თავდაცვის სამინისტროს სოციალურ საკითხთა და ფსიქოლოგიური მხარდაჭერის დეპარტამენტს ახალი უფროსი ჰყავს

თავდაცვის სამინისტროს სოციალურ საკითხთა და ფსიქოლოგიური მხარდაჭერის დეპარტამენტს ახალი უფროსი ჰყავს. ირაკლი ღარიბაშვილმა ბუბა ლომუაშვილი დაჭრილ-დაშავებულ სამხედრო მოსამსახურეებს, მათი ოჯახის წევრებსა და დეპარტამენტის თანამშრომლებს წეროვანის სარეაბილიტაციო ცენტრში გააცნო. ინფორმაციას თავდაცვის საიმინისტრო ავრცელებს.

ახალი ხელმძღვანელისთვის, რომელმაც ბავშვობაში მიღებული მძიმე ტრავმის შედეგად ზედა კიდურები დაკარგა, მძიმედ დაჭრილი სამხედროების მდგომარეობა და პრობლემები განსაკუთრებით მნიშვნელოვანი და საგულისხმოა.

ბუბა ლომუაშვილმა განათლება თბილისის სახელმწიფო უნივერსიტეტში, შვეიცარიაში, ბაზელის უნივერსიტეტში და სლოვაკეთში მატეა ბელას უნივერსიტეტში მიიღო. ბუბა ლომუაშვილი საქართველოში სხვადასხვა უნივერსიტეტის ასოცირებული პროფესორი და უცხოეთის რამდენიმე უნივერსიტეტის მიწვეული ლექტორია.

ირაკლი ღარიბაშვილმა დაჭრილ და დაშავებულ სამხედრო მოსამსახურეებსა და დეპარტამენტის ახალ ხელმძღვანელს სრული მხარდაჭერა გამოუცხადა. ირაკლი ღარიბაშვილმა წეროვანში ახალი, მშენებარე სარეაბილიტაციო ცენტრის სამშენებელო სამუშაოებიც დაათვალიერა. დასავლური სტანდარტების სარეაბილიტაციო ცენტრი, რომელიც წლის ბოლომდე გაიხსნება, აშშ-ის მხარდაჭერით შენდება და უახლესი ტექნოლოგიებით იქნება აღჭურვილი. შენობაში სამკურნალო-სარეაბილიტაციო აუზი, ადაპტირებული სპორტული და სარეაბილიტაციო ინვენტარი, ასევე მჯდომარე ფრენბურთისა და კალათბურთისთვის მოედანი განთავსდება.

დღესვე, თავდაცვის მინისტრმა დაჭრილ-დაშავებულ სამხედრო მოსამსახურეებთან ერთად სროლებში მიიღო მონაწილეობა. რეაბილიტაციის ფარგლებში გამართული პროფესიული აქტივობა, სპეციალური ოპერაციების ძალების ბაზაზე, ვაშლიჯვარში გაიმართა. სპეციალური ოპერაციების ძალების წარმომადგენლებმა მძიმედ დაჭრილ სამხედროებს ინსტრუქტაჟი ჩაუტარეს და მათ მიზანში სროლაში ეხმარებოდნენ. თავდაცვის მინისტრის განცხადებით, უწყება დაჭრილი სამხედროების რებილიტაციისთვის მსგავსი სახის აქტივობებს მომავალშიც დაგეგმავს.

მსგავსი სიახლეები
კომენტარები
იტვირთება...

ეს ვებ – გვერდი იყენებს cookie– ს თქვენი გამოცდილების გასაუმჯობესებლად. ვეთანხმები დეტალურად