აშშ-ის პრეზიდენტმა, დონალდ ტრამპმა განაცხადა, რომ ჩინეთის პრეზიდენტი სი ძინპინი შესაძლოა, უახლოეს მომავალში შეერთებულ შტატებს მოლაპარაკებებისთვის ეწვიოს. ამის შესახებ ტრამპმა ვაშინგტონში ჟურნალისტებთან საუბრისას განაცხადა.
"ის ჩამოვა. არც თუ ისე შორეულ მომავალში", – აღნიშნა აშშ-ის პრეზიდენტმა.
ტრამპმა იანვარში პრეზიდენტის პოსტზე დანიშვნის შემდეგ ჩინეთიდან აშშ-ში შემოტანილ ყველა პროდუქტზე 20%-იანი გადასახადი დააწესა. მისი თქმით, პეკინი ვერ აკონტროლებს იმ ქიმიური ნივთიერებების ექსპორტს, რომლებიც აშშ-ში ფენტანილის უკანონო წარმოებისთვის გამოიყენება.
ამის მიუხედავად, დონალდ ტრამპი ბოლო კვირებში ამბობდა, რომ ჩინეთის პრეზიდენტ სი ძინპინთან კარგი ურთიერთობა აქვს.
