„ვეტინგებს“ და სხვა თემებს რომ ჩაგვჩიჩინებენ, თითს რომ გვიქნევენ, ჯერ მიხედონ ადეიშვილს, უსასტიკეს, სისხლიან დამნაშავეს, მწამებელს და ადამიანების გაუპატიურების შემკვეთ დამნაშავეს, რომელიც თავისუფლად გადაადგილდება დღეს ევროპის ქუჩებში, – ამის შესახებ საპარლამენტო უმრავლესობის ლიდერმა, მამუკა მდინარაძემ განაცხადა.
მდინარაძემ კომენტარი გააკეთა დღეს გავრცელებულ ინფორმაციაზე, რომ ზურაბ ადეიშვილი, უკრაინის გენერალურ პროკურორთან ერთად, ჰააგაში, ერთ-ერთ საერთაშორისო ღონისძიებაზე იმყოფება.
მდინარაძის თქმით, აღნიშნულთან დაკავშირებით საქართველოს ხელისუფლებას რეაქცია ექნება.
„ადეიშვილს მიხედონ და ობიექტურობაზე შემდეგ ვილაპარაკოთ. ამაზეც ჩვენ ჩვენი რეაქციები გვექნება. უკვე მართლა ბოლო წვეთები გადმოდის იმ ფიალიდან, რომლის ატანაც არ შეიძლება. როგორ შეიძლება, ვიღაც შენ გეუბნებოდეს, რომ უნდა დაეთანხმო „ვეტინგს“, რომელსაც ზურა ადეიშვილი ახორციელებს უკრაინასა თუ სხვა ქვეყანაში და ამ დროს, პირდაპირი გაგებით სისხლისმსმელი, სააკაშვილის, ადეიშვილისა და ახალაიების იქით უფრო სისხლისმსმელი ადამიანი ამ ქვეყანაში არ მახსენდება. ეს ადამიანი თავისუფლად გადაადგილდება ევროპის ქუჩებში. ვიდრე ვეტინგზე თითს დაგვიქნევენ, მანამდე ადეიშვილი გადასცენ საკუთარ ქვეყანას, რომელი ქვეყანაც გააუბედურა ამ კაცმა“, – განაცხადა მამუკა მდინარაძემ.
