„უკვე მერამდენედ, დიპლომატიური კორპუსის წარმომადგენლები უხეშად ერევიან საქართველოს შიდა საქმეებში“, - ასე ეხმაურება, „ხალხის ძალის“ ერთ-ერთი ლიდერი დიმიტრი ხუნდაძე, დანიის ელჩის მხრიდან ბიძინა ივანიშვილის ოლიგარქად მოხსენიებას სოციალურ ქსელში.
ხუნდაძის თქმით, კარგი იქნება თუ, საქართველოს პარტნიორი სახელმწიფოები მეტი პასუხისმგებლობით მოეკიდებიან ელჩების კანდიდატების შერჩევას და ადგილი აღარ ექნება დიპლომატის მხრიდან საქართველოს შიდა პოლიტიკურ საქმეებში ჩარევას. „უკვე მერამდენედ, დიპლომატიური კორპუსის წარმომადგენლები უხეშად ერევიან საქართველოს შიდა საქმეებში. უმთავრესი დარღვევა ის არის, რომ დიპლომატი პოლიტიკურ განცხადებებს აკეთებს. დიპლომატის გაპოლიტიკოსების მაგალითი გვქონდა გასულ წლებში ერთ-ერთი პარტნიორი სახელმწიფოს ელჩისგან და გვჯეროდა, რომ მსგავს შეცდომას სხვა აღარ დაუშვებდა.
მივმართავთ ჩვენს პარტნიორ სახელმწიფოებს, კარგად აუხსნან მათ ელჩებს დიპლომატის ფუნქციები და უფლება-მოვალეობები. მაგრამ, როგორც ჩანს, აქ საქმე მიზანმიმართულ ქმედებასთან გვაქვს, რომ კიდევ ერთხელ უცხო ძალის დახმარებით ქართულ ოპოზიციას როგორმე სული ჩაბერონ.
ბიძინა ივანიშვილი არის მმართველი პარტიის საპატიო თავმჯდომარე და მისი ოლიგარქად მოხსენიება უდიდესი შეურაცხყოფაა არა მარტო ივანიშვილის, არამედ, მთლიანად სახელისუფლებო გუნდის. შეურაცხყოფაა ასევე ხალხის, რომელმაც მმართველი გუნდი აირჩია. როგორც ჩანს, დანიის ელჩს ახსნა სჭირდება, თუ რას ნიშნავს ოლიგარქი და მაგალითისთვის ვთხოვთ, „ნაცმოძრაობის“ დამფინანსებლის, კეზერაშვილის ქეისი კარგად შეისწავლოს.
მიუხედავად წარსულის შეცდომის განმეორებისა უცხოელი ელჩების მხრიდან, მაინც იმედს ვიტოვებთ, რომ ჩვენი პარტნიორი სახელმწიფოები მეტი პასუხისმგებლობით მოეკიდებიან ელჩების კანდიდატების შერჩევას და ადგილი აღარ ექნება დიპლომატის მხრიდან საქართველოს შიდა პოლიტიკურ საქმეებში ჩარევას“, - წერს ხუნდაძე.
ცნობისთვის, საქართველოში დანიის ელჩმა, ანე ტოფტ სორენსენმა ბიძინა ივანიშვილს ოლიგარქი უწოდა და აღნიშნა, რომ "ქართული ოცნების" დამფუძნებელმა ქონება 90-იან წლებში რუსეთში დააგროვა. ელჩი ამის შესახებ დანიურ გამოცემაში გამოქვეყნებულ OP-ED-ში საუბრობს.
"ქართული ოცნების" პარტია, რომელიც ოლიგარქმა ბიძინა ივანიშვილმა დააფუძნა, რომელმაც ქონება 1990-იან წლებში რუსეთში დააგროვა, ძალაუფლებას 2012 წლის შემდეგ ინარჩუნებს. ოპოზიცია, რომელსაც მიხეილ სააკაშვილის "ერთიანი ნაციონალური მოძრაობა" ხელმძღვანელობს, განუწყვეტლივ ბოიკოტს უცხადებს საპარლამენტო საქმიანობას და ხელისუფლებას სასამართლოს პოლიტიზებაში, თავისუფალ მედიის გაჩუმებასა და ოპოზიციის წევრებზე ძალადობაში ადანაშაულებს", - წერს დანიის ელჩი.
