„ოჯახური ღირებულებებისა და არასრულწლოვანთა დაცვის შესახებ“ კანონში არცერთი მუხლი არ არის დისკრიმინაციული, საუბარია ფასეულობებისა დაცვაზე, რომელიც საზოგადოების უდიდესი ნაწილის ინტერესშია, – ამის შესახებ ევროინტეგრაციის კომიტეტის თავმჯდომარე მაკა ბოჭორიშვილმა განაცხადა, რითაც „ოჯახური ღირებულებებისა და არასრულწლოვანთა დაცვის შესახებ“ კანონთან დაკავშირებით საგარეო და უსაფრთხოების საკითხებში ევროკავშირის უმაღლესი წარმომადგენლის, ჯოზეფ ბორელის განცხადებას გამოეხმაურა.
„ამ კანონში არცერთი მუხლი არ არის, რომელიც შეიძლება იყოს განხილული, როგორც დისკრიმინაციის გაძლიერება ან დისკრიმინაციული. ეს არ არის კანონი, რომელიც წინააღმდეგობაში მოვიდოდა საქართველოს კონსტიტუციასთან ან ანტიდისკრიმინაციულ კანონმდებლობასთან. სამწუხარო რეალობაა, რომ ხშირად განცხადებები გვესმის საკითხის ძირფესვიანი შესწავლისა და შინაარსის კარგად გაცნობიერების გარეშე. საუბარი არ არის არანაირ დისკრიმინაციაზე, ვსაუბრობთ იმ ფასეულობებისა და ღირებულებების დაცვაზე, რომელიც ჩვენი მოსახლეობის, საზოგადოების უდიდესი ნაწილის ინტერესშია. სწორედ ეს არის დემოკრატია და ამისთვის არსებობს დემოკრატიულად არჩეული ხელისუფლება, რომ, საზოგადოების ინტერესებიდან გამომდინარე, გადადგას ნაბიჯები. დისკრიმინაციას რაც შეეხება, ამ კანონში არცერთი მუხლი არ მოიძებნება, რომელიც შეიძლება იყოს დისკრიმინაციული“, – განაცხადა მაკა ბოჭორიშვილმა.
ცნობისათვის: "საქართველოს პარლამენტმა მიიღო კანონები "ოჯახური ღირებულებებისა და არასრულწლოვანთა დაცვის" შესახებ, რომლებიც ადამიანების ფუნდამენტურ უფლებებს ძირს გამოუთხრის და დისკრიმინაციასა და სტიგმატიზაციას გაზრდის. მოვუწოდებ საქართველოს, ეს კანონი გაიწვიოს, რომელიც ქვეყანას ევროკავშირს კიდევ უფრო აშორებს", –წერს ჯოზეფ ბორელი სოციალურ ქსელში.
