თბილისის ბაღების მართვის სააგენტო ინკლუზიური განათლების ხელშეწყობისთვის მორიგ პროექტს იწყებს

თბილისის საბავშვო ბაგა-ბაღების მართვის სააგენტო ინკლუზიური განათლების ხელშეწყობის მიზნით, მორიგ პროექტს იწყებს. საქველმოქმედო ფონდ „აი იას“ ინიციატივით გამოცემული სანოტო კრებული, რომელიც სმენის დარღვევის მქონე ბავშვების სმენითი უნარების განვითარებაზეა ორიენტირებული, სააღმზრდელო მეთოდოლოგიაში დაინერგება. ამ მიზნით, კრებულის პრაქტიკაში გამოყენების ძირითადი პრინციპების გასაცნობად ფონდის მუსიკა-თერაპევტებმა თბილისის ბაღების მუსიკის პედაგოგებისთვის ვორკშოპი გამართეს. ინფორმაციას თბილისის მერია ავრცელებს.

ღონისძიებაზე ფონდისა და სააგენტოს წარმომადგენლებმა პროექტის მიზნებზე ილაპარაკეს, ასევე შეთანხმდნენ იმ აქტივობებსა და ეტაპებზე, რაც მუსიკის თერაპიის პრაქტიკული განხორციელებისთვის არის საჭირო. მხარეებმა გამოთქვეს მზადყოფნა, რომ სწავლების შემდგომ განახორციელონ პროექტის ზედამხედველობა იმ ბაღებში, სადაც ამ ეტაპზე რეგისტრირებულნი არიან საქველმოქმედო ფონდ ,,აი იას” ბენეფიციარები.

„ბაღების მართვის სააგენტო ღიაა ნებისმიერი ტიპის თანამშრომლობისათვის, რაც ჩვენი აღსაზრდელების უკეთ და ეფექტიანად განვითარებას შეუწყობს ხელს. სწორედ ამიტომ დავთანხმდით ფონდ „აი იას“ წინადადებას, კრებულის ბაღებში შეტანის თაობაზე, დავაფინანსეთ კრებულის უფრო ფართო ტირაჟი, რათა ის ყველა პედაგოგისთვის იყოს ხელმისაწვდომი. კრებული მოიცავს მარტივი სიტყვებისგან შედგენილ მცირე მუსიკალურ კომპოზიციებს, რაც სმენის დარღვევის მქონე ბავშვებს დაეხმარება ფონური ხმების დიფერენცირებასა და თავისთავად, მეტყველების უნარების განვითარებაშიც“, – განაცხადა თბილისის საბავშვო ბაგა-ბაღების მართვის სააგენტოს ხელმძღვანელმა კახაბერ გვანცელაძემ.

ორენოვანი სანოტო კრებულის, „ქართული სიმღერა-თამაშების“ პრეზენტაცია 25 იანვარს, განათლების, მეცნიერების, კულტურისა და სპორტის სამინისტროში გაიმართა. ეს პირველი ქართული კრებულია, რომელიც მსოფლიოში გავრცელებული ნორდოფ-რობინსის მუსიკის თერაპიის პრინციპებზეა დაფუძნებული. მასში შესული კომპოზიციების შექმნაზე ერთობლივად მუშაობდნენ გერმანიაში მოღვაწე მუსიკათერაპევტი მარინა რაიდტ-ალთუნაშვილი, საქველმოქმედო ფონდ „აი იას“ გუნდის წევრები და კომპოზიტორები – სალომე ხუციშვილი და თამარ ჟორდანია

მსგავსი სიახლეები
კომენტარები
იტვირთება...

ეს ვებ – გვერდი იყენებს cookie– ს თქვენი გამოცდილების გასაუმჯობესებლად. ვეთანხმები დეტალურად