საქართველოს პროფესიული კავშირების გაერთიანებას გვსურს გამოვეხმაუროთ ჭიათურაში მიმდინარე პროცესებსა და შპს „ჯორჯიან მანგანეზის’’ მიერ გამოქვეყნებულ 2023 წლის 15 ივნისის განცხადებას.
"ღირსეული დასაქმება და ამ მიმართულებით ქმედითი ნაბიჯების გადადგმა წარმოადგენს ადამიანის კონსტიტუციური უფლებების რეალიზებას. ყველა ადამიანს უნდა ჰქონდეს შესაძლებლობა იმუშაოს ღირსეულ პირობებში, სადაც უზრუნველყოფილია სიცოცხლისთვის უსაფრთხო გარემო და მინიმუმ, მისი და მისი ოჯახის წევრების საცხოვრებლად აუცილებელი ანაზღაურება. ღირსეული დასაქმების უფლების რეალიზაციისთვის კი უმნიშვნელოვანესია ყველა მხარის აქტიური ჩართულობა.
საზოგადოებისთვის და ჭიათურაში, შპს „ჯორჯიან მანგანეზში’’ დასაქმებული პირებისთვის ცნობილია, რომ მრავალწლიანი ბრძოლის შემდეგ, 2021 წელს, ერთი მხრივ, პროფკავშირებსა და მეორე მხრივ, შპს „ჯორჯიან მანგანეზსა“ და შპს „მაღაროელს“ შორის ხელმოწერილ იქნა კოლექტიური ხელშეკრულება, რომელიც შემუშავდა დასაქმებულების ჩართულობით და გაფორმდა მათთან შეთანხმებით. კოლექტიური ხელშეკრულების გაფორმების მიზანი დასაქმებულთა შრომით-სოციალური მდგომარეობის გაუმჯობესება და შემდგომში ჯანსაღი სოციალური დიალოგის წარმოება გახლდათ.
რა თქმა უნდა, ჩვენ არ უარვყოფთ შპს „ჯორჯიან მანგანეზის“ მიერ, 2023 წლის 15 ივნისის წერილში მითითებული ოდენობით კოლექტიური ხელშეკრულებით ნაკისრი ვალდებულებების ფარგლებში, კომპანიის მხრიდან, დამატებითი ხარჯების გაწევას. აქვე აღვნიშნავთ, რომ 2023 წელს არ მომხდარა კოლექტიური ხელშეკრულების 6.7 პუნქტის მიხედვით, ინფლაციის მაჩვენებლის შესაბამისად ხელფასების ინდექსაცია და კოლექტიური ხელშეკრულების 6.6 პუნქტის მიხედვით, სააღდგომო პრემიის გაცემა, თუმცა, აღნიშნულთან დაკავშირებით მივიღეთ დაპირება, რომ საწარმოს მუშაობის სრული ციკლის აღდგენისთანავე მოხდება მითითებული ვალდებულებების შესრულება.
მართალია, ჩვენთვის ცნობილია მსოფლიო ბაზარზე ფასებთან დაკავშირებით არსებული გამოწვევები, რამდენადაც აღნიშნული წარმოადგენს საჯაროდ ხელმისაწვდომ ინფორმაციას, თუმცა არც მაღაროელები და არც პროფკავშირები არ ვიცნობთ კომპანიის ფინანსურ დოკუმენტაციას, რაც მოგვცემდა შესაძლებლობას, დეტალური წარმოდგენა შეგვქმნოდა განცხადებაში აღნიშნულ კომპანიის ფინანსურ კრიზისზე.
მიგვაჩნია, რომ პროფკავშირებისთვის, მაღაროელებისთვის და ზოგადად, საზოგადოებისთვის მნიშვნელოვანია გვქონდეს დამაჯერებელი, ობიექტური და სრულყოფილი ინფორმაცია შპს „ჯორჯიან მანგანეზის“ განცხადებაში მოყვანილ ზარალთან და ფინანსურ მდგომარეობასთან დაკავშირებით. აღნიშნული კი შესაძლებელია მხოლოდ დამოუკიდებელი აუდიტორული დასკვნის წარმოდგენის შემთხვევაში. შესაბამისად, მოვუწოდებთ კომპანიას მყისიერად უზრუნველყოს საერთაშორისოდ აღიარებული, დამოუკიდებელი აუდიტორული კომპანიის მიერ აუდიტის ჩატარება და რეალური სურათის წარმოჩენა, რათა მაღაროელებს, პროფკავშირებს და საზოგადოებას გვქონდეს სრული ინფორმაცია შექმნილ მდგომარეობასთან დაკავშირებით.
ჩვენ სრულად გვესმის მაღაროელთა პათოსი და აქვე აღვნიშნავთ, რომ დამოუკიდებელი აუდიტის ჩატარებამდე, საუბრები კომპანიის მხრიდან კოლექტიური ხელშეკრულებით ნაკისრი ვალდებულების შეუსრულებლობაზე მიუღებელია.
საქართველოს პროფესიული კავშირების გაერთიანება წლებია მოუწოდებს და სთავაზობს სახელმწიფოს კონკრეტულ ინიციატივებს ღირსეული დასაქმების პოლიტიკის შემუშავების მიზნით, აქტიურად აყენებს მოთხოვნებს დასაქმებულთა უფლებების დასაცავად საკანონმდებლო ცვლილებების განხორციელებასთან დაკავშირებით, რაზედაც რიგ შემთხვევაში გვაქვს კონკრეტული მიღწევები. თუმცა, პროფკავშირების მიერ არაერთგზის დაყენებული საკითხი და მოწოდება, უზრუნველყოფილ იქნეს შესაბამისი გარემო ალტერნატიული დასაქმების ადგილების შესაქმნელად, განსაკუთრებით იმ რეგიონებში, სადაც ოპერირებს მხოლოდ საჯარო დაწესებულებები და ერთეული კომპანიები, ამ ეტაპზე უგულებელყოფილია.
ვფიქრობთ, 21-ე საუკუნეში ჯანსაღი სოციალური დიალოგის წარმოება ყველა მხარის უმთავრეს ინტერესს უნდა წარმოადგენდეს. შესაბამისად, მიგვაჩნია, რომ მოცემულ შემთხვევაში, დამოუკიდებელი აუდიტის ჩართულობა ხელს შეუწყობს სტაბილურობაზე, საქმეზე ორიენტირებულ მოლაპარაკებებს." - ნათქვამია პროფკავშირების გავრცელებულ განცხადებაში.
ცნობისთვის, "კომპანია ჯორჯიან მანგანეზსა და იმ თანამშრომლებს შორის, რომლებიც შეცვლილ სამუშაო პირობაზე გადასვლას არ თანხმდებიან, მედიატორის მონაწილეობით მოლაპარაკების მორიგი შეხვედრა გაიმართა. კომპანია ე.წ ვახტური რეჟიმით მომუშავე თანამშრომლების მოთხოვნების ყველა პუნქტზე შეჯერდა, ხოლო ხელფასის მატება კომპანიის წინადადებით განისაზღვრება 5%-ით. ძველ სამუშაო გრაფიკზე დაბრუნებასთან დაკავშირებით კი მიმდინარეობს მოლაპარაკებები.გარდა 5%-იანი ხელფასის მატებისა, კომპანია თანამშრომლებს სთავაზობს შეწყვიტონ პროტესტი, განაახლონ მუშაობა და მუშაობის შედეგად რა ეკონომიკური ეფექტიანობაც იქნება მიღწეული, იმის მიხედვით განისაზღვროს თანამშრომელთა ბონუსები და ბენეფიტები. შესაბამისად, კომპანია გამოხატავს მზაობას მედიაციის პროცესის გაგრძელებაზე და თანხმობას გამოთქვამს მიღწეულ შედეგზე გააფორმოს სამედიაციო შეთანხმება. ასევე, კომპანია სთავაზობს ჯორჯიან მანგანეზის ყველა თანამშრომელს, მათ ვისაც სურს მუშაობის დაწყება, დაუყონებლივ გახსნას საწარმოები და თანამშრომლები 100%-იან სახელფასო ანაზღაურებაზე გადაიყვანოს. ხოლო მათთვის, ვისაც არ სურს სამუშაოს დაწყება მედიაციის პროცესის დასრულებამდე, მათთვის სპეციალური სამუშაო რეჟიმი 1 აგვისტომდე გაახანგრძლივოს და აანაზღაუროს ხელფასის 60%-ი. კომპანია მიმდინარე წლის თებერვლიდან სპეციალურ სამუშაო რეჟიმზეა გადასული, კერძოდ, გლობალური კრიზისით გამოწვეული პრობლემების დასაძლევად ჭიათურაში მანგანუმის მადნის მოპოვება, გამდიდრება და სხვა მასთან დაკავშირებული საქმიანობა დროებით შეაჩერა და უკვე მეხუთე თვეა 3,382 თანამშრომელს ხელფასის 60%-ს უხდის, რაც თვეში 6 მილიონ ლარზე მეტია. მსოფლიო ფეროშენადნობების ბაზარზე შექმნილი კრიზისის ფონზე, 5 ივნისს კომპანიამ ე.წ ვახტურ რეჟიმზე მომუშავე 720 თანამშრომელს შეცვლილი სამუშაო პირობა შესთავაზა, რათა კომპანიას საქმიანობა არ შეეჩერებინა და ჭიათურის 3,382 თანამშრომელი სამსახურის გარეშე არ დარჩენილიყო. უკვე წლებია, 2,662 თანამშრომელი 8-საათიანი სამუშაო გრაფიკით მუშაობს, გარდა ე.წ. ვახტებზე დასაქმებული თანამშრომლისა.შეცვლილი სამუშო პირობა გულისხმობს ორცვლიანი 12- საათიანი სამუშაო პირობებიდან, სამცვლიან 8-საათიან სამუშაო პირობებზე გადასვლა. უცვლელი რჩება თვის მანძილზე თანამშრომელთა ხელფასი, დასვენებისა და სამუშაო საათები. ახალი სამუშაო გრაფიკის მიზანია შრომის უკეთესი და თანაბარი პირობების შეთავაზება და შრომის ნაყოფიერების გაზრდა.
