თალაკვაძე:  OSCE/ODIHR რეკომენდაციებში მოცემულ რამდენიმე ძირითად საკითხზე მიღწეულია შეთანხმება

პარლამენტის თავმჯდომარემ საარჩევნო კანონმდებლობის რეფორმის სამუშაო ჯგუფის პირველი სამუშაო დღე შეაჯამა.

„ჩვენ ვიმსჯელეთ კიდევ ოთხ საკითხთან დაკავშირებით, რომელიც ეუთოს რეკომენდაციებში არის მოცემული და ძირითად საკითხებზე მივაღწიეთ შეთანხმებებს“-განაცხადა საქართველოს პარლამენტის თავმჯდომარე არჩილ თალაკვაძემ საარჩევნო კანონმდებლობის რეფორმის სამუშაო ჯგუფის პირველი სამუშაო დღის ბოლოს. არჩილ თალაკვაძის განცხადებით, შეთანხმება დაფინანსების ახალი მოდელისა და სარეკლამო დროის განაწილების გარდა კიდევ ოთხ საკითხზე შედგა. პარლამენტის თავმჯდომარემ განმარტა, რომ საუბარია მეორე ტურთან დაკავშირებულ რეკომენდაციებზე, სიძულვილის ენაზე, მისი დარეგულირების წესზე და საარჩევნო კამპანიების და პარტიების დაფინანსების წყაროების მონიტორინგზე. პარლამენტის თავმჯდომარის თქმით, შეთავაზებულ ვერსიას ეთანხმებან საერთაშორისო ექსპერტები და სამოქალაქო საზოგადოება. არჩილ თალაკვაძის განცხადებით, საკითხი, რაზეც აზრთა სხვადასხვაობა არსებობს ეხება საარჩევნო ადინისტრაციის დაკომპლექტების წესს. მისივე თქმით, არსებობს ორი გარემოება, რომელთა გათვალისწინებითაც მმართველი ძალის მიერ შეთავაზებულია კომპრომისული ვარიანტი. „ჩვენ, მეტწილად დავაკმაყოფილეთ ეუთოს რეკომენდაცია, რომ უნდა გაუმჯობესდეს ბალანსი ოპოზიციას და მმართველ პარტიას შორის და გავუზარდეთ წარმომადგენობა ოპოზიციას, რათა ამ გზით, მივაღწიოთ საარჩევნო ადმინისტრაციის უფრო მეტ დამოუკიდებლობას და მიუკერძოებლობას. ჩვენ, რა თქმა უნდა, ვერ გავაკეთებთ ისე, რომ ოპოზიციას გადავცეთ მართვაში საარჩევნო ადმინისტრაცია და იმასაც ვერ დავტოვებთ, რომ მმართველ პარტიას ჰქონდეს დომინანტური გავლენა საარჩევნო ადმინისტრაციაში. არის კომპრომისული ვარიანტი შეთავაზებული, რაზეც ექსპერტებმა თქვეს, რომ ეს ეუთოს მიერ გაცემულ რეკომენდაციას დიდწილად აკმაყოფილებს“,-განაცხადა არჩილ თალაკვაძემ.

საარჩევნო კანონმდებლობის რეფორმის სამუშაო ჯგუფი, რომელსაც საქართველოს პარლამენტის თავმჯდომარე, არჩილ თალაკვაძე ხელმძღვანელობს, ეუთოს დემოკრატიული ინსტიტუტებისა და ადამიანის უფლებების ოფისის (OSCE/ODIHR) რეკომენდაციებზე მსჯელობას ხვალ გააგრძელებს.

მსგავსი სიახლეები
კომენტარები
იტვირთება...

ეს ვებ – გვერდი იყენებს cookie– ს თქვენი გამოცდილების გასაუმჯობესებლად. ვეთანხმები დეტალურად