2023 წლის გლობალური კორუფციის ინდექსის მიხედვით, საქართველო გასულ წელთან შედარებით ორი ადგილით დაწინაურდა და რეგიონში ერთადერთი ქვეყანაა კორუფციის დაბალი ინდექსით, – ამის შესახებ საქართველოს პარლამენტის თავმჯდომარე შალვა პაპუაშვილი სოციალურ ქსელში წერს.
„2023 წლის გლობალური კორუფციის ინდექსი კიდევ ერთხელ ცხადყოფს ევროკომისიის რეკომენდაციის სისწორეს, რომ საქართველო იმსახურებს კანდიდატის სტატუსს და ხაზს უსვამს საქართველოში კორუფციის წინააღმდეგ ბრძოლის შედეგებს. საერთაშორისო რეიტინგის მიხედვით, საქართველო, გასულ წელთან შედარებით, ორი ადგილით დაწინაურდა, იკავებს 43-ე ადგილს და რეგიონში ერთადერთი ქვეყანაა კორუფციის დაბალი ინდექსით“, – წერს პაპუაშვილი.
შვეიცარიული ორგანიზაცია Global Risk Profile-ის (GRP) მიერ გამოქვეყნებული „გლობალური კორუფციის ინდექსი 2023“-ის მიხედვით, საქართველომ „კორუფციის დაბალი დონის“ სტატუსი მიიღო და რეგიონში ლიდერია.
