“დღეს ვდგავართ იმ გამოწვევის წინაშე, როდესაც უნდა გადავრჩეთ და უნდა გადავრჩეთ, არა მხოლოდ ფიზიკურად, არამედ სულიერად, იმ ღირებულებებით, რაზედაც დგას ჩვენი სახელმწიფო, შევინარჩუნოთ ჩვენი იდენტობა და გავაგრძელოთ მშვიდობიანი განვითარება”,- განაცხადა “ქართული ოცნების” გენერალურმა მდივანმა კახა კალაძემ ზუგდიდში გამართულ წინასაარჩევნო შეხვედრაზე სიტყვით გამოსვლისას.
კახა კალაძემ სამეგრელო-ზემო სვანეთის მოსახლეობას ნაციონალური მოძრაობის მმართველობის პერიოდი შეახსენა და ქვეყნის წინაშე დღეს არსებულ გამოწვევებზეც ისაუბრა.
“ჩვენ ყველას გვახსოვს წლების წინ რა მდგომარეობა იყო ქვეყანაში, ფეხქვეშ იყო გათელილი ადამიანის ღირსება. გვახსოვს, როგორ უსწორდებოდნენ განსხვავებული მოსაზრების მქონე ადამიანებს; გვახსოვს, რა ხდებოდა ბიზნესმენების მიმართ, როგორ არეკეტებდნენ, ართმევდნენ ქონებას; გვახსოვს, ქუჩაში დახვრეტილი ახალგაზრდები; გვახსოვს, რა ხდებოდა ციხეებში და ჩვენ, “ქართული ოცნება-დემოკრატიული საქართველო” გაძლევთ პირობას, რომ საქართველო არასდროს დაბრუნდება წარსულში. მხოლოდ და მხოლოდ წინ, გამარჯვებებით, მშვიდობით ვიცხოვრებთ დემოკრატიულ, განვითარებულ, თავისუფალ საქართველოში.
რამდენიმე დღის წინ გამოაქვეყნეს რეზოლუაცია, სადაც ღიად საუბრობენ იმაზაე, რასაც ადრე კულისებში გვეუბნებოდნენ და ხელების გაგრეხით გვაშანტაჟებდნენ. თუმცა, ყველაფერი ჯერ კიდევ არ უთქვამთ აღნიშნულ რეზოლუციაში, გაბედეს მხოლოდ სანქციებზე საუბარი. გვახსოვს, მოწოდებები, რასაც აჟღერებდნენ მეორე ფრონტის გახსნასთან დაკავშირებით, სანქციებზე მიერთებასთან დაკავშირებით. ჩვენ რომ მაშინ შეცდომა დაგვეშვა და გადაგვედგა ნაბიჯი სანქციებზე მიერთებისკენ, ამით ვის დავაზარალებით? ისევ ქართულ სახელმწიფოს, ქართველ ხალხს, ეკონომიკას, მშრომელ ადამიანს,”- აღნიშნა კახა კალაძემ.
