“თმენის ვალდებულება რომ მომეხსნება, ბევრ რამეს ვიტყვი!” – ინტერვიუ ზაქარია ქუცნაშვილთან

საპარლამენტო უმრავლესობის წევრმა, თიანეთის, ყაზბეგის და დუშეთის მაჟორიტარმა დეპუტატმა ზაქარია ქუცნაშვილმა 2019 წლის 20 ივნისს საქართველოს პარლამენტში მართლმადიდებლობის საპარლამენტთაშორისო ასამბლეის სესიის ჩაშლის შემდეგ, მისთვის დეპუტატის მანდატის ვადაზე ადრე შეჩერების შესახებ პარლამენტს მიმართა. რომელსაც, საპროცედურო საკითხთა და წესების კომიტეტმა დღეს ერთხმად დაუჭირა მხარი.

რატომ ტოვებს დეპუტატის მანდატს ყოველგვარი განმარტების გარეშე და თვლის თუ არა შეცდომად პარლამენტში მომხდარ ფაქტს ჯერ კიდევ დეპუტატი, “აიპრესი” ამასთან დაკავშირებით ზაქარია ქუცნაშვილთან ინტერვიუს გთავაზობთ.

_ “ნაციონალური მოძრაობის” წევრი, დეპუტატი სალომე სამადაშვილი ითხოვს თქვენი მუშაობის შემსწავლელი კომისიის შექმნას, როგორია თქვენი შეფასება ამასთან დაკავშირებით?

_ სამადაშვილი და მისი ძმები ცდილობენ იმ ძალადობრივი აქციაზე რომლის ორგანიზატორები ისინი გახლდნენ, პასუხისმგებლობა ვიღაცას შეაწმინდონ, ეს არის მათი მოქმედებების მიზანი. უნდათ რომ ამ ძალადობაზე პასუხისმგებლობა ვიღაცას შეტენონ, ამ შემთხვევაში სამიზნედ მე ამირჩიეს მათი აზრით, როგორც ყველაზე დაბალი ღობე.

სამადაშვილი ცდილობს იმ ძალადობრივ აქციაზე, რომელიც მათი წაქეზებით განხორციელდა, პასუხისმგებლობა ვიღაცას შეტენონ. ამით ვხსნი ამ მოთხოვნას.

_ 20 ივნისს, პარლამენტიდან რუსეთის დუმის დეპუტატის სერგეი გავრილოვის წასვლის შემდეგ, საპარლამენტო ფრაქცია “ქართული ოცნების” თავმჯდომარე მამუკა მდინარაძემ თქვა, ის რომ გავრილოვი დაჯდებოდა პარლამენტის თავმჯდომარის სკამზე და იქიდან რუსულ ენაზე მიმართავდა ასამბლეის წევრებს, არ ყოფილა შეთანხმებული მათთან… 

_ მოდით დღეს დავტოვოთ ეს საკითხი ღია, ვინ რა იცოდა – ვინ რა არ იცოდა.

_ იმის გამო რომ რუსეთის დუმის დეპუტატი გავრილოვი დაჯდა საქართველოს პარლამენტის თავმჯდომარის სკამზე, პოლიტიკური პასუხისმგებლობა აიღო, პარლამენტის უკვე ყოფილმა თავმჯდომარემ ირაკლი კობახიძემ. ასევე, ამის გამო თქვენ მიმართეთ პარლამენტის ახალ თავმჯდომარეს არჩილ თალაკვაძეს, თქვენთვის დეპუტატის უფლებამოსილების შეჩერების შესახებ. თუმცა, როგორ მოხვდა გავრილოვი პარლამენტის თავმჯდომარის სკამზე, ამაზე არავის საუბრობს.

 თუ თქვენ არაფერში მიგიძღვით ბრალი, რატომ მიდიხართ, რატომ ტოვებთ დეპუტატის მანდატს, მითუმეტეს, თქვენ პარტიული სიით არ მოსულხართ საკანონმდებლო ორგანოში, მაჟორიტარი დეპუტატი ხართ, ხალხმა აგირჩიათ. პასუხგაუცემელია ძალინ ბევრი კითხვა…

_ კარგი და ძალიან ლოგიკურია კითხვაა. ალბათ, როცა შემიწყდება პარლამენტის უფლებამოსილება, მერე უკვე მომეხსნება თმენის ვალდებულებაც და თუ ჩავთვლი საჭიროდ, ვილაპარაკებ იმას, რასაც ჩავთვლი საჭიროდ. ეს გადაწყვეტილება მხოლოდ იმის გამო მივიღე, რომ არანაირი მანდატი არ მიღირს ჩემი ხალხის ნერვიულობად.

მე ვიცი, რომ საზოგადოების ნაწილი გაუცნობიერებლად მოექცა პროპაგანდის ქვეშ. იმ პროპაგანდის ქვეშ, თითქოს ჩვენ არ ვიყავით მართლმადიდებლობის საპარლამენტთაშორისო ასამბლეაში შემავალი 25 ქვეყნის მასპინძელი ქვეყანა, არამედ გავრილოვის მასპინძელი ქვეყანა. აი, ამის ქვეშ მოექცა საზოგადოების ნაწილი და ბუნებრივია, ამან გამოიწვია მათი გულწრფელი აღშფოთება, მაგრამ ღმერთია მოწმე, რომ საქართველო და ზაქარია ქუცნაშვილი იყო არა ერთი კაცის, არამედ მართლმადიდებელი ქვეყნების საპარლამენტთაშორისო ასამბლეის მასპინძელი ქვეყანა. სადაც 25 სახელმწიფო იღებდა მონაწილეობას. რომელიც მნიშვნელოვანი საერთაშორისო ფორუმი იყო და ეს უნდა გამოგვეყენებინა მაქსიმალურად, საქართველოს სასარგებლოდ და არა საქართველოს წინააღმდეგ. მაგრამ, მათ ასეთი რამ განაცხადეს, რომ ვითომ მე ვიყავი არა მასპინძელი, არამედ ორგანიზატორიც მე ვიყავი. ამ დროს ამ ყველაფერს ხელმძღვანელობს ორგანიზაციის საერთაშორისო სამდივნო.

მათ ისე გაასაღეს თითქოს ჩვენ განვსაზღვრეთ ვინ სად უნდა მჯდარიყო, ვის რა უნდა ელაპარაკა და საზოგადოებაში დაბადეს ის რეაქცია, რაც საწყის ეტაპზე გულწრფელი იყო. მერე ყველა გაიშიფრა. მათი მიზანი იყო, საზოგადოებისთვის არასწორი ინფორმაციის მიწოდებით ხალხის მღელვარება გამოეწვიათ და ეს მღელვარება გამოეყენებინათ ხელისუფლების ძალადობრივი გზით ჩასაგდებად.

_ საზოგადოებას სერგეი გავრილოვის მასპინძლობა არ გაუპროტესტებია. ის 19 ივნისსაც იყო ცერემონიების სასახლეში და იქაც რუსულად მიმართა ასამბლეის წევრებს და მოწვეულ სტუმრებს, სადაც პროტესტი მხოლოდ უკრაინის ელჩს ჰქონდა.

 აღშფოთება საქართველოს პარლამენტის თავმჯდომარის სკამზე გავრილოვის ხილვას მოჰყვა, საიდანაც მან ოკუპანტის ენაზე მიმართა საზოგადოებას… ეს იყო მიზეზი, რამაც ქვეყანა საკმაოდ მძიმე სიტუაციაში ჩააგდო. (უკვე 26-დღეა საპროტესტო აქცია მიმდინარეობს).  თან ამ ფაქტზე საპარლამენტო ფრაქცია “ქართული ოცნების” თავმჯდომარე მამუკა მდინარაძემ განაცხადა, რომ ეს არ იყო მათთან შეთანხმებული…

_ ჩემი თხოვნაა, ფაქტების გაყალბებას მოვეშვათ ყველანი. 20 ივნისს არა თუ გავრილოვს, მთელს ასამბლეას 12:00 საათზე, უფრო სწორად შუა დღის 1 საათზე პარლამენტის შენობა უკვე დატოვებული ჰქონდა. შესაბამისად, ამას თუ ვინმე მიზეზად მიიჩნევს, შუა დღეს ეს მიზეზი აღმოფხვრილი იყო. უფრო მეტი, საღამოს 5 თუ 6 საათზე დელეგაცია გაფრინდა, ფიზიკურად საქართველოში არ ყოფილა და როგორ?

თქვენ იმის თქმა გინდათ, რომ სამსახურში ან ოჯახში გაბრაზებულმა ადამიანმა, ან სამსახური ან ოჯახი უნდა დაარბიოს?! საქციელი, რომელიც ძალადობაში გამოიხატება ეს გამართლებულია?

 _ ასეთი რამ არ მითქვამს,  ეს თქვენი ინტერპრეტაციაა.

_ აკავშირებთ.

_ მე ვთქვი, საქართველოს პარლამენტის თავმჯდომარის სკამზე სერგეი გავრილოვის  ჩაჯდომამ და იქიდან ოკუპანტის ენაზე მიმართვამ საზოგადოება აღაშფოთა. სწორეეს აღშფოთებული ადამიანები მივიდნენ აქციაზე. 

_ მერე? მერე? თქვენ ბრძანეთ რომ მოვიდნენ ისინი საპროტესტო აქციაზეო . ამის გამოა ქვეყანა 20 დღეზე მეტია იმაში არისო… ამის გამო კი არ არის ქვეყანა იმაში, არამედ იმის გამოა ქვეყანა ამ მდგომარეობაში, რომ ვიღაცამ ჩვენი ხალხის გულწრფელი ემოციის პოლიტიკური გამოყენება სცადა და ძალადობაში გადაზარდა.

ძალადობა დამთავრდა იმით, რომ დაზარალდა ხალხი და ამის გამოა ქვეყანა ამ მდგომარეობაში, თორემ, რა შუაში ან რა პირდაპირი კავშირი აქვს ამ ძალადობასთან? ძალადობას კვებავს ან ძალადობას ამართლებს საპარლამენტთაშორისო ასამბლეა? თუ ჩვენ ვუკავშირებთ ერთმანეთს, მაშინ გამოდის რომ ასამბლეა და გავრილოვი კვებავდა ძალადობას და ასამბლეა და გავრილოვი არის მიზეზი ამ ძალადობის?!

არ მითქვამს რომ ასამბლეა ძალადობას კვებავს. აბსოლუტურად სხვა რამეს გეუბნებით. ვამბობ, საქართველოს პარლამენტის თავმჯდომარის სკამზე რუსეთის დუმის დეპუტატის დაჯდომამ და იქიდან ოკუპანტის ქვეყნის ენაზე მიმართვამ გამოიწვია საზოგადოების აღშფოთება. 

_ მერე? ამოიწურა ეს აღშფოთების მიზეზი 12:00 საათზე, რა არის გაუგებარი ამაში? არ ამოიწურა? ფაქტს ვაყალიბებ, მე არ წავიყვანე ის ხალხი სხვა სასტუმროში? ჩვენ ხომ ობიექტურები უნდა ვიყოთ, არა? მე არასდროს შემშინებია საზოგადოებრივი აზრის წინააღმდეგ წავსულიყავი.

2006 წლის პარლამენტში 6 კაცი ვიყავით, რომლებმაც მიხეილ სააკაშვილის(საქართველოს ყოფილი პრეზიდენტი) კონსტიტუციურ ცვლილებას ვუწოდეთ, “დემოკრატია საფრთხეშია”. 234 კაციდან განცხადებაზე მხოლოდ ექვსმა კაცმა მომიწერა ხელი. იმიტომ რომ 2003-2004 წლებში თეთრ ცხენზე იჯდა სააკაშვილი და “ნაციონალურ მოძრაობა”,  მაგრამ დავუპირისპირდი საზოგადოებრივ აზრს, გავიდა წლები და სწორი აღმოვჩდი. იმ კონსტიტუციურმა ცვლილებებმა განაპირობა იმ ხელისუფლების ავტორიტარულ და ავტოკრატიულ რეჟიმად ჩამოყალიბება. ახლა, როცა მე გეუბნებით რომ საზოგადოების აღშფოთების მიზეზი ამოწურული იყო და მითუმეტეს ამოწურული იყო საღამოს 5 თუ 6 საათზე, მერე თქვენ ამბობთ ძალადობა ამან გამოიწვიაო… ძალადობა ამას არ გამოუწვევია, ძალადობა გამოიწვია “ნაციონალური მოძრაობის” უპასუხისმგებლობამ.

_ ბატონო ზაქარია, სიტყვა ძალადობა არ მიხსენებია, გითხარით სიტყვა აღშფოთება.

_ ჰო მაგრამ, თქვენი მკითხველი?.. მე ვიცი ჟურნალისტიკაში სიტყვებით მანიპულირება რას ნიშნავს. აღშფოთებას და ძალადობას მკითხველი ერთნაირად დაუკავშირებს. თუ ობიექტური ადამიანი ხარ, საზოგადოების აზრს კი არ უნდა დაემორჩილო, საზოგადოებას უნდა აუხსნა, რომ გაღიზიანების მიზეზი აღმოფხვრილი იყო. იმიტომ რომ გადავიდა ასამბლეა სასტუმროში და იქაც კი მოვარდნენ. იქ მოვარდნას რაღაც აზრი ჰქონდა, კერძო სივრცეშიც კი მოვარდნენ.

_ ეს აბსოლუტურად სხვა საკითხია. 

_ არა. ესეც ძალადობის გამოხატულება იყო. მე ვიდექი კარებში და ვუთხარი: როგორ შეიძლება, შუა საუკუნიდან მოყოლებული დიპლომატიური მისიის წარმომადგენლებს ხელს არ კიდებენ, ჩვენ ქართველები ვართ, სტუმარ-მასპინძლის სამშობლო ვართ თუ ბრბოს სამშობლო ვართ?

მე გეუბნებით, თმენის ვალდებულება რომ მომეხსნება ბევრ რამეს გეტყვით. თუ გაბრაზების მიზეზი არ არსებობს, ამით უნდა გავამართლოთ საღამოს აქცია?

_ 20 ივნისის საღამოს აქციაზე რა მოხდა ეს გამოძიებამ უნდა დაადგინოს. ალბათ, ბოლომდე მიიყვანს ამ საქმეს. მე სხვა რამეს გეკითხებით

_ მიუხედავად იმისა, რომ მე დღეს ვიმყოფები უარგუმენტო ბულინგის ქვეშ, მიიჩნევენენ რომ ქვეყანა მასპინძლობდა არა 25 ქვეყნის საპარლამენტთაშორისო ასამბლეას, არამედ გავრილოვს. თურმე, დღეს გახდა მთელი ოპოზიციისთვის აღმოჩენა რომ რუსეთი ამ ასამბლეაში პრეზიდენტი ქვეყანაა? მე დავასახელებ გვარებს, თარიღებს როდის იყო ეს მათთვის ცნობილი, მათ შორის, ვინ იღებდა ამ ღონისძიებებში მონაწილეობას მათი მხრიდან. მერე ყველაფერს ნათელი და ფარდა აეხდება.

თქვენი კითხვა აბსოლუტურად ლოგიკურია და სწორია, მაგრამ მე მაინც ჩავთვალე, რომ საქართველოა მთავარი და ვერ იქნება მისი საპირწონე მანდატი, თუნდაც ჩემთვის საყვარელი დუშელების, თიანელების და მოხევეების მოცემული. თუ ჩემი მანდატის დადება ხელს შეუწყობს საზოგადოებაში მშვიდობის და თანხმობის ჩამოყალიბებას, თან მე ბოდიში მოვუხადე ჩემს ამომრჩევლებს, რომ მათ არ შევუთახმე გადაწყვეტილება. ამიტომ, ჩემი ნაბიჯი ნაკარნახევია არა იმით რომ “ნაციონალური მოძრაობის” ძალადობაზე მე უნდა ვაგო პასუხი, ან ვითომ დღეს ყველამ ყურები რომ დაიბუგა და თვალები დაიბრმავეს, ვითომ  არ იცოდა ოპოზიციამ, რომ რუსეთი იყო პრეზიდენტი ამ ასამბლეის… დავასახელებ თარიღებსა და პიროვნებებსაც და ყველა გაიგებს, რომ ყველამ ყველაფერი კარგად იცოდა. უბრალოდ, ეს საბაბად გამოიყენეს. წარმოაჩინეს თითქოს საქართველო მასპინძლობდა არ 25 ქვეყნის დელეგაციას, არამედ ერთ გავრილოვს. იმ გავრილოვზე უამრავი ტყუილი მოიგონეს. სიმართლის უფლება მტერსაც აქვს. თუ კაცი და პიროვნება ხარ უნდა შეუნახო სიმართლე.  ჩავთვალე, თუ საზოგადოებაში სიმშვიდეს შეუწყობდა ხელს, მე ჩემს მანდატს დავტოვებდი. აი ეს იყო ნაკარნახევი.

_ თვლით თუ არა, რომ პარლამენტის თავმჯდომარის სკამზე სერგეი გავრილოვის დაჯდომა იყო შეცდომა?

_ ისევ იქ ხართ, ნიკა გვარამიას(ტელეკომპანია “რუსთავი 2”-ის გენერალური დირექტორი) სტანდარტებში. გვარამიამ თქვა, აი, პარლამენტის თავმჯდომარის სკამში  ჩაჯდა გავრილოვი და მერე ყველამ აიტაცა.

_ ბატონო ზაქრო, მე პარლამენტში ვიყავი იმ დღეს, როდესაც პარლამენტიდან გავრილოვმა ოკუპანტის ენაზე მიმართა საზოგადოებას, რაც პირადად ჩემთვის აღმაშფოთებელი იყო. იქ ნამდვილად არ დამინახავს გვარამია და არ ვიცი რა თქვა. მხოლოდ გავრილოვის სკამზე ჩაჯდომა კი არა, ოკუპანტის ენაზე მიმართვა იყო აღმაშფოთებელი.

_ თუ თქვენ მიგაჩნიათ რომ მართლმადიდებლობის საპარლამენტთაშორისო ასამბლეის მასპინძლობა არის უღირსი საქციელი და ზაქარიამ ქვეყნის ეროვნულ ინტერესებს უღალატა მასპინძლობის გამო, ეს თქვენ შეგიძლიათ დაწეროთ თქვენ შეფასებაში და მე ამას აღვიქვამ როგორც თქვენს შეფასებას.

_ ბატონო ზაქარია, მართლმადიდებლობის საპარლამენტთაშორისო ასამბლეის მასპინძლობაში არაფერია ცუდი და რომ ვყოფილიყავით ნებისმიერი მუსლიმური ქვეყნების ასამბლეის მასპინძელი ქვეყანა, ამაშიც არაფერია ცუდი. სხვა რამეზე აქ საუბარი…​

​_ თქვენ მეკითხებით, თუ არაფერი დაგიშავებიათ რატომ ტოვებთ დეპუტატის მანდატს. თქვენ ცდილობთ დამაპირისპიროთ მდინარაძესთან. უკვე მესამედ გამიმეორეთ, მდინარაძემ თქვა, “ჩვენთან არ იყო შეთანხმებული”. მდინარაძე კი არ იყო ამ ღონისძიების ორგანიზატორი. საერთაშორისო სამდივნო იყო ორგანიზატორი. მე მგონი თქვენ უფრო ის გაინტერესებთ, რომ ვიღაცას დავადო ხელი.

ჩემთვის უმთავრესია საქართველო. ჩემი ხალხის ნერვიულობად არ მიღირს და მანდატს არ მივიჩნევ მის საპირწონედ. ოღონდ საზოგადოებაში მშვიდობა და თანხმობა იყოს. ვინ იცოდა, როდის იცოდა, რა მონაწილეობა ჰქონდა მიღებული ოფიციალურ წყაროებში არის და მეც მოგეხმარებით მაგაში და ყველას ყველაფერ გავაგებინებ.

_ ბატონო ზაქრო, დეპუტატი მანდატს რომ შეგიჩერებენ, ამის შემდეგ სად აპირებთ წასვლას და საქიანობას?

​_ ჯერ მოვითმინოთ. იქნებ არ მიჩერებს პარლამენტი(იცინის)

_ ფიქრობთ თუ არა რომ შინაგან საქმეთა მინისტრმა გიორგი გახარიამ  უნდა დატოვოს თანამდებობა ?

_ საქართველოსთვის აუცილებელი გახარიამ თანამდებობა არ დატოვოს.  გახარიამ ერთხელ და სამუდამოდ განაცხადა რომ ძალადობრივი გზა, როგორც პოლიტიკური მიზნის მიღწევის საშუალება მე შევეწირები.

თუ გიორგი გახარიას გადმოსახედიდან შევხედავთ, გიორგისთვის ყველაზე კომფორტული იქნება თანამდებობის დატოვება. მაგრამ, საქართველოს გადმოსახედიდან თუ შევხედავთ, ის წინ აღუდგა ძალადობას და განაცხადა, რომ სანამ მე ვარ მინისტრი ამ საშუალებით პოლიტიკურ მიზანს ვერავინ ვერ მიაღწევს. ამიტომ გახდა დღეს  №1 სამიზნე ძალადობის ორგანიზატორების მხრიდან.

მათ მხოლოდ ეს საშუალება აქვთ არჩეული და ყველას იყენებენ. ეკლესიას, სამშობლოს, პატრიოტიზმს, ღვინოს, სანთელს, ყველაფერს გვილანძღავენ ოღონდ კი საზოგადოებაში არეულობა და დაძაბულობა შემოიტანონ. აი, ასეთი ხალხი არიან და გახარია ამ ძალადობის შემაკავებელია. ამის გამო, საქართველოს გადმოსახედიდან თუ უყურებთ, ის არ უნდა გადადგეს.

 

სტატიის ავტორი ირმა მესხია
მსგავსი სიახლეები
კომენტარები
იტვირთება...