„ქალბატონი კელი დეგნანის განცხადებები ხშირად რეალობას აცდენილია და სიტუაციას ადეკვატურად ვერ პასუხობს“ - ამის შესახებ გადაცემა „პოლიტიკურ პოსტში“ „ხალხის ძალის“ წევრმა და დეპუტატმა ეკა სეფაშვილმა განაცხადა.
მისი თქმით, აშშ-ის ელჩისგან არც ისე პროფესიონალური და არადიპლომატიური განცხადებები უკვე ჩვეულებრივ მოვლენად აღიქმება.
„იგივე, ანსამბლ „მართვეს“ შემთხვევაში, როდესაც საქმე ეხებოდა 50 არასრულწლოვანისთვის ვიზების გაცემას, კელი დეგნანი ზოგადი პასუხით შემოიფარგლა, მაშინ, როდესაც, უფრო კომპეტენტური პასუხის გაცემა შეეძლო. სულ მცირე, ის მაინც შეეძლო ეთქვა, რომ ამ საკითხს მოიძიებდა და შეისწავლიდა.
მაგრამ, მსგავსი ტიპის განცხადებებს კელი დეგნანისგან ხშირად ვისმენთ. მაგალითად, მაშინ, როდესაც გვაფრთხილებს, რომ საქართველომ სანქციები არ დაარღვიოს რუსეთთან პირდაპირი ფრენების გამო, რაზეც აღმასრულებელმა ხელისუფლებამ არაერთხელ განაცხადა, რომ ფრენები მხოლოდ არასანქცირებული თვითმფრინავებითა და კომპანიებით შესრულდება. იგივე, როცა რუსეთმა სავიზო რეჟიმი მოხსნა საქართველოსთან, კელი დეგნანი გამოვიდა და დაგვმოძღვრა, რომ თურმე ჩვენთვის ნომერ პირველი ამოცანა დეოკუპაცია უნდა იყოს. მის გარეშეც ძალიან კარგად ვიცით, რომ ეს ნომერ პირველი ამოცანაა, მაგრამ ჩვენი ძალებით რაც შეგვიძლია, არის ის, რომ მშვიდობიანი, ნდობის პოლიტიკის განხორციელებით აღვადგინოთ ტერიტორიული მთლიანობა. თუ რამე შეუძლია აშშ-ს, დაგვეხმაროს, ჩვენ წინააღმდეგნი არ ვართ.
ან იგივე, როდესაც „გვასწავლის“, რომ ეს ფრენები ტექნიკური უსაფრთხოების დაცვით უნდა შესრულდესო - ეს ხომ ისედაც ყველამ ვიცით? ასე რომ, ცოტა არ იყოს, მთლად პროფესიონალური და დიპლომატიური პასუხები არ ისმის ხოლმე კელი დეგნანისგან და ამას ყველა შეჩვეულები ვართ.“, - განაცხადა ეკა სეფაშვილმა.
