„მგონი, ახლა დიდი მტკიცება არ სჭირდება იმას, რომ წინა ხელისუფლების დროს იყო სისტემური დანაშაული, წამება. ეს სტრასბურგის გადაწყვეტილებითაც დადასტურებულია და ყველამ ვიცით, ვინც საქართველოში ვცხოვრობდით. მგონი, თვითონაც აღარ უარყოფენ ამას. აქ კითხვის ნიშნები არ არის და ჩემთვის არც არასდროს ყოფილა“ - განაცხადა პარტია "მოქალაქეების" ლიდერმა ლევან იოსელიანმა და აღნიშნა, რომ ეს ევროპული სასამართლოს მიერაც არის დადასტურებული.
ჟურნალისტის კითხვაზე, როგორ შეაფასებდა იმას, რომ სტრასბურგის გადაწყვეტილებით, 2012 წლამდე საქართველოში სისტემური დანაშაულები ხდებოდა, ხოლო ევროპარლამენტის რეზოლუცია ამბობს, რომ სააკაშვილის მიმართ პოლიტიკური ვენდეტაა, ლევან იოსელიანმა განაცხადა:
„სასამართლო არის სხვა ტიპის ინსტიტუცია, სადაც ხდება მტკიცებულებებზე დაფუძნებული გადაწყვეტილებების მიღება, პარლამენტი არის პოლიტიკური ორგანო, სადაც პოლიტიკური გზავნილების გაჟღერება ხდება. მათი ერთმანეთთან დაკავშირება, იქ ასე რატომ წერია და ასე შემდეგ, არ შეიძლება. ერთი პოლიტიკური ორგანოა, მეორე – სასამართლო, რომელშიც გადაწყვეტილებების მიღება მტკიცებულებებზე დაყრდნობით ხდება“.
ადამიანის უფლებათა ევროპულმა სასამართლომ საქმეზე „ოჩიგავა საქართველოს წინააღმდეგ“ გადაწყვეტილება გამოაქვეყნა, სადაც ნათქვამია, რომ აკაკი ოჩიგავას მიმართ არასათანადო მოპყრობა არ შეიძლება, არ იქნას კვალიფიცირებული როგორც წამება, ეს ჩადენილი იყო პატიმრებისადმი სისტემური ძალადობის პერიოდში.
ასევე, იუსტიციის სამინისტროს განმარტებით, სტრასბურგის გადაწყვეტილებით დგინდება, რომ 2012 წლამდე საქართველოს პენიტენციურ სისტემაში წამებას სისტემური ხასიათი ჰქონდა, მათ შორის იყო პატიმრების ცემა კვირაში რამდენჯერმე.
