„პრეზიდენტის საკითხს არ ვიცნობ, მაგრამ ვხედავთ, რომ კულტურის მინისტრის, თეა წულუკიანის მთავარი მოწოდება, ერთი მხრივ, კულტურული ძეგლების გაფრთხილება და, სხვა მხრივ, ჩვენი კულტურული მემკვიდრეობის დაცვაა. ამ მხრივ მოქმედებს კულტურის მინისტრი“ – ამის შესახებ საქართველოს პარლამენტის თავმჯდომარემ, შალვა პაპუაშვილმა ჟურნალისტებს განუცხადა, რიღაც გამოეხმაურა გავრცელებულ ინფორმაციას, რომ „საქართველოს პრეზიდენტის ადმინისტრაციამ სიმონ დადიანის ხუთი ნამუშევარი ხელოვნების სასახლეს არ დაუბრუნა, ნამუშევრებისთვის ათონელის რეზიდენციაში კულტურის სამინისტროს გენერალური ინსპექციის წარმომადგენელი შევიდა და რომ შესაძლებელია, ერთ-ერთი ნახატი დაზიანებული იყოს“.
მანვე ისაუბრა ეროვნულ გალერეაში მომხდარ ფაქტთან დაკავშირებით. კერძოდ, მხატვარ სანდრო სულაბერიძის მიერ საკუთარი ნახატის ნაცვლად დატოვებული წარწერის შესახებ, რაზეც შინაგან საქმეთა სამინისტროს მხრიდან დაწყებულია გამოძიება და საზოგადოების სხვადასხვა სფეროს წარმომადგენლებმა ამასთან დაკავშირებით აქცია გამართეს.
„ფაქტია, რომ, სამწუხაროდ, ჩვეულებრივი ბრძოლაა ქარის წისქვილებთან. სწორედ თეა წულუკიანის მოწოდებაა, მათ შორის ის, რომ თანამედროვე ხელოვნებს შესაძლებლობა ჰქონდათ, მათ შესახებ უკეთ გაეცნო ქართულ და არა მხოლოდ ქართულ საზოგადოებას. საუბარი, თითქოს რაღაც თავისუფლებებია შეზღუდული, იმ დროს, როდესაც თავად ეს ხელოვანი პირველად გამოიფინა სახელმწიფო გალერეაში, ყველაზე უკეთეს შემთხვევაში, ეს არის ქარის წისქვილებთან ბრძოლა და უარეს შემთხვევაში, ჩვენ ვნახეთ, მათ შორის სახეები, ვინც არიან ჩართული. სამწუხაროდ, ერთსა და იმავე წრეზე ტრიალებს ეს ჯგუფი, რომელიც, უბრალოდ, საქართველოს ხალხის მიერ არჩეული ხელისუფლების მიმართ ზიზღით არის შეპყრობილი და ეძებენ საბაბს, იქნებ როგორმე გარკვეული აღშფოთება გამიოწვიონ. ეს იქნება ადამიანის სიკვდილი, რაიმე კატასტროფა. მათთვის ყველაფერი არის საბაბი, რამენაირად შეარყიონ საქართველოს ხელისუფლება“, – განაცხადა შალვა პაპუაშვილმა.
კითხვაზე, რომ „აღნიშნულ საკითხს გუშინ პრეზიდენტიც გამოეხმაურა სოციალურ ქსელში, ახლა თეა წულუკიანის შურისძიება ხომ არ არის პრეზიდენტის წინააღმდეგ“, პაპუაშვილმა აღნიშნა:
„რაც შეეხება გარკვეულ ხელოვნურ აღშფოთებას გარკვეული ჯგუფების მხრიდან, უკეთეს შემთხვევაში, ეს არის ქარის წისქვილებთან ბრძოლა, უარეს შემთხვევაში, არის იმ ჯგუფის აქტიურობა, რომელიც ეძებს ნებისმიერ საბაბს, და მათთვის ყველა საბაბი კარგია, ოღონდ რაღაცას მოეჭიდონ, იქნებ მოძებნონ ნიადაგი რაღაც მღელვარებისთვის. ხედავთ, საბოლოო ჯამში, თავად ამ ჯგუფმა, ვგულისხმობ პოლიტიკოსებს და მათ გარშემო მყოფ „ფეისბუქ ბაბლს“, იმდენად მოახდინა საკუთარი თავის დისკრედიტება საქართველოს მოსახლეობის თვალში, რომ მნიშვნელოვან საკითხებზე საუბრის შემთხვევაში რეაქციას ვერ იღებენ. ერთადერთი რჩევა იქნება, თავად შეეშვან ასეთ საკითხებს“, – განაცხადა შალვა პაპუაშვილმა.
