დიდი ბრიტანეთის პრემიერ-მინისტრმა რიში სუნაკმა იაპონიაში, ჰიროსიმაში, G7-ის სამიტის ბოლოს ჩინეთი გლობალური უსაფრთხოების ყველაზე დიდ გამოწვევად გამოაცხადა. ამის შესახებ Politico წერს.
"ჩინეთი ჩვენი ეპოქის უდიდეს გამოწვევას წარმოადგენს გლობალური უსაფრთხოებისა და კეთილდღეობისთვის", - განუცხადა სუნაკმა ჟურნალისტებს G7-ის შეხვედრაზე. "ისინი სულ უფრო ავტორიტარულები არიან სახლში და ხისტი საზღვარგარეთ."
"ჩვენ ერთად ვიმუშავებთ, G7 და სხვა ქვეყნები, რათა დავრწმუნდეთ, რომ შევძლებთ საკუთარი თავის და მიწოდების ჯაჭვების დაუცველობის თავიდან აცილებას და გადავდგამთ საჭირო ნაბიჯებს მტრული ინვესტიციებისგან თავის დასაცავად ისე, რომ ერთმანეთი არ დავაზიანოთ", - თქვა სუნაკმა.
G7-ის ლიდერებმა პეკინის მიმართ მკაცრი განცხადება გაავრცელეს, რომელშიც ისინი შეთანხმდნენ კრიტიკული მინერალების წყაროების დივერსიფიკაციაზე და ახალი საკოორდინაციო პლატფორმის შექმნაზე ეკონომიკური იძულების წინააღმდეგ საბრძოლველად. მათ ასევე დაგმეს სამხრეთ ჩინეთის ზღვაში სტატუს-კვოს შეცვლის მცდელობები.
ამას კრიტიკულად უპასუხა ჩინეთის საგარეო საქმეთა სამინისტროს სპიკერმა, რომელმაც G7-ის ქვეყნები ჩინეთის შიდა საქმეებში ჩარევაში დაადანაშაულა.
