ვალეს მოსახლეობის უწყვეტი წყალმომარაგების უზრუნველსაყოფად სამუშაოები დაიწყო

ათეული წლების შემდეგ, ქალაქ ვალეში წყალმომარაგების პრობლემა საბოლოოდ მოგვარდება. წყალმომარაგების პროექტის განხორციელების შედეგად, ადგილობრივი მოსახლეობა შეზღუდული გრაფიკიდან 24-საათიან წყალმომარაგებაზე გადავა. ინფორმაციას რეგიონული განვითარებისა და ინფრასტრუქტურის სამინისტროს გაერთიანებული წყალმომარაგების კომპანია ავრცელებს

სამუშაოებს საქართველოს გაერთიანებული წყალმომარაგების კომპანიის დირექტორი, ეკატერინე გალდავა, კომპანიის სამცხე-ჯავახეთის რეგიონულ მენეჯერთან, ბესიკ ფილაურთან ერთად ადგილზე გაეცნო. პროექტის ფარგლებში დაგეგმილია ცენტრალური სათავე ნაგებობის რეაბილიტაცია. ასევე, აშენდება ორი რეზერვუარი და რვა ჭაბურღილი. გარდა ამისა, მოეწყობა შიდა ქსელები და მოხდება აბონენტების ინდივიდუალური გამრიცხველიანება.

ვალეში წყალმომარაგების ცენტრალიზებული სისტემა დღემდე არ ფუნქციონირებს. მოძველებული ინფრასტრუქტურის გამო დიდია სასმელი წყლის დანაკარგი, რის შედეგადაც, მოსახლეობის ძირითად ნაწილს სასმელი წყალი დღის განმავლობაში რამდენიმე საათიანი გრაფიკით მიეწოდება.

პროექტის დასრულების შემდეგ, მომავალი წლის ზაფხულიდან, ვალეს მოსახლეობა უწყვეტ წყალმომარაგებაზე გადავა. სამუშაოებს, საქართველოს მთავრობის დაფინანსებით, 5 მილიონ ლარამდე მოხმარდება.

მსგავსი სიახლეები
კომენტარები
იტვირთება...

ეს ვებ – გვერდი იყენებს cookie– ს თქვენი გამოცდილების გასაუმჯობესებლად. ვეთანხმები დეტალურად