ვიღაც ხომ მოიძებნება „ნაციონალურ მოძრაობაში“, ვინც იტყვის, რომ ჩალაძის ეს განცხადება სისულელეაო, ეს თუ მართლა სერიოზულად ნათქვამია და არავინ გაემიჯნა, მაშინ ყოვლად დაუშვებელი განცხადებაა, – ასე უპასუხა „გირჩის“ წევრმა, სანდრო რაქვიაშვილმა საქართველოს პირველი არხის გადაცემის „აქტუალური შაბათი – მაკა ცინცაძესთან ერთად“ წამყვანის შეკითხვას, რამდენად შეიძლება, გიორგი ჩალაძის განცხადება, „თუ არ უნდათ, ქუჩაში ომი მიიღონ, მიხეილ სააკაშვილის საკითხი უნდა გადაწყდეს დადებითად. ეს არის მუქარა“ აღვიქვათ ანტიკონსტიტუციური ქმედებებისკენ მოწოდებად.
„არ მგონია, რომ გიორგი ჩალაძის განცხადება მართლა სერიოზული განცხადება იყო. „ნაციონალურ მოძრაობაში“ არჩევნები ჩაატარეს, რომელზეც თქვეს, დემოკრატიის სტანდარტიაო და ფარსი იყო; მერე მიხეილ სააკაშვილს გამოვუშვებთო და კომიკური რაღაც დააანონსეს, შტაბებს გავხსნითო. თურმე შტაბები აკლდა მიხეილ სააკაშვილის გათავისუფლებას. ბრიუსელშიც გავხსნით შტაბსო, თუ რაღაც ასეთიც თქვეს. ეს ყველაფერი იმდენად კომიკურად გამოჩნდა, რომ ახლა რაღაცნაირად ცდილობენ, ლეგიტიმაცია მოიპოვონ და ასეთ უაზრო განცხადებებს აკეთებენ. სულ მცირე, ვიღაც ხომ მოიძებნება „ნაციონალურ მოძრაობაში“, ვინც იტყვის, ეს სისულელეაო, რა დამოკიდებულებაც არ უნდა ჰქონდეთ ერთმანეთში? თუ ეს მართლა სერიოზულად ნათქვამია, სერიოზული განცხადებაა და არავინ გაემიჯნა, მაშინ ეს ყოვლად დაუშვებელი განცხადებაა“, – განაცხადა რაქვიაშვილმა.
