული რეალობა დგება. გვქონია შემთხვევები, გვიზეიმია და დილით სულ სხვა შედეგი მიგვიღია. ამიტომ ახლა დავანებოთ ამას თავი, ვკონცენტრირდეთ ხმების დაცვაზე. „ოცნება“ ეცდება, როგორმე მიგვიყვანოს თავის ვირტუალურ რეალობასთან ახლოს, ჩვენი ამოცანაა დავიცვათ ჩვენი მოქალაქეების ხმები.
ეგზიტპოლი ჩეკებზე უპირატესი როგორ შეიძლება იყოს, ჩეკი დოკუმენტია, ამიტომ ჩემთვის ჩეკს ბევრად დიდი მნიშვნელობა აქვს. ვფიქრობ, ცენტრალური საარჩევნო კომისია იქნება უდიდესი წნეხის ქვეშ ყველა პარტიის მხრიდან, მაგრამ მათი ვალია ქვეყნის და სახელმწიფოს წინაშე ამ წნეხს გაუძლონ, თუმცა უნდა გაითვალისწინონ, რომ მოქალაქეებისგან წნეხი ბევრად დიდი იქნება“, – განაცხადა გიორგი გახარიამ.
