აშშ-ს პრეზიდენტი დონალდ ტრამპი აცხადებს, რომ რუსეთის პრეზიდენტი ვლადიმერ პუტინი ალასკაში ჩავა ომის საკითხზე სასაუბროდ.
„მე ვფიქრობ, დასაფასებელია, რომ რუსეთის პრეზიდენტი მოდის ჩვენს ქვეყანაში, ნაცვლად იმისა, რომ ჩვენ წავიდეთ მის ქვეყანაში ან მესამე მხარის ადგილას“, – აღნიშნა ტრამპმა.
მისი თქმით, უკრაინაში ომი არასდროს მოხდებოდა, ის რომ ყოფილიყო პრეზიდენტი.
„ეს ომია, რომელიც არ უნდა მომხდარიყო ან არ მოხდებოდა, მე რომ ვყოფილიყავი პრეზიდენტი. მე არ ვყოფილვარ რუსეთის მეგობარი, მაგრამ მე ყოველთვის კარგი ურთიერთობა მქონდა ვლადიმერ პუტინთან. ყოველთვის კარგია, რომ სხვა ქვეყნებსაც შეგიძლია, კარგად უგებდე, მაგრამ ეს არ ნიშნავს, რომ უნდა დანებდე, როგორც ეს ბაიდენმა გააკეთა. ამბობდნენ, რომ მე არ ვიყავი მკაცრი რუსეთის მიმართ. მე ყველაზე მკაცრი ვიყავი. მე შევაჩერე უდიდესი ეკონომიკური განვითარება („ნორდ სტრიმ 2“-ის მილსადენის პროექტი) და უდიდესი სამუშაო, რაც რუსეთმა დაიწყო“, – აღნიშნავს ტრამპი.
დონალდ ტრამპმა ისაუბრა ვლადიმერ პუტინის მიმართ არსებული უკმაყოფილების შესახებაც.
„პრეზიდენტმა პუტინმა შემომთავაზა მოლაპარაკებებში ჩართვა. მე მჯერა, რომ მას სურს ამ საქმის დასრულება. ეს რამდენჯერმე ვთქვი, რომ იმედგაცრუებული ვარ, რადგან მასთან შესანიშნავი საუბარი მქონდა და შემდეგ რაკეტები გაისროლეს კიევში ან სხვა მიმართულებით. მე ვაპირებ ვლადიმერ პუტინთან საუბარს და ვეტყვი, რომ მან უნდა დაასრულოს ეს ომი. ვფიქრობ, რომ კონსტრუქციული საუბრები გვექნება და შეხვედრის შემდეგ, დაუყოვნებლივ შეიძლება, გაფრენისას ან ოთახიდან გამოსვლის შემდეგ, დავურეკო ევროპელ ლიდერებს, რომლებთანაც კარგი ურთიერთობა მაქვს. მე კარგი ურთიერთობა მაქვს ზელენსკისთანაც, მაგრამ არ ვეთანხმები, რაც მან გააკეთა. ეს ომი არასდროს არ უნდა მომხდარიყო. შემდეგი შეხვედრა ზელნესკისა და პუტინს შორის იქნება. მეც იქ ვიქნები, თუ ენდომებათ. მინდა, რომ ორ ლიდერს შორის შეხვედრა დაინიშნოს. ცოტა შემაწუხა იმ ფაქტმა, რომ ზელენსკი ამბობდა: „მე კონსტიტუციური თანხმობა უნდა მივიღო“. მას ომის დაწყების თანხმობა ჰქონდა ყველას მოკვლისთვის, მაგრამ მიწების გაცვლისთვის თანხმობა სჭირდება. იქნება ტერიტორიების გაცვლა, ეს ვიცი რუსეთისგან, ყველასთან საუბრისგან გამომდინარე. მიწების გაცვლა უკრაინის საკეთილდღეოდ მოხდება. ასევე, ზოგიერთი ცუდი რამ იქნება ორივესთვის. არის კარგიც და ცუდიც. ეს ძალიან რთულია, რადგან არსებობს ძალიან არაზუსტი ხაზები და იქნება გარკვეული ცვლილებები. მიწებში იქნება გარკვეული ცვლილებები. ჩვენ ვაპირებთ, შევცვალოთ საბროძოლო ხაზები. რუსეთმა დაიკავა უკრაინის დიდი ნაწილი. მათ დაიკავეს მნიშვნელოვანი ტერიტორია. ჩვენ ვეცდებით, რომ დავიბრუნოთ ამ ტერიტორიის ნაწილი უკრაინისთვის. რუსეთს აქვს ოკუპირებული ძალიან მნიშვბელოვანი ტერიტორიები. თუ გაქვს ტბა, მდინარე ან ოკეანე – ეს ყოველთვის ყველაზე ღირებულია. უკრაინას ადრე ჰქონდა ათასი მილი სანაპირო ზოლი. ეს გაქრა. ერთი პატარა უბნის გარდა, ოდესა, პატარა უბანი, ცოტაოდენი წყალია დარჩენილი. ასე რომ, წავალ და ვნახავ სიტუაციას. შეიძლება, წამოვიდე და ვთქვა – წარმატებები და ეს იქნება დასასრული. შეიძლება, ვთქვა, რომ ეს არ მოგვარდება. არიან ისეთებიც, ვინც თვლის, რომ პუტინს მთელი უკრაინა სურდა, სხვათა შორის, მეც ერთ-ერთი მათგანი ვარ. ვფიქრობ, რომ მე რომ არა, ის სხვას არავისთან არ ისაუბრებდა. მაგრამ მე შევხვდები მას და ვნახავ, რა სიტუაციაა, დავურეკავ პრეზიდენტ ზელენსკისა და ევროპელ ლიდერებს შეხვედრის შემდეგ. ჩემზე არ არის დამოკიდებული გარიგების დადება“, – აღნიშნა ტრამპმა.
თარგმანი: პირველი არხი
