„ვადამდელს გამოვრიცხავ, „ოცნება“ პოლიტიკურ ყულფში თავისი ხელით თავს არ შეყოფს“ – ინტერვიუ სოსო ცინცაძესთან

პოლიტოლოგი სოსო ცინცაძე მიიჩნევს, რომ დასავლეთის რეაგირება ისეთი უნდა იყოს, რომ „ოცნება“ რაღაც საბაბით დაუბრუნდეს დოკუმენტს, ეს განცხადება მან „ქართული ოცნების“ გადაწყვეტილების შესახებ გააკეთა, რომლითაც მმართველი პარტია შარლ მიშელის დოკუმენტიდან გავიდა.

მისივე თქმით, „ოცნებამ“ მშვიდობიანი წასვლა შეუძლებელი გახადა, ამიტომ ვერ თმობს ხელისუფლებას.

რა გზავნილი გააკეთა „ქართულმა ოცნებამ“? გამოირიცხა თუ არა ვადამდელი საპარლამენტო არჩევნები და რამდენად რეალურია სანქციები? – ამ და სხვა საკითხებზე „აიპრესთან“ ინტერვიუში სოსო ცინცაძე საუბრობს.

_ ტრიუკი 2 ვნახეთ ივანიშვილის თუ „ოცნების“ მხრიდან, როდესაც გამოვიდნენ შარლ მიშელის შეთანხმებიდან. რა გვითხრა მმართველმა პარტიამ საზოგადოებას და რა უთხრა ჩვენ დასავლელ პარტნიორებს?

_ ახლა ვუყურებ ვოლსკის ინტერვიუს რუსთავი 2-ის კორესპონდენტთან. სიმართლე გითხრათ, ჩემთვის – დიპლომატიის თეორეტიკოსისთვის ეს მასტერკლასია, როგორ შეიძლება მარადონას ფინტებით აუარო გვერდი პირდაპირ დასმულ კითხვას და კითხვაზე რატომ გადის მოლაპარაკებიდან, უცებ გადაიტანო ელეგანტური ფინტით რუსეთის ფედერაციის რომელიღაც წამყვანი უწყების ანგარიშზე საქართველოში ადამიანის უფლებებზე.

_ ვოლსკია მარადონა?

_ დიახ, ვოლსკია მარადონა. მეცოდება „რუსთავი 2“-ის სიმპატიური ჟურნალისტი. ვოლსკი ამ საკითხებში 5 ჭიპმოჭრილია და 30 მილში გამძვრალი. ეს არის, რომ 30 წლიან პარლამენტარიზმის ისტორიაში პარლამენტმა თავისი ფუნქცია ვერ შეასრულა. არ არის ჩვენთან ნამდვილი პოლემიკა. პოლემისტები ვერ გაზარდა პარლამენტმა.

ამ ჟურნალისტის ადგილას ვოლსკის გავახსენებდი ერთ ამბავს, რომ 13 ივლისს – 2 კვირის წინ გამოვიდა წონასწორობიდან. მე მას ამ მხრივ არ ვიცნობდი. რა ვიცი სტუდენტობის დროს არასოდეს წონასწორობიდან არ გამოდიოდა. საკმაოდ კარგი სტუდენტი იყო.

მან ჯერ კიდევ ორი კვირის წინ საზოგადოებრივ მაუწყებელთან ინტერვიუში განაცხადა, რომ რატომ არ ამბობთ იმაზე, რომ ჩვენ მიშელმა ხელების გადაგრეხვით მოგვაწერინა ხელი პარტიისთვის წამგებიან ხელშეკრულებაზეო. ამით იმის თქმა მინდა, რომ ჯერ კიდევ ორი კვირის წინ მივიდნენ იმ დასკვნამდე, რომ ეს ხელშეკრულება მათთვის პოლიტიკურად წამგებიანი იყო. ეს მხოლოდ ერთ შემთხვევაში იქნებოდა პოლიტიკურად წამგებიანი, ნაკისრი ვალდებულებების შეუსრულებლობის პირობებში. ეს ვალდებულება შეუსრულებადი იყო.

_ რა შთაბეჭდილება გრჩებათ, ვადამდელ არჩევნებს აღარ ჩაატარებენ?

_ არა, გამორიცხულია, მე ადრეც რამდენჯერმე ვთქვი, რომ პოლიტიკურ ყულფში თავს არავინ შეყოფს და არც თვითმკვლელობას არავინ ჩაიდენს საკუთარი ხელით. თუ რაღაცა საოცრება არ მოხდება, არ იქნება ვადამდელი არჩევნები, არ იქნება.

_ დასავლეთი როგორ გაიგებს ამ ნაბიჯს?

_ ჩემი აზრით უკვე შეშფოთება-შეწუხებით. საქართველოს და დასავლეთის ურთიერთობას ნუ ამოვგლიჯავთ კონტექსტიდან და ცალკე ნუ განვიხილავთ, რომ ცალკეა რუსეთი და კოლექტიური დასავლეთის ურთიერთობა რუსეთთან, სადაც ამერიკაც მონაწილეობს და ცალკეა საქართველოს ურთიერთობა. ეს ასე არ არის, ეს შემადგენელი ნაწილებია.

ცნობილი რუსი პოლიტოლოგი ასაბუთებს, რომ გერმანიის საგარეო საქმეთა მინისტრმა გაასაჯროა აზრი, რომ გერმანია ევროპის ცენტრია და მასზეა დამოკიდებული, რამდენად კონსოლიდირებული იქნება ევროპა, მაგრამ მისი საგარეო პოლიტიკა განისაზღვრა ასე, რომ სანამ შესაძლებელია ჩვენ უნდა გამოვიყენოთ რუსეთიო და არ უნდა გავაღიზიანოთ კრემლიო. ბაიდენი ამ თამაშში ჩაერთო, რადგან მას სჭირდება მერკელი და ევროპა ჩინეთთან ურთიერთობაში. ამიტომ, საქართველოს ნაწილს ვერ ამოვგლიჯავთ აქედან და ერთიან კონტექსტშია განსახილველი ეს საკითხი.

_ თქვენ ახსენეთ წულუკიანის განცხადება, რომ შარლ მიშელმა „ხელები გადაუგრიხა“ „ოცნებას“. ოპოზიციაც ხშირად იშვერს ხოლმე ხელს მისკენ. ბოლო სერიაში განტევების ვაცი მიშელი ხომ არ გამოვა და „ოცნებაც“, „ნაცმოძრაობაც“ და დანარჩენი ოპოზიციაც კმაყოფილი გააგრძელებენ თანაარსებობას?

_ ამაზე ვერ გიპასუხებთ, მაგრამ ერთ რამეზე გავაკეთებ აქცენტს. დასავლეთში უკვე გვაგრძნობინეს სხვა საკითხებზეც, რომ სანქციებზე ჩვენ მივდივართ უკიდურეს შემთხვევაშიო. რაც საქართველოში ხდება, არ თვლიან იმის აუცილებლობად, რომ სანქციები დაწესდეს. ეს მშვენივრად იცის „ქართულმა ოცნებამ“. რაც არ უნდა იყოს „ოცნებაში“ ავანტიურისტები არ არიან. ვოლსკია გამონაკლისია, რომელსაც სხვა სკოლა აქვს გავლილი.

_ ღარიბაშვილი?

_ არა, ეს ავანტურა არ არის, ეს არის მისი პოლიტიკა – ხისტი პოლიტიკა. არიან ძერები და მტრედები. ყველა ძერა ავანტიურისტი არ არის. თავის დროზე ნიქსონი ითვლებოდა ძერად, მაგრამ მასზე ავანტიურისტიაო, არასოდეს არავის უთქვამს. ავანტურისტული ნაბიჯი იყო 2008 წელს რუსეთის პროვოკაციაზე წამოგება.

ჩემი პროგნოზით პატარა კომპრომისები იქნება. ვინაიდან დღეს საკითხი დადგა ასე, რომ „ოცნება“ ამ ბრძოლიდან არა დანაკლისით გამოვიდეს, არამედ დამარცხდეს და წავიდეს ხელისუფლებიდან, ამაზე „ოცნება“ არასოდეს არ დათანხმდება. ჩვენთან ისეთ ჩიხამდე მივიდა დაპირისპირება, რომ უკვე ყოფნა არყოფნის საკითხია.

სააკაშვილმა დათმო ხელისუფლება და წავიდა, მაგრამ მერე ისე მოხდა, რომ დღეს ის დევნილია. სააკაშვილს კი ჰქონდა რაღაცა დანაშაული, მაგრამ ივანიშვილს თვალი უნდა დაეხუჭა ამაზე, რათა სათავე დაედო იმისათვის, რომ მოვიდოდა დრო და თავადაც გულმშვიდად დაეთმო ხელისუფლება, მაგრამ მთელი 9 წელი ყველაფერი გააკეთეს იმისათვის, რომ საკუთარი დამარცხება და მშვიდობიანი წასვლა შეუძლებელი გახადეს.

ასეთი სიტუაციაა და ამიტომ ასეთი გაცხარებული წულუკიანი, რომ ხელები გადაგვიგრიხა ჩვენმა მოკავშირემო. ასეთი ფრაზა მე არ გამიგია ჩვენი მოკავშირის მიმართ. ის კი არა, ჩვენი პოლიტიკოსები რუსეთის მიმართაც კი ერიდებიან ასეთ გამოთქმას. თეა წულუკიანი რიგითი წევრი არ არის მმართველი პარტიის, ამაზე უნდა აეტეხა განგაში ოპოზიციას, ეს ნიშნავდა, რომ არ დატოვებდნენ ამ ხელშეკრულებას. ამიტომ, საბაბი მზად იყო, როდესაც „ნაცმოძრაობამ“ არ მოაწერა ხელი.

რამდენჯერმე გაიმეორეს, რომ ჩვენ კი არ ვცვლით ხელშეკრულებას, არამედ მის ლიკვიდაციას ვახდენთო. როგორ შეიძლება მრავალმხრივი შეთანხმების ლიკვიდაცია მოახერხო?! ტრამპი გამოვიდა ჯანმოს ხელშეკრულებიდან, მაგრამ მისი ლიკვიდაცია მოახდინა?! კლიმატის პარიზის შეთანხმებიდან, მაგრამ მოახდინა მისი ლიკვიდაცია?! ნახეთ კობახიძემ თქვა ლიკვიდაციას ვახდენთო, რაც გამიკვირდა, უფრო გამოცდილი პოლიტიკოსი მეგონა. ეს ნიშნავს, რომ კი, დიდხანს ჰქონდათ ყელში გაჩხერილი, მაგრამ სპონტანური გადაწყვეტილება მიიღეს. ეს განცხადებაც აბსოლუტურად არადიპლომატიური იყო.

მრავალწევრიანი ხელშეკრულებაა და ერთი მხარის გასვლის შემდეგ მისი ლიკვიდაცია ვერ მოხდება, შესაბამისად ეს ხელშეკრულება ცოცხალია. ამიტომ, ვაშაძე რომ ამბობს, დავაბრუნოთო, ის ერთ რამეში სწორია, რომ ის გრძნობს, რომ ის ხელშეკრულება არსებობს. შესაძლოა ისე ვერ ფუნქციონირებს, როგორც საჭიროა, მაგრამ ეს ხელშეკრულება არსებობს.

ამიტომ, კოლექტიურმა დასავლეთის და არა მხოლოდ ევროპის რეაგირება ისეთი უნდა იყოს, რომ „ოცნებამ“ რაღაც საბაბი ყურით მოათრიოს და დაუბრუნდეს ამ ხელშეკრულებას, რაც მე რთულად მიღწევადად მიმაჩნია.

ავტორი: იაგო ნაცვლიშვილი

კომენტარები
იტვირთება...