"ახლა კიევში, რუსული დარტყმის შემდეგ ჩვეულებრივი საცხოვრებელი კორპუსი ნანგრევებისგან იწმინდება. კიდევ ერთი მასშტაბური თავდასხმა ჩვენს ქალაქებსა და დასახლებულ პუნქტებზე. მეტი მკვლელობა. სამწუხაროდ, ცნობილია, რომ სულ მცირე რვა ადამიანი დაიღუპა, მათ შორის ერთი ბავშვია. ვუსამძიმრებ ყველა ნათესავსა და მეგობარს. შესაძლოა, ხალხი ჯერ კიდევ ნანგრევების ქვეშ იყოს. ათობით ადამიანი დაშავდა." - ამის შესახებ უკრაინის პრეზიდენტი ვოლოდიმირ ზელენსკი სოციალურ ქსელში წერს.
"დღეს ეს რუსული რაკეტები და სადესანტო დრონები არის ნათელი პასუხი ყველასთვის მსოფლიოში, ვინც კვირების და თვეების განმავლობაში მოუწოდებდა ცეცხლის შეწყვეტისა და რეალური დიპლომატიისკენ. რუსეთი ირჩევს ბალისტიკას და არა მოლაპარაკებების მაგიდას. ის ომის დასრულების ნაცვლად მკვლელობების გაგრძელებას ირჩევს. ეს კი ნიშნავს, რომ რუსეთს შედეგების ისევ არ ეშინია.
რუსეთი კვლავ სარგებლობს იმით, რომ მსოფლიოს მცირე ნაწილი თვალს ხუჭავს ბავშვების მკვლელობაზე და პუტინისთვის გასამართლებელ მიზეზებს ეძებს. ჩვენ ველოდებით ჩინეთის რეაქციას მიმდინარე მოვლენებზე. ჩინეთმა არაერთხელ მოუწოდა ცეცხლის შეწყვეტისკენ და თქვა რომ ომის გაფართოების აუცილებლობა არ არსებობს. ველოდებით უნგრეთის რეაქციას.
ბავშვების სიკვდილმა ნამდვილად უნდა გამოიწვიოს მეტი ემოცია, ვიდრე ნებისმიერმა სხვა რამემ. ჩვენ ველოდებით მსოფლიოში ყველას რეაქციას, ვინც მშვიდობისკენ მოწოდებებს აკეთებდა, მაგრამ ახლა უფრო ხშირად დუმს, ვიდრე პრინციპულ პოზიციას აფიქსირებს.და ახლა ნამდვილად დროა რუსეთის წინააღმდეგ ახალი მკაცრი სანქციების დაწესების - ყველა მისი ქმედების გამო. უკვე ყველა ვადა დარღვეულია, დიპლომატიის ათობით შესაძლებლობა ჩაშლილია. რუსეთმა პასუხისმგებლობა უნდა იგრძნოს ამ ომის ყოველი დარტყმისთვის, ყოველი დღისთვის. მარადიული ხსოვნა რუსეთის ყველა მსხვერპლს!“ - წერს უკრაინის პრეზიდენტი, ვოლოდიმირ ზელენსკი
