ბელარუსის მმართველმა ალექსანდრ ლუკაშენკომ, სისხლის სამართლის დანაშაულისთვის მსჯავრდადებულთა რიგი კატეგორიის ადამიანებისთვის, ამნისტიის შესახებ კანონს ხელი მოაწერა. დოკუმენტს ხელი ბელარუსის ნაცისტური ოკუპაციისგან განთავისუფლების 80 წლის იუბილესთან დაკავშირებით მოეწერა.
"საზოგადოებრივი შრომის, ჯარიმისგან, გარკვეული თანამდებობის დაკავების ან საქმიანობის უფლების ჩამორთმევის, გამოსასწორებელი შრომის, სამხედრო სამსახურის შეზღუდვის, დაპატიმრების, თავისუფლების შეზღუდვის, გარკვეული ვადით თავისუფლების აღკვეთის სასჯელისაგან გათავისუფლება, ასევე სისხლის სამართლის პასუხისმგებლობის სხვა ღონისძიებებისგან", - ნათქვამია დოკუმენტში.
კანონის თანახმად, ამნისტიას ექვემდებარება არასრულწლოვანები, ორსულები, ქალები და მარტოხელა მამაკაცები მცირეწლოვან შვილებთან ერთად (მათ გარდა, ვინც არასრულწლოვნის მიმართ დანაშაული განზრახ ჩაიდინა) და პირები, რომლებმაც საპენსიო ასაკს მიაღწიეს (ქალებისთვის 58 და მამაკაცებისთვის 63 წელი).
ამნისტია ასევე ეხება I და II ჯგუფის შეზღუდული შესაძლებლობის მქონე პირებს, ასევე ტუბერკულოზის გარკვეული ფორმების მქონე პაციენტებს, მეორე, მესამე და მეოთხე კლინიკური ჯგუფის ონკოლოგიურ პაციენტებს, მესამე და მეოთხე სტადიის მქონე აივ ინფიცირებულებს, ჩერნობილის ატომურ ელექტროსადგურზე მომხდარი კატასტროფისა და სხვა რადიაციული ავარიების შედეგად დაზარალებულებს, სამხედრო სამსახურის დროს დაშავებულებს, დასახიჩრებულებს ან დაავადებულებს.
