"ჩვენი მიზანი არ არის ქვეყნის იზოლაცია, ჩვენი მიზანია, დამნაშავეების დასჯა, რომლებიც სჩადიან დანაშაულს საქართველოს ეროვნული ინტერესების წინააღმდეგ", - ამის შესახებ კოალიციას "ერთიანობა - ნაციონალური მოძრაობის" ერთ-ერთმა ლიდერმა, გიორგი ვაშაძემ "ღამის კურიერის" ეთერში განაცხადა და აღნიშნა, რომ ევროკავშირთან უვიზო მიმოსვლის შეჩერების საკითხი ოპოზიციის ინტერესის სფერო არ არის.
მისივე თქმით, ოპოზიციისთვის ნომერ პირველი ამოცანა ყველა პასუხისმგებელი პირის გამოკვეთაა, რომლებიც, მისი თქმით, მონაწილეობენ დემონსტრანტებზე ძალადობაში, მათ უსამართლოდ გასამართლებაში.
"ჩვენი მიზანი არ არის ქვეყნის იზოლაცია, ჩვენი მიზანია, დამნაშავეების დასჯა, რომლებიც სჩადიან დანაშაულს საქართველოს ეროვნული ინტერესების წინააღმდეგ. ვგულისხმობ დასანქცირებას, რა თქმა უნდა და არამარტო - ვფიქრობ, თუ არ გაჩერდებიან, მივალთ იმ კომპონენტამდე, რომ მათ წინააღმდეგ სისხლის სამართლის საქმეებიც აღიძრას საერთაშორისო ინსტანციებში. ამის მექანიზმებიც არსებობს, ამაზეც ვმუშაობთ იმიტომ, რომ ჩვენ ვაგროვებთ ყველა მტკიცებულებას დანაშაულთან დაკავშირებით. არ ეგონოს ვინმეს, რომ სანქციები დაადეს და ამით დამთავრდება მისი პასუხისმგებლობა - არა, მეტი იქნება.
რაც შეეხება უვიზო მიმოსვლის შეჩერების საკითხს, - ეს ევროპარლამენტის რეზოლუციაში არის ევროპარლამენტის მხრიდან და არა ჩვენი მხრიდან. ჩვენი საერთო პოზიცია, მათ შორის, სალომე ზურაბიშვილთან შეხვედრაზე შევთანხმდით, რომ ჩვენთვის ნომერი პირველი ამოცანა არის ყველა პასუხისმგებელი პირის გამოკვეთა. ჩვენც გვაქვს ეს მონაცემები, სახელები და გვარები მათი, მაგალითად, ვინც სცემს და არაადამიანურად ეპყრობა დემონსტრანტებს, ვინც ასამართლებს, ვინც ყალბ ჩვენებებს აძლევს, ვინც ყალბ საქმეებს კერავს, ვინც ამ დავალებებს გასცემს - ჩვენ ამის სრულ სიას ვადგენთ და ყველამ იცოდეს, რომ ვერავინ ვერ გაექცევა პასუხისმგებლობას. ამ ადამიანებისთვის სანქცირება - ზოგისთვის ფინანსური, ზოგისთვის სავიზო, რომ ვერ შეძლოს შესვლა დემოკრატიულ ქვეყნებში, სადაც ძალიან უნდათ ხოლმე წასვლა თავიანთ ოჯახის წევრებთან ერთად, ეს ცალსახად არის ჩვენი სამიზნე, ვინაიდან ეს არის იარაღი, რომელიც ასუსტებს მეორე მხარეს," - განაცხადა გიორგი ვაშაძემ.
