ვოლსკი: ზუგდიდის აქცია მიმართული იყო იმისკენ, რომ საზოგადოება დაპირისპირებოდა ერთმანეთს და სახელმწიფო სტრუქტურებს

ამის შესახებ პარლამენტის პირველმა ვიცე-სპიკერმა გია ვოლსკიმ ზუგდიდში “ნაციონალური მოძრაობის” მიერ ორგანიზებული აქციის შეფასებისას განაცხადა.

„ეს არ იყო ჰუმანიტარული აქცია. ეს აქცია მიმართული იყო იმისკენ, რომ საზოგადოება დაპირისპირებოდა ერთმანეთს, საზოგადოება, ვისაც ესმის, რომ ასეთი შეკრება არის კანონსაწინააღმდეგო და საფრთხის შემცველი. გარდა ამისა, ეს აქცია მიმართული იყო ასევე იმისკენ, რომ  შეკრებილი საზოგადოება დაპირისპირებოდა სახელმწიფო სტრუქტურებს. ეს იყო აქციის მიზანი“, –  განაცხადა გია ვოლსკიმ.

მისივე თქმით, ეს მიზანი აშკარად გამოჩნდა, თუნდაც, მიხეილ  სააკაშვილის განცხადებებიდან, რომელიც, ერთი მხრივ, საზოგადოებას მოუწოდებს კონსოლიდაციისკენ, ხოლო მეორე მხრივ, ამ მიმართულებას და ამ იდეას თავად უპირისპირდება კონკრეტული საქმიანობით.

„ვფიქრობ, რომ სწორედ ამ კუთხით უნდა შეაფასოსო საზოგადოებამ ის, რაც ზუგდიდში მოხდა და შესაბამისი დასკვნები გამოიტანოს“, – განაცხადა გიორგი ვოლსკიმ.

მისივე შეფასებით, „ნაციონალური მოძრაობამ ზუგდიდში თავის მიზანს ვერ მიაღწია, რადგან საზოგადოება აანალიზებს მიმდინარე პროცესებს.

„როდესაც საზოგადოების დიდი მასა, თუნდაც 200- 300 ადამიანი იკრიბება და აწყობს, გარკვეული გარემოებებიდან გამომდინარე, ზედახორას, რასაკვირველია, სამართალდამცავების საქმიანობა საკმაოდ ძნელდება. სწორედ ეს იყო მიზანი, რომელსაც „ნაციონალური მოძრაობა“ მიყვებოდა და თავის მიზანს ვერ მიაღწია იმდენად, რამდენადაც საზოგადოება, რომელიც ამ ყველაფერს უყურებს და პროცესებს აანალიზებს არ არის ის, რაზედაც მოგვითხრობდა სააკაშვილი თავის ერთ-ერთ გამოსვლაში, რომ კულტურა, თითქოსდა, მან შემოიტანა საქართველოში, აღარ არის ეს დრო. მე ვფიქრობ, პოლიტიკური მკვდრეთიდან აღდგომის ეს მცდელობა არის უზნეო და ამავე დროს უშედეგობისთვის განწირული“, – განაცხადა გია ვოლსკიმ.

პარლამენტის თავმჯდომარის პირველმა მოადგილემ, ასევე აღნიშნა, რომ ჰუმანიტარული აქცია არ გაიზომება მოცულობით.

„მცირე რაოდენობის პირბადეების და  სადეზინფექციო საშუალებების  დარიგებაზე არ შეიძლება ვთქვათ, რომ ეს არაფერს ნიშნავს და არაფერი გაკეთებულა. ჰუმანიტარული აქცია მისი მცირე მოცულობის გამო არ უნდა დავაკნინოთ,“ – განაცხადა გია ვოლსკიმ.​

შეგახსენებთ: დღეს ზუგდიდში „ნაციონალური მოძრაობის“ ორგანიზებით, ადგილობრივ მოსახლეობას ქვეყნის ყოფილი პრეზიდენტის, მიხეილ სააკაშვილის სახელით პირბადეები დაურიგეს. აქციას ათობით მოქალაქე დაესწრო, რამაც საგანგებო რეჟიმის ფარგლებში მოქმედი წესები დაარღვია.

 

მსგავსი სიახლეები
კომენტარები
იტვირთება...

ეს ვებ – გვერდი იყენებს cookie– ს თქვენი გამოცდილების გასაუმჯობესებლად. ვეთანხმები დეტალურად