სალომე ზურაბიშვილმა ესტონეთისა და ლიეტუვის პრეზიდენტებთან სატელეფონო საუბარი გამართა

სატელეფონო საუბარს სალომე ზურაბიშვილი სოციალურ ქსელ „ტვიტერში“ გამოეხმაურა.

„ესტონეთის პრეზიდენტთან სატელეფონო საუბრისას, ალარ კარისმა დაადასტურა საქართველოს ევროპული გზის მხარდაჭერა, გზისა, რომელიც ისტორიულად ქართველმა ხალხმა აირჩია“, – წერს ზურაბიშვილი „ტვიტერის“ საკუთარ გვერდზე.

სალომე ზურაბიშვილთან გამართული სატელეფონო საუბრის შემდეგ „ტვიტერზე“ გამოქვეყნდა ესტონეთის პრეზიდენტის განცხადებაც.

„ქართველმა ხალხმა აირჩია საკუთარი გზა და ის ევროპისკენ მიდის. ესტონეთი მხარს უჭერს საქართველოს ამ გზაზე. სატელეფონო საუბარში საქართველოს პრეზიდენტს ვუთხარი, რომ მნიშვნელოვანია, გაგრძელდეს მუშაობა 12 პრიორიტეტულ რეფორმაზე, რომელიც ევროკომისიამ წარმოადგინა“, – ნათქვამია ესტონეთის პრეზიდენტის „ტვიტერის“ გვერდზე.

საქართველოს პრეზიდენტთან საუბრის შესახებ წერს ლიეტუვის პრეზიდენტი გიტანას ნაუსედაც.

„განვიხილეთ საქართველოში მიმდინარე მოვლენები პრეზიდენტ ზურაბიშვილთან ერთად. დავარწმუნეთ ის, რომ ლიეტუვა მხარს უჭერს საქართველოს ევროინტეგრაციის ძალისხმევას. ლიეტუვა მზადაა, დაეხმაროს საქართველოს აუცილებელი რეფორმების გზაზე“, – წერს გიტანას ნაუსედა.