საზოგადოებისთვის ხელმისაწვდომი უნდა იყოს ინფორმაცია, მან ეს ყველაფერი უნდა იცოდეს და მალული არ უნდა იყოს. თუ რამე გაქვთ დასამალი, ე.ი. მართლა გამოსააშკარავებელი ყოფილა, - ასე უპასუხა „ხალხის ძალის“ ერთ-ერთმა ლიდერმა, დიმიტრი ხუნდაძემ, პარლამენტის იურიდიულ საკითხთა კომიტეტის სხდომაზე, სადაც საზოგადოებრივი მოძრაობის მიერ წარდგენილ კანონპროექტებს განიხილავენ, სახალხო დამცველის მოადგილის, გიორგი ბურჯანაძის განცხადებას იმის შესახებ, რომ არასამთავრობო ორგანიზაციები ისედაც გამჭვირვალედ საქმიანობენ და „ხალხის ძალის“ კანონპროეტები მათი საქმიანობის შეზღუდვას ემსახურება.
დიმიტრი ხუნდაძემ ბურჯანაძეს წინა საკომიტეტო სხდომაზე გაკეთებული განცხადებაც შეახსენა.
„ნუ გეშინიათ საზოგადოების ინფორმირების. როცა სცენიდან საზოგადოებას მხარდაჭერას სთხოვთ, უნდა იცოდეს საზოგადოებამ, ვინ ითხოვს მისგან მხარდაჭერას და ნდობა დამსახურებულად უნდა გამოგიცხადოთ, და არა იმის მიხედვით, ვინ რამდენს გიხდით. ჩანს, რასაც გიხდიან - ამიტომ დგახარ ცალ ფეხზე! აი, კუბილიუსი როცა გეტყვის, მაშინ დადგები ორ ფეხზე!.. კოჭლი სუვერენიტეტი არ ვარგა!“, - აღნიშნა დიმიტრი ხუნდაძემ.
ცნობისთის, 2 მარტს, პარლამენტის ორი კომიტეტის გაერთიანებულ სხდომაზე, ბურჯანაძემ განაცხადა: „თუ ევროკავშირში განაცხადი გვაქვს გაკეთებული - ყველაფერი უნდა გავაკეთოთ. რომ გვითხრან, რომ ერთი კვირა ცალ ფეხზე უნდა იდგეთო, უნდა ვიდგეთ“.
