NATO-ს გენერალურმა მდივანმა მარკ რუტემ გერმანიას მოუწოდა, მნიშვნელოვნად გაზარდოს თავდაცვის ხარჯები და იარაღის წარმოება.
"გერმანიამ მეტი უნდა დახარჯოს და მეტი აწარმოოს," - თქვა რუტემ Bild-თან ინტერვიუში. "აშკარაა, რომ უახლოეს თვეებში ეს საკითხი ევროპის ბევრ ქვეყანაში განხილვის საგანი გახდება."
მან თავისი მოწოდება, სხვა საკითხებთან ერთად, რუსეთის საფრთხით ახსნა.
"მე გარკვევით გეუბნებით: ჩვენ უნდა მოვემზადოთ ომისთვის, ეს ომის თავიდან აცილების საუკეთესო საშუალებაა," - განმარტა რუტემ. "სახიფათოა არა მხოლოდ რუსეთთან არსებული სიტუაცია, ჩინეთი ასევე ზრდის სამხედრო შესაძლებლობებს."
ალიანსის გენერალურმა მდივანმა ხაზი გაუსვა გერმანიის მიერ უკრაინის სამხედრო დახმარებას. მან აღნიშნა, რომ "არც ერთი NATO-ს წევრი ევროპული სახელმწიფო არ უჭერს მხარს კიევს ისე, როგორც ამას ბერლინი აკეთებს."
"გერმანიის ეკონომიკის სიდიდის გათვალისწინებით, ჩვენ აშკარად გვინდა, რომ მან ბევრად მეტი გააკეთოს," - თქვა რუტემ და აღნიშნა გერმანიის "ფანტასტიკური სამხედრო საწარმოები და ინოვაციური პოტენციალი."
"ალიანსის მოკავშირეები უახლოეს თვეებში გადაწყვეტენ, ზუსტად რა თანხის ინვესტირება განახორციელონ თავდაცვაში. ერთ რამეში შემიძლია დაგარწმუნოთ: ეს იქნება 2%-ზე ბევრად, ბევრად, ბევრად მეტი," - განმარტა მან.
NATO-ს შემდეგი სამიტი ივნისში ჰააგაში გაიმართება.
