თბილისის მერია, ორხევის დასახლებაში, ერთ-ერთი ავარიული შენობიდან გამოყვანილი, უსახლკაროს სტატუსის მქონე 75 ოჯახთან დაკავშირეებით განცხადებას ავრცელებს. როგორც მერიაში აღნიშნავენ, სიმართლეს არ შეესაბამება ერთ-ერთ მედიაში გავრცელებული ინფორმაცია, თითქოს აღნიშნული ოჯახები "გამოყარეს და ღია ცის ქვეშ დატოვეს. მერიამ, შენობის ავარიულობის გამო, ისინი სხვა თავშესაფარში შეასახლა
"გვინდა, გამოვეხმაუროთ ერთ-ერთი ტელეკომპანიის მიერ გავრცელებულ ინფორმაციას, თითქოს ორხევის დასახლებაში არსებული სოციალური საცხოვრისიდან იქ მცხოვრები ოჯახები "გამოყარეს და ისინი ღია ცის ქვეშ დატოვეს".
სრული პასუხისმგებლობით ვაცხადებთ, რომ აღნიშნული ინფორმაცია არის სრული ტყუილი და თბილისის მუნიციპალიტეტის დისკრედიტაციის მცდელობა.
ორხევის დასახლებაში, მუხაძის ქუჩა N12-ში მდებარე სოციალური საცხოვრისი წარმოადგენს მუნიციპალიტეტის საკუთრებას და იგი ავარიულ მდგომარეობაშია. შენობა ვერ აკმაყოფილებდა საცხოვრებლად აუცილებელ კრიტერიუმებს, ამიტომ თბილისის მერიამ მისი დემონტაჟის გადაწყვეტილება მიიღო.
შენობაში მცხოვრები თბილისში რეგისტრირებული, უსახლკაროს სტატუსის მქონე 75 ოჯახი გადაყვანილია სხვა ფართებში და დაწყებულია დემონტაჟისთვის საჭირო პროცედურები.
სამწუხაროდ, შენობაში, ასევე, იმყოფებოდა უკანონოდ შეჭრილი რამდენიმე პირი, რომლებიც საფრთხეში აგდებდნენ საკუთარ სიცოცხლეს. შესაბამისად, თავშესაფრის ხელმძღვანელობამ, სამართალდამცავი სტრუქტურების დახმარებით, ისინი შენობიდან გამოიყვანა" - აღნიშნულია მერიის განცხადებაში.
