ვიქტორ ორბანმა და ირაკლი კობახიძემ განიხილეს უნგრულ-ქართული ეკონომიკური და სავაჭრო კავშირები, იმსჯელეს თანამშრომლობის კიდევ უფრო გაღრმავების გზებზე, – ამის შესახებ უნგრეთის პრემიერ-მინისტრის ოფისის პრესსპიკერმა, ზოლტან კოვაჩმა სოციალურ ქსელში დაწერა.
როგორც კოვაჩმა აღნიშნა, ირაკლი კობახიძისა და ვიქტორ ორბანის შეხვედრა ასევე ემსახურებოდა ივნისში დაგეგმილი უნგრეთ-საქართველოს მთავრობათაშორის სამიტისთვის მზადებას.
„პრემიერ-მინისტრმა ვიქტორ ორბანმა დღეს ბუდაპეშტში მოლაპარაკებები გამართა საქართველოს პრემიერ-მინისტრ ირაკლი კობახიძესთან. ორმა ლიდერმა განიხილა უნგრულ-ქართული ეკონომიკური და სავაჭრო კავშირები, იმსჯელეს თანამშრომლობის კიდევ უფრო გაღრმავების გზებზე. ეს შეხვედრა ასევე ემსახურებოდა უნგრეთში ივნისში დაგეგმილი უნგრეთ-საქართველოს მთავრობათაშორის სამიტისთვის მზადებას, რომლის მიზანია სტრატეგიული ორმხრივი ურთიერთობების გაძლიერება. პრემიერ-მინისტრი კობახიძე ასევე სიტყვით გამოვა კონსერვატიული პოლიტიკური მოქმედების კონფერენციაზე, რომელიც ბუდაპეშტში 29-30 მაისს გაიმართება“, – წერს უნგრეთის პრემიერ-მინისტრის ოფისის პრესსპიკერი ზოლტან კოვაჩი.
ცნობისთვის, საქართველოს პრემიერ-მინისტრი ირაკლი კობახიძე ბუდაპეშტში კონსერვატიული პოლიტიკური მოქმედების კონფერენციაში მიიღებს მონაწილეობას და სიტყვით გამოვა.
