საქართველოს თავდაცვის ძალების დღისადმი მიძღვნილ ღონისძიებაზე, თავდაცვის მინისტრმა პროფესიული დღე განსაკუთრებული პატივისცემით მიულოცა დაჭრილ-დაშავებულ სამხედრო მოსამსახურეებს.
მინისტრმა მათ სიმამაცისა და გამძლეობის სიმბოლო უწოდა. „თავდაცვის ძალების რიგებში ღირსეულად აგრძელებენ სამსახურს ჩვენი დაუმარცხებელი და გაუტეხელი დაჭრილ-დაშავებული მებრძოლები, თავდაცვის ძალების გამორჩეული ჯარისკაცები“, - განაცხადა ირაკლი ჩიქოვანმა. მინისტრმა მხარდაჭერა აღუთქვა დაჭრილ სამხედროებს და აღნიშნა, რომ მისთვის დიდი პატივია ცოცხალი გმირების გვერდით დგომა.
სიტყვით მიმართვისას, მინისტრმა პატივისცემა ვეტერანების მიმართ გამოხატა. ირაკლი ჩიქოვანის განცხადებით, საუკუნოვან ტრადიციებსა და გამოცდილებაზე დაყრდნობით, ვეტერანების ძალისხმევით ჩამოყალიბდა თანამედროვე თავდაცვის ძალები.
„მათ შექმნეს ეროვნული სულისკვეთებით განმსჭვალული ქართული ჯარი, რითაც მტკიცე საფუძველი
ჩაუყარეს თანამედროვე თავდაცვის ძალებს და ასე ვამაყობთ ჩვენ დღეს“, - აღნიშნა საქართველოს თავდაცვის მინისტრმა.
