ზოგადად, წყლის სექტორი საკმაოდ პრობლემატურია, იქიდან გამომდინარე, რომ სამუშაოები საკმაოდ შრომატევადია და გარდა შრომისა და დროისა, რაც ამას სჭირდება, ასევე მნიშვნელოვანია იმ სპეციფიკური კადრების არსებობა, რომლებიც უნდა იყოს როგორც სამშენებლო სექტორში და პროექტირების ნაწილში, ასევე მომსახურების ნაწილში, - განაცხადა რეგიონული განვითარებისა და ინფრასტრუქტურის მინისტრის მოადგილე მზია გიორგობიანმა გადაცემაში „ღია ეთერი“. მან ამ მხრივ მიმდინარე და დაგეგმილ პროექტებზე ისაუბრა.
„ამ ეტაპისთვის, უშუალოდ სამუშაოები დაახლოებით 150 სოფელსა და ქალაქში მიმდინარეობს. ასევე, დაგეგმილი გვაქვს კანალიზაციის სისტემების მოწესრიგება. გორში ასევე არის დაგეგმილი წყლისა და კანალიზაციის სისტემების სრულად მოწესრიგება შესაბამისი გამწმენდი ნაგებობით. ასევე, მიმდინარე პერიოდში მომზადებულია უკვე 50 სოფლამდე, პროექტირებები რომ გამოცხადდეს სოფლის წყლის მოწესრიგება და ასევე დაგეგმილი გვაქვს, რომ უახლოეს მომავალში გამოცხადდება დაახლოებით 50 სოფელში პროექტირება, 50 სოფლისთვის კი უკვე სატენდერო სამუშაოებს დავიწყებთ“, - აღნიშნა გიორგობიანმა.
მისივე თქმით, კანალიზაციების სისტემების მიმართულებით, სახელმწიფო ბიუჯეტისა და საერთაშორისო დონორების (მსოფლიო ბანკი, AFD, ADB) დაფინანსებით, შესაბამისი პროექტები პირველ ეტაპზე 12 დასახლებაში განხორციელდება, მოგვიანებით კი მთელ ქვეყანასა და ტურისტულ ზონებს მოიცავს.
