აშშ-ის სახელმწიფო მდივანმა ენტონი ბლინკენმა განაცხადა, რომ მან ისრაელის პრემიერ-მინისტრ ბენიამინ ნეთანიაჰუს უთხრა, რომ ისრაელმა უნდა განახორციელოს შემდგომი ძალისხმევა ღაზაში მშვიდობიანი მოსახლეობის დასაცავად, როგორიცაა უსაფრთხო ზონების შექმნა სამხრეთ და ცენტრალურ ღაზაში, როდესაც ისრაელი სამხედრო მოქმედებებს განაახლებს. ამის შესახებ CNN წერს.
"აუცილებელია, რომ ისრაელმა იმოქმედოს საერთაშორისო ჰუმანიტარული სამართლისა და ომის კანონების შესაბამისად, მაშინაც კი, როცა ტერორისტულ დაჯგუფებას უპირისპირდება, რომელიც არცერთს არ სცემს პატივს," - თქვა ბლინკენმა ხუთშაბათს, თელ-ავივში გამართულ პრესკონფერენციაზე.
მან აღნიშნა, რომ ნეთანიაჰუ "დაეთანხმა ამ მიდგომის აუცილებლობას" მშვიდობიანი მოსახლეობის დასაცავად და რომ ისრაელის მთავრობამ ამისათვის "კონკრეტული ნაბიჯები" შესთავაზა.
ბლინკენმა თქვა, რომ ისრაელმა თავიდან უნდა აიცილოს "ღაზაში მშვიდობიანი მოსახლეობის შემდგომი მნიშვნელოვანი გადაადგილება," და დასძინა, რომ დევნილ სამოქალაქო პირებს საბოლოოდ უნდა მიეცეთ დაბრუნების საშუალება.
"არ უნდა იყოს გრძელვადიანი შიდა გადაადგილება," - თქვა ბლინკენმა.
ბლინკენმა ასევე განაცხადა, რომ ისრაელმა თავიდან უნდა აიცილოს ისეთი კრიტიკული ინფრასტრუქტურის დაზიანება, როგორიცაა საავადმყოფოები, ელექტროსადგურები და წყლის ობიექტები.
