საქართველოს ინფრასტრუქტურის სამინისტროს მუნიციპალური განვითარების ფონდმა თბილისის სახელმწიფო საკონცერტო დარბაზის – ფილარმონიის რეაბილიტაციისთვის დეტალური საპროექტო-სახარჯთაღრიცხვო დოკუმენტაციის მოსამზადებლდა ბაზრის კვლევა გამოაცხადა.
ინფრასტრუქტურის სამინისტროს ცნობით, პროექტის მიზანია კულტურული მემკვიდრეობის უძრავი ძეგლის სტატუსის მქონე უნიკალური შენობის სრული რეაბილიტაცია და მისი ადაპტაცია თანამედროვე მოთხოვნებსა და საერთაშორისო სტანდარტებთან.
„სამუშაოების ფარგლებში შენარჩუნდება ფილარმონიის პირვანდელი არქიტექტურული იერსახე, ინტეგრირდება თანამედროვე საინჟინრო და ტექნოლოგიური სისტემები, რაც მნიშვნელოვნად გააუმჯობესებს საკონცერტო დარბაზის ფუნქციონირებას.
რეაბილიტაციის დასრულების შემდეგ, ფილარმონია იქნება თანამედროვე, მრავალფუნქციური კულტურული სივრცე, რომელიც შესაძლებლობას მისცემს თბილისს უმასპინძლოს მაღალი დონის კონცერტებს, კულტურულ და საგანმანათლებლო ღონისძიებებს, გამოფენებსა და საერთაშორისო ფესტივალებს.
პროექტის მომზადების პროცესი ცხრა თვეში დასრულდება, რის შემდეგაც დაიწყება უშუალო სამშენებლო და რეაბილიტაციის ეტაპი.
დეტალური ინფორმაცია გამოცხადებული ბაზრის კვლევის შესახებ ხელმისაწვდომია სახელმწიფო შესყიდვების სააგენტოს ელექტრონულ სისტემაში: mdf.org.ge“, – აღნიშნულია ინფორმაციაში.
