სიმბოლურია, რომ დღეს, 1989 წლის 9 აპრილის ტრაგედიიდან 35 წლის თავზე ადამიანის უფლებათა ევროპულმა სასამართლომ მიიღო გადაწყვეტილება საქმეზე "საქართველო რუსეთის წინააღმდეგ", რომელიც 2008 წლის კონფლიქტის შემდეგ დაწყებული ე.წ. ბორდერიზაციის" შედეგად ადამიანის უფლებების დარღვევას ეხება, რაც, მათ შორის, აფხაზეთსა და ცხინვალში შესვლის მცდელობისას ადამიანების მოკვლას, უკანონო დაკავებას, ე.წ. საზღვრის გადაკვეთის გამო ადამიანების მიმართ განხორციელებულ არასათანადო მოპყრობას გულისხმობს. - ამის შესახებ საქართველოს სახალხო დამცველი ლევან იოსელიანი სოციალურ ქსელში წერს.
სასამართლომ რუსეთის მხრიდან ადამიანის უფლებათა ევროპული კონვენციის არაერთი მუხლის დარღვევა დაადგინა. მათ შორის, გადაწყვეტილებით რუსეთის მხრიდან კონვენციის მე-2 მუხლის (სიცოცხლის უფლება), მე-3 მუხლის (წამების აკრძალვა) და სხვა არაერთი მუხლის დარღვევა დადგინდა. ეს გადაწყვეტილება საერთაშორისო ასპარეზზე საქართველოსთვის კიდევ ერთი დიდი გამარჯვებაა. მნიშვნელოვანია, რომ ადამიანის უფლებათა ევროპულმა სასამართლომ პირდაპირ გაუსვა ხაზი რუსეთის პასუხისმგებლობას. აღნიშნული გადაწყვეტილება განსაკუთრებით მნიშვნელოვანია იმ გამოწვევების ფონზე, რომლებიც დღემდე ოკუპირებულ ტერიტორიებზე მცხოვრები ადამიანებისთვის სამწუხარო რელობაა. დღემდე, სამწუხაროდ, კვლავ გრძელდება ოკუპირებულ ტერიტორიებზე მოქალაქეთა უკანონო დაკავებებისა და არასათანადო მოპყრობის პრაქტიკა. კვლავ გრძელდება საოკუპაციო ძალების მიერ უკანონო ე.წ. ბორდერიზაციის პროცესი. საკუთრების უფლებისდარღვევა ყოველდღიურ გამოწვევად რჩება საოკუპაციო ხაზის მიმდებარედ მცხოვრები მოსახლეობისათვის. ადამიანის უფლებათა ევროპული სასამართლოს აღნიშნული გადაწყვეტილება კიდევ ერთი დასტურია იმისა, რომ მსგავსი ადამიანის უფლებების საწინააღმედო პრაქტიკა დაუყოვნებლივ უნდა აღმოიფხვრას."- წერს სახალხო დამცველი.
ცნობისთვის, ადამიანის უფლებათა ევროპულმა სასამართლომ გადაწყვეტილება გამოაქვეყნა საქმეზე – „საქართველო რუსეთის“ წინააღმდეგ, რომელიც ეხება 2008 წლის კონფლიქტის შემდეგ დაწყებული „ბორდერიზაციის“ შედეგად ადამიანის უფლებების დარღვევებს.
