“ველოდით, რომ გიორგი ვაშაძე ბოდიშს მაინც მოიხდიდა” – ინტერვიუ გია ბარამიძესთან

თბილისში ოპოზიციის მხრიდან ძლივს მიღწეული საერთო ოპოზიციური შეთანხმება კითხვის ნიშნის ქვეშ დგება. ყოველ შემთხვევაში ერთ ოლქში კორექტირება უკვე შევიდა და „ნაციონალურმა მოძრაობამ“ საერთო ოპოზიციურ კანდიდატს საკუთარი კანდიდატი ხატია დეკანოიძე დაუყენა, რომელიც გიორგი ვაშაძეს დაუპირისპირდება. გარკვეული ოპოზიციური ძალები „ნაცმოძრაობას“ შეთანხმების დარღვევაში ადანაშაულებს. თავად „ნაციონალური მოძრაობა“ კი შეთანხმების დარღვევაში გიორგი ვაშაძესა და მის ბლოკს სდებს ბრალს.

ვინ არღვევს შეთანხმებას და რა პროცესები გველოდება ოპოზიციის ირგვლივ? – ამ და სხვა აქტუალურ საკითხებზე „აიპრესთან“ ინტერვიუში „ნაციონალური მოძრაობის“ ერთ-ერთი ლიდერი გია ბარამიძე საუბრობს:

_ ისნის მაჟორიტარობის კანდიდატად დაასახელეთ ხატია დეკანოიძე. ამით ხომ არ დაარღვიეთ საერთო ოპოზიციური შეთანხმება?

_ რა თქმა უნდა არა. ოპოზიციური შეთანხმება დაარღვია გიორგი ვაშაძემ, როდესაც შეუთანხმებლად დააყენა თაკო ჩარკვიანის კანდიდატურა.

_ თუმცა, მას არ დაუყენებია კანდიდატურა „ნაციონალური მოძრაობის“ კანდიდატის წინააღმდეგ.

_ რა მნიშვნელობა აქვს ვის წინააღმდეგ დააყენა. საბურთალოზე არის დასახელებული კანდიდატი, რომელიც შერჩეულია საერთო ოპოზიციური ერთობის მიერ და ეს არის ირაკლი ოქრუაშვილის კანდიდატურა.

_ თქვენც არ დაგიჭერიათ ირაკლი ოქრუაშვილისთვის მხარი.

_ მაგრამ არც დაგვიყენებია კანდიდატურა.

_ საინტერესოა საკითხია ესეც, რატომ არ დაუჭირეთ მას მხარი?

_ ეგ სხვა საკითხია. მე სხვა რამეზე გესაუბრებით.

_ კი ბატონო, მაგრამ ეს კითხვაც გამიჩნდა და თუ შეიძლება მიპასუხეთ.

_ არა, ამის შემდეგ გადავიდეთ მაგ კითხვაზე.

დამეთანხმეთ, რომ სიმართლეს გეუბნებით, რომ გიორგი ვაშაძის პარტიამ დაარღვია შეთანხმება, როდესაც დააყენა ქალბატონი თაკო ჩარკვიანის კანდიდატურა. მე მას პიროვნულად პატივს ვცემ და ვუდასტურებ ჩემ პატივისცემას. მან დააყენა საბურთალოზე კანდიდატურა იმ დროს, როდესაც ოპოზიციის ის ფრთა, რომელიც შალვა ნათელაშვილის პარტიის ოფისში იკრიბება ჰყავს დაყენებული კანდიდატურა. ხომ არის ეს დარღვევა?!

შესაბამისად გიორგი ვაშაძემ დაარღვია ეს შეთანხმებაც და გარდა ამისა ისიც იცით, რომ როდესაც გიორგი ვაშაძე დაასახელა ოპოზიციურმა ერთობამ, მაშინ ის იყო „ძალა ერთობაშია“-ს წევრი და უნდა გამოსულიყო ხუთი ნომრით, ჩვენი ერთობლივი ბლოკის „ძალა ერთობაშია“-ს ნომრით. ამის შემდეგ გავიდა გიორგი ვაშაძე ამ გაერთიანებიდან, მაგრამ დაიტოვა უფლება, რომ დარჩენილიყო საერთო კანდიდატად. იქაც დაარღვიო შეთანხმება, საბურთალოზეც დაარღვიო, დადგე ხუთი ნომრით და მერე გახვიდე და მერე ისევ მოინდომო, რომ დაიტოვო ეს უფლება, ეს ასე არ არის.

რაც მთავარია აი ამ მიზეზების გამო ჩვენ დიდი ხანი ვაკვირდებოდით ამ ვითარებას. ერთი მხრივ იმას, მოხსნიდა თუ არა გიორგი ვაშაძის ბლოკი საბურთალოზე კანდიდატურას და ეს არ მოხდა. მეორე მხრივ თავად გიორგი ვაშაძე რაღაც მოძრაობებს თუ არ გააკეთებდა, მოიბოდიშებდა მაინც, რომ ასეთ კრიტიკულ მომენტში ჩვენი გაერთიანებიდან გავიდა. არც ეს გააკეთა. ნათელი და მკაფიოა, რომ ჩვენი ამომრჩეველი მას ხმას არ მისცემს, რაც ამცირებს ოპოზიციური კანდიდატის გამარჯვების შანსებს, ამიტომ ჩვენი ამოცანაა, რომ დავამარცხოთ ივანიშვილის კანდიდატი ისანში, აქედან გამომდინარე რადგან ძირითადად განსაზღვრავენ „ნაციონალური მოძრაობის“ მხარდამჭერები ოპოზიციურ ელექტორატს, სწორედ ამიტომ მას უნდა გავუწიოთ ანგარიში, მათ განწყობებს უნდა მივაქციოთ ყურადღება და პატივი ვცეთ. აქედან გამომდინარე გამოვდივართ ივანიშვილის კანდიდატის დამარცხების ინტერესიდან და ამ სამივე ფაქტორებიდან გამომდინარე მივიღეთ ეს გადაწყვეტილება. უპირველეს ყოვლისა კი ამ მესამე ფაქტორის გამო.

_ როდესაც ამბობთ, რომ გიორგი ვაშაძე უნდა გამოსულიყო ნომერ „5“-ით, რა გამოდის, სამ კანდიდატს ითხოვდით „ნაციონალური მოძრაობა“?

_ არა. „ნაციონალური მოძრაობა“ არა. ჩვენ ვთქვით, რომ ორ კანდიდატს დავაყენებდით, რათა სხვა პარტიებსაც ჰქონდეთ საშუალება, რომ დაეყენებინათ თავისი კანდიდატურები.

_ თუ ნომერ „5-ით უნდა გამოსულიყო?

_ გიორგი ვაშაძე იყო კოალიციის „ძალა ერთობაშია“ წევრი და ის არ წარმოადგენდა „ნაციონალურ მოძრაობას“. „ძალა ერთობაშია“ კი გამოდის არჩევნებზე ერთიანი ფორმატით.

_ თუმცა, არ იყო გადაწყვეტილი ერთიანი ფორმატით გამოვიდოდა „ძალა ერთობაშია“ თუ ცალ-ცალკე…

_ როგორ არ იყო, ასეთი შეთანხმება გვქონდა.

_ შემიძლია ამოვიღო ინტერვიუები, სადაც თქვენი პარტიის წარმომადგენლები ამას ამბობდნენ, რომ გადაწყვეტილება არ იყო მიღებული ამაზე. მედიასთან არ საუბრობდით ამაზე?

_ შეთანხმება გვაქვს დადებული, რომელიც 2018 წელს მივიღეთ. რა მედიასთან არ ვსაუბრობდით, მილიონჯერ გვაქვს ამაზე განცხადება გაკეთებული.

შესაძლოა სახელზე არ იყო, თორემ ის ფორმატი, რაც „ძალა ერთობაშია“-ს ფორმატით გამოვიდოდით, ეს იმთავითვე ცნობილი იყო. ხელი გვაქვს ამაზე მოწერილი ამ პარტიებს. კანონმდებლობის ხშირი ცვლილების გამო ეს იქნებოდა „ნაციონალური მოძრაობა“, „ნაციონალური მოძრაობა – ძალა ერთობაშია“, თუ „ძალა ერთობაშია – ნაციონალური მოძრაობა“, ეს არი იყო გარკვეული. ეს არ გვაძლევდა საშუალებას, რომ ეს ასე მკაფიოდ გვეთქვა, თორემ ჩვენი პარტიები რომ ერთად გამოვიდოდით და ერთი ნომრით ვიქნებოდით წარმოდგენილი, ეს იმთავითვე ცხადი იყო და ცნობილი იყო, რომ ნომერი „5“-ით გამოვიდოდით.

_ გიორგი ვაშაძეზე საუბრისას სიზუსტე დავიცვათ და ვთქვათ, რომ ჩარკვიანმა საბურთალოზე თავისი კანდიდატურა ჯერ კიდევ მაშინ დააყენა, სანამ ვაშაძესთან შექმნიდა ბლოკს. მიიჩნევთ, რომ ბლოკის შექმნის შემდეგ უნდა მოხსნილიყო თაკო ჩარკვიანის კანდიდატურა?

_ ცხადია. ბლოკია და ერთი საარჩევნო სუბიექტია. შესაბამისად, საარჩევნო სუბიექტს იგივე ვალდებულებები აქვს, რაც სხვას.

_ ამის მიუხედავად ეს ყველაფერი ხომ არ იწვევს ამომრჩევლის უფრო მეტად დაბნეულობას? ხომ შეგეძლოთ, რომ გეთქვათ, ვაშაძის ბლოკის მხრიდან შეთანხმების დარღვევის მიუხედავად თქვენ მაინც რჩებით პრინციპების ერთგული და შეთანხმებას არ დაარღვევდით. ამაზე გსაყვედურობთ ერთ-ერთი მთავარი პარტნიორი „ევროპული საქართველო“. რატომ არ გააკეთეთ ეს?

_ პრინციპების ერთგული რომ ვრჩებით, მაგიტომ ვუჭერთ სხვა ოლქებში მხარს იმ კანდიდატურებს, რომლებზეც ვთქვით, რომ მხარს ვუჭერთ. ზოგიერთი პარტიის არასწორი რეაქციის მიუხედავად პრინციპის ერთგული ვრჩებით და ვინარჩუნებთ ჩვენს პოზიციებს ამ საკითხზე. გითხარით სამი მიზეზი, რატომაც მოხდა გადაწყვეტილების შეცვლა ისანში. დანარჩენ ოლქებში გადაწყვეტილება უცვლელი რჩება.

კოლეგებსაც და ამომრჩეველსაც შევახსენებ, რომ ჩვენ ეს გადაწყვეტილება რომ არ მიგვეღო და რვავე ოლქში დაგვეყენებინა კანდიდატები, რეალურად სხვა პარტიებს არც გამარჯვების და თუნდაც არც მეორე ტურში გასვლის შანსი არ ექნებოდა. იქიდან გამომდინარე თუ შევხედავთ, ვის რა ელექტორალური მხარდაჭერა აქვს და რას აჩვენებს ნებისმიერი გამოკითხვის შედეგი, რომელიც არ უნდა იყოს ის – იქნება „ქოცების“ თუ სხვა გამოკითხვები. ამაში ალბათ დამეთანხმებით, მაგრამ ჩვენ გადავდგით ეს ნაბიჯი, რომ ჩვენ მარტო „ნაციონალური მოძრაობა“ კი არ გვინდა, რომ იყოს წარმოდგენილი, არამედ სხვა პროდასავლური პარტიებიც. ჩვენ გადავდგით ეს ნაბიჯი და ჩვენს მიმართ ამ ფონზე ასეთი საყვედურები ნამდვილად უსამართლო იქნება.

_ გიგი უგულავამ სოციალურ ქსელში ასეთი პოსტი დაწერა: „მეგობრებო „ნაცმოძრაობიდან“ ძალა ერთობაშია თუ გადაღუნვაში“. რა პასუხი გაქვთ ამაზე?

_ ძალა ერთობაშია. დიახ. არანაირი ქილიკი და რაღაც სიტყვის ასეთი გადაკვრები აბსოლუტურად არ არის რელევანტური, არც სერიოზული და არც სამართლიანი. იმ მიზეზის გამო, რაც ზემოთ ვთქვი. ჩვენ რომ დაგვეყენებინა კანდიდატები თბილისის სხვა ოლქებში ვერცერთი ოპოზიციური კანდიდატი ვერც გაიმარჯვებდა და მეორე ტურშიც ვერ გავიდოდა. მათ შორის ვერც „ევროპული საქართველოს“ კანდიდატები. ასეა ყველა გამოკითხვებით. არ გვინდოდა შექმნილიყო ვითარება, რომ ყველგან მხოლოდ „ნაციონალური მოძრაობაა“ და ამიტომ გადავდგით ეს ნაბიჯი. ჩვენ ამას არ ვამადლით, მაგრამ როდესაც ასეთ დიდსულოვან ნაბიჯს ვდგამთ, კიდევ უსაგნო შემოტევები იყოს, ეს არასერიოზული და არასამართლიანია.

_ თუმცა, ეს არის რაციონალური ნაბიჯი, რადგან ხვდებით, რომ მარტო ვერ დაამარცხებთ „ქართულ ოცნებას“.

_ კი ბატონო. ჩვენ რაციონალურად მოაზროვნე ადამიანები ვართ და ამიტომ გადავწყვიტეთ ასე, თორემ სხვა პარტიებს კი არ ვამჯობინებთ ჩვენ პარტიას. მიგვაჩნია, რომ ჩვენ გვაქვს ყველაზე კარგი პროგრამაც და საშუალება, რომ ქვეყანამ იაროს იმ გზით, რაც ჩვენ მიგვაჩნია საჭიროდ. ასევე ვთვლით, რომ ეს მარტო ერთმა პარტიამ არ უნდა აკეთოს და დიდი ალბათობით ეს კოალიციამ უნდა გააკეთოს, ამიტომ ვდგამთ ამ ნაბიჯებს პრაგმატულად. სხვათა შორის პოლიტიკა არის კომპრომისების ხელოვნება და შესაბამისად ამ ნაბიჯს ქვეყნის და საზოგადოების ინტერესებიდან გამომდინარე ვდგამთ.

_ მიპასუხეთ იმ კითხვაზე, რაც ზემოთ დაგისვით – რატომ არ დაუჭირეთ ირაკლი ოქრუაშვილის კანდიდატურას მხარი?

_ პარტიის შიგნით სხვადასხვა მოსაზრებები იყო და ჩვენ რომ არ მივსულიყავით ამ დისკუსიების დროს იქამდე, რომ ჩვენი კანდიდატურა დაგვეყენებინა საბურთალოზე, ისე როგორც ეს გიორგი ვაშაძემ გააკეთა და ეს მართლაც დარღვევა გამოგვივიდოდა და დავარღვევდით საერთო შეთანხმებას, ეს არ გავაკეთეთ. თუმცა, არც რომელიმე კანდიდატურას არ დავუჭირეთ საბურთალოზე მხარი.

_ არ გრძნობთ გარკვეულ პასუხისმგებლობას მის მიმართ? იქიდან გამომდინარე, რომ 2018 წელს ოქრუაშვილმა გრიგოლ ვაშაძეს დაუჭირა მხარი.

_ პასუხისმგებლობას ჩვენ ვგრძნობთ ჩვენი ხალხის და ამომრჩევლის წინაშე და არა ირაკლი ოქრუაშვილის წინაშე.

სტატიის ავტორი იაგო ნაცვლიშვილი
მსგავსი სიახლეები
კომენტარები
იტვირთება...

ეს ვებ – გვერდი იყენებს cookie– ს თქვენი გამოცდილების გასაუმჯობესებლად. ვეთანხმები დეტალურად