თელავის საკრებულოს წევრის მიმართ, შვილების ცემის სავარაუდო ფაქტზე საგამოძიებო მოქმედებები მიმდინარეობს

დღეს სოციალური ქსელის მომხმარებელმა მარიამ კუკუნაშვილმა გაავრცელა ინფორმაცია, რომ თელავის საკრებულოს წევრი მიხეილ გრემელაშვილმა 19 წლის შვილები სცემა.

მიხეილ გრემელაშვილი, საკრებულოში, პარტია “ქართული ოცნება-დემოკრატიული საქართველოს” შალაურის ადმინისტრაციული ერთეულის მაჟორიტარი დეპუტატია.

“ხმას არ ვიღებ წლებია დედის ხათრით, გამზრდელი ბიცოლის ხათრით, ბებიის ხათრით, მაგრამ ამაზე გაჩუმება უკვე დანაშაულია! პრინციპში აქამდეც დანაშაული იყო. მინდა ყველა იცნობდეთ ჩემს ბიძაშვილს, Mixeil Gremelashvili -ს. მან 19 წლის შვილები, გოგოები ისე სცემა, რომ დაალურჯა წყლის დაგვიანებით მიწვდის გამო გოგოები! და ეს ცოლშვილის ცემა, ძალადობა და იარაღით დევნა და სროლა მისი მხრიდან წლებია უკვე გრძელდება. უფროს გოგოს, სუიციდის მცდელობა ჰქონდა, რომლის წინ წერილი დაწერა არ დაამმარხოთ, თეთრ ზეწარში გამახვიეთ და ისე გადამაგდეთ, ისეთ ჯოჯოხეთში ვცხოვრობ მეტს არც ვიმსახურებო. ფსიქოლოგებთან ტარების შემდეგ ძლივს გამოვიდა ბავშვი დეპრესიიდან. ბავშვები ამჟამად, ამ წუთებში პოლიციაში იმყოფებიან დაკითხვაზე და ისეთებს ყვებიან მამაზე, გაგიჟდებით…კახეთის ოცნების საკრებულოს წევრი მოძალადე, ლაჩარი მიხეილ გრემელაშვილი დასაჭერია ან ვინ მისცა ასეთ ზნედაცემულ კაცს იარაღი? ჩამოართვით მამობის უფლება,გააშუქეთ ჟურნალისტებმაც სანამ შემოაკვდება ეს ულამაზესი ცოლშვილი და ანგელოზივით ბავშვები…მე წავიყვან ბავშვებს!!! ფურთხის ღირსადაც არ მიმაჩნიხარ მიხეილ გრემელაშვილო…სესიაშვილის პროტეჟევ, სესიაშვილსაც უნდა მივწერო საკრებულოში შენნაირებს როგორ აჩერებენ”, – წერს მარიამ კუკუნაშვილი.

როგორც “აიპრესს” შინაგან საქმეთა სამინისტროში განუცხადეს, მიმდინარეობს საგამოძიებო მოქმედებები, მიხეილ გრემელაშვილის შვილები კი გამოკითხვაზე იმყოფებიან. გამოძიება სისხლის სამართლის კოდექსის  11¹ – 151 მუხლით მიმდინარეობს, რაც ოჯახის წევრის მიმართ განხორციელებულ მუქარას გულისხმობს.

ბრალის დამტკიცების შემთხვევაში მიხეილ გრემელაშვილს 3 წლამდე პატიმრობა ემუქრება.

მსგავსი სიახლეები
კომენტარები
იტვირთება...

ეს ვებ – გვერდი იყენებს cookie– ს თქვენი გამოცდილების გასაუმჯობესებლად. ვეთანხმები დეტალურად