თავად კონგრესის პრესტიჟის საკითხია, არ მიიღონ ქართველი ხალხის მიმართ მტრული აქტი, იმ ხალხისა, რომელმაც, ამერიკელებთან ერთად, რჩეული ვაჟკაცები შესწირა ავღანეთში ომს, – ამის შესახებ პარლამენტის თავმჯდომარემ, შალვა პაპუაშვილმა განაცხადა.
მისივე თქმით, თუ აშშ-ის კონგრესი „მეგობარ აქტს“ არ მიიღებს, მათთვის უკეთესი იქნება.
„ეს, უპირველეს ყოვლისა, თავად კონგრესის პრესტიჟის საკითხია, რომ არ მიიღონ ქართველი ხალხის მიმართ მტრული აქტი. ასე რომ, თუ არ მიიღებენ, მათთვის უკეთესი. საერთო ჯამში, ეს არის თავად აშშ-ის და კონგრესის პრესტიჟის საკითხი, რომ არ მიიღონ ქართველი ხალხის მიმართ მტრული აქტი. იმ ხალხის მიმართ, რომელმაც 30-ზე მეტი რჩეული ვაჟკაცი შესწირა, ამერიკელ ჯარისკაცებთან ერთად, ავღანეთში ომს. როდესაც ნატო-ს წევრი ქვეყნების უმრავლესობა იმალებოდა ან თავის ქვეყანაში, ან შტაბში, ჩვენი, ქართველი ხალხი გაჰყვა მათ ამ ომში და ამ ხალხის წინააღმდეგ მტრული აქტის მიღება, უპირველეს ყოვლისა, კონგრესის პრესტიჟს დაარტყამს“, – განაცხადა შალვა პაპუაშვილმა.
ცნობისთვის, დემოკრატმა კონგრესმენმა, სტივ კოენმა ჰელსინკის კომისიაში განაცხადა: „სამწუხაროა, რომ სენატმა არ მიიღო და არ მიიღებენ „მეგობარი აქტს“, რაღაც პრობლემები იყო და შესაძლოა, ეს დაკავშირებული იყოს ერთ კონკრეტულ დიდ ბიზნესთან, რომელიც პორტს უკავშირდება. „მეგობარი აქტის“ ჩაკვლა ერთმა ადამიანმა შეძლო“.
