შეერთებული შტატების მედიის ცნობით, ფედერალური ოლქის სააპელაციო სასამართლომ პრეზიდენტ დონალდ ტრამპის მიერ შემოღებული საბაჟო ტარიფების უმეტესობის უკანონობა დაადგინა, რაც მისი აგრესიული სავაჭრო პოლიტიკის არსს გამანადგურებელ დარტყმას აყენებს.
ფედერალური ოლქის სააპელაციო სასამართლოს პარასკევის გადაწყვეტილება ტრამპის ადმინისტრაციისთვის ზედიზედ მეორე მარცხია VOS Selections ტრამპის წინააღმდეგ სახელით ცნობილ მნიშვნელოვან საქმეში.
ფედერალური ოლქის სააპელაციო სასამართლოს შვიდი ხმით ოთხის წინააღმდეგ მიღებულ გადაწყვეტილებაში ნათქვამია, რომ კანონი, რომელსაც ტრამპი ყველაზე მაღალი ტარიფების დაწესებისას მოიხსენიებდა, რეალურად არ აძლევდა მას მათი დაწესების უფლებამოსილებას.
კონსტიტუციის შესაბამისად, გადასახადების, როგორიცაა ტარიფები, დაწესების უფლებამოსილება აქვს მხოლოდ ხელისუფლების საკანონმდებლო შტოს. „ტარიფები კონგრესის ძირითადი უფლებამოსილებაა“ დაადგინა სასამართლომ.
ამასთან, სააპელაციო სასამართლომ გადაწყვეტილების ძალაში შესვლის თარიღად 14 ოქტომბერი გამოაცხადა და ამგვარად ტრამპის ადმინისტრაციას მისცა დრო, რათა მან უზენაეს სასამართლოს გადაწყვეტილების გაუქმება სთხოვოს.
პარასკევს, მოგვიანებით, ტრამპმა სააპელაციო სასამართლო გააკრიტიკა და განაცხადა, რომ უზენაესი სასამართლო საქმეს მის სასარგებლოდ გადაწყვეტს.
„თუ ეს ტარიფები ოდესმე გაუქმდება, ეს ამ ქვეყნისთვის სრული კატასტროფა იქნება“; „თუ ეს გადაწყვეტილება ძალაში დარჩება, ის ფაქტობრივად გაანადგურებს ამერიკის შეერთებულ შტატებს“- დაწერა ტრამპმა Truth Social-ზე გამოქვეყნებულ პოსტში.
„პრეზიდენტის ტარიფები ძალაში რჩება და ჩვენ მოუთმენლად ველით საბოლოო გამარჯვებას ამ საკითხთან დაკავშირებით“, - განაცხადა თეთრი სახლის პრესმდივანმა კუშ დესაიმ.
ტრამპის ადმინისტრაცია ამტკიცებს, რომ საერთაშორისო საგანგებო ეკონომიკური უფლებამოსილებების შესახებ კანონის თანახმად, პრეზიდენტი უფლებამოსილია ცალკეულ ქვეყნებს ტარიფები დაუწესოს ნებისმიერ დონეზე, რომელსაც ის საჭიროდ მიიჩნევს ეროვნული საგანგებო სიტუაციის მოსაგვარებლად.
