განათლებისა და მეცნიერების სამინისტროს საქმიანობაზე არის მეტწილად დამოკიდებული ჩვენი ქვეყნის მომავალი. ეს არის სფერო, რომელიც დაკავშირებულია როგორც ქვეყნის მომავალ ეკონომიკასთან, განვითარებასთან, ისე პირდაპირ იმასთან, თუ სად იქნება ხვალ საქართველო, რა ადგილი ექნება მას ხვალინდელ მსოფლიოში, – ამის შესახებ პარლამენტის თავმჯდომარის მოადგილემ, არჩილ თალაკვაძემ პლენარულ სხდომაზე განაცხადა, სადაც „მინისტრის საათის“ ფორმატში, განათლების, მეცნიერებისა და ახალგაზრდობის მინისტრს, გიორგი ამილახვარს მოუსმინეს.
როგორც არჩილ თალაკვაძემ აღნიშნა, რომ მინისტრს აქვს საპარლამენტო გუნდის სრული პოლიტიკური მხარდაჭერა იმ რეფორმებისა და პრიორიტეტების განხორციელებაში, რომელიც განათლების ხარისხს, მის ხელმისაწვდომობასა და თანასწორობას ეხება.
მისი თქმით, თითოეული ოჯახისა და ყველა მშობლის ოცნებაა, რომ შვილებს ხარისხიანი, თანამედროვე, კონკურენტული განათლება მისცეს და ხელისუფლება სწორედ ამ მიზნის განხორციელებაში დგას მოქალაქეების, საზოგადოებისა და თითოეული ოჯახის გვერდით.
„საქართველო, ქართული საზოგადოება, ყოველთვის გამოირჩეოდა განათლების მიმართ სწრაფვით, ვინაიდან ყოველთვის გვჯეროდა და დღესაც გჯერა, რომ სიღარიბის დაძლევის საუკეთესო, ყველაზე ეფექტიანი, წარმატებული გზა არის თანამედროვე და ხარისხიანი განათლების მიღება. ყოველთვის გვჯეროდა, რომ საქართველო ევროპულ ოჯახში დაბრუნდება მაშინ, როდესაც ჩვენ გვეყოლება განათლებული საზოგადოება და როდესაც ჩვენი წინაპრების ოცნება და სწრაფვა – განათლების სისტემის სრულყოფისკენ მიაღწევს იმ დონეს, როდესაც საქართველოს მოქალაქე ცოდნით გახდება კონკურენტული ევროკავშირის მოქალაქესთან. სწორედ ამ ოცნების, ამ მიზნისა და გეგმის განხორციელების პროცესში არის დღეს განათლების სამინისტრო, მინისტრი და მთელი პოლიტიკური გუნდი“, – განაცხადა არჩილ თალაკვაძემ.
