თაკო ჩარკვიანი: სიამოვნებით შევაკლავ თავს რუსეთ-საქართველოს ბრძოლას! (ინტერვიუ)

გაერთიანებული ოპოზიციის ერთ-ერთი ლიდერი და პარტია „კანონი და სამართალის“ დამფუძნებელი თაკო ჩარკვიანი აცხადებს, რომ იდეალისტია და სიამოვნებით შეაკლავს თავს რუსეთ-საქართველოს ბრძოლას, თუ მომავალ თაობას, პირველ რიგში კი მის შვილებს ეცოდინება, რისთვისაც იბრძოდა.

ამის შესახებ თაკო ჩარკვიანმა „აიპრესთან“ ინტერვიუში ისაუბრა. ჩარკვიანი იმასაც ამბობს, რომ ბიძინა ივანიშვილს იმის გამო დაუპირისპირდა, რომ რუსეთისკენ მიმავალ გზას დაადგა და ქართველი ხალხი „გადააგდო“. პოლიტიკოსი ამბობს, რომ წინა ხელისუფლების დროს სისასტიკეები ხდებოდა და ამის გამო იყო სააკაშვილის ოპოზიციაში, თუმცა აქვე დასძენს, რომ მაშინ სახელმწიფო ინსტიტუტები შენდებოდა. დღეს კი ფეოდალური და ოლიგარქიული მმართველობის დასრულების ერთადერთი შანსი ოპოზიციურ ერთობაშია.

პოლიტიკოსი გარანტიაზეც საუბრობს, რათა იგივე ქმედებები აღარ გაიმეოროს „ნაციონალურმა მოძრაობამ“ და მიხეილ სააკაშვილმა, რაც 2003-2012 წლებში ხდებოდა. ამბობს, რომ ამის გარანტია ის მემორანდუმია, რომელსაც არჩევნების შემდეგ კოალიციის ფორმატში გააფორმებენ, რომლის მიხედვითაც იმ მმართველობიდან მხოლოდ დადებით რაღაცებს გადმოიტანენ.

რას ფიქრობს ეკლესიაში მიმდინარე პროცესებზე და რა კავშირს ხედავს 90-იან წლებთან? რა გახდა ის წყალგამყოფი, რის გამოც ბიძინა ივანიშვილს დაუპირისპირდა? რას ფიქრობს სააკაშვილზე და ხომ არ აზარალებს თავისი განცხადებებით ოპოზიციურ საქმეს? რატომ უპირისპირდება გიგა ბოკერიასა და ევროპულ საქართველოს  და ვის განიხილავს პარტნიორებად? – ამ და სხვა საინტერესო საკითხებზე თაკო ჩარკვიანი „აიპრესთან“ ინტერვიუში საუბრობს:

_ დღეს ფილმის „და ჩვენ ვიცეკვეთ“ წინააღმდეგ აქციები იგეგმება (ინტერვიუ ჩაწერილია პარასკევს, 8 ნოემბერს ავტ:) და რადიკალური ჯგუფები ფილმის ჩაშლით იმუქრებიან. როგორია თქვენი შეფასება ამ საკითხზე?

_ ამასთან დაკავშირებულ ატეხილ აჟიოტაჟზე ისე მეცინება, რომ ვხარხარებ. ვამაყობ იმით, რომ პოეტის შვილი ვარ. ჯანსუღი არის სახალხო პოეტი და ხალხისთვის საყვარელი სტრიქონების ავტორი, მაგრამ არანაკლებ მნიშვნელოვანია ის, რომ მე ვარ „ცისკრის“ რედაქტორის ჯანსუღ ჩარკვიანის შვილი. „ცისკარმა“ 12 წლიანი ეპოქა შექმნა. ეს არის იმ პერიოდის მწერლებისა და პოეტების სიტყვები. ასეთი თამამი ანტისაბჭოთა ნაწარმოებები, რაც „ცისკარში“ იბეჭდებოდა, არცერთ ჟურნალ-გაზეთს არ ახსოვს. იყო ასეთი კრიტიკოსი ბესარიონ ჟღენტი, რომლის ძალიან ცნობილი წერილი დაიბეჭდა, მაშინ როდესაც „ცისკარში“ ჭაბუა ამირეჯიბის „დათა თუთაშხია“ დაიბეჭდა, რომლის პირველი მკითხველები დედაჩემი და მამაჩემი იყვნენ. ამით იმის თქმა მინდა, რომ თავისუფალი სიტყვის ფასი არაფერია და ამის ფასი მე ამის ფასი ბავშვობიდანვე ვიცოდი.

_ ის ფაქტი რას ნიშნავს, როდესაც ხელოვნებასაც კი გვიკონტროლებენ?

_ სამარცხვინოა. იმიტომ დავიწყე ასე შორიდან. 1972 წელს ჰქონდა მამაჩემს დაბეჭდილი „თავისუფლება ისე არ მოდის, თავისუფლება ლომთა ხვედრია“. ერთი თვის შემდეგ დაიბეჭდა გივი კარბელაშვილის წერილი და ვის უმიზნებს ტყვიასო. უყურადღებოდ არ დარჩენილა. მაშინ ახერხებდნენ ჩვენი წინაპრები რაღაცას და ეს რა არის, როცა 21-ე საუკუნეში აკრძალვა. ეს არის იმპერატიული კრეტინიზმი. ასეთი რაღაცა წლებია არ გამიგია.

_ ივანიშვილის პოლიტიკამ მოიტანა ეს?

_ უდავოდ. მე და შენ წეღან ვსაუბრობდით, რომ როგორც დაბეჭდილ ტექსტს ხვდები ისეა ეკრანზეც, ისე ხვდები შენ კარგ მოქალაქეს, ისე ხვდები რესპონდენტს, როგორი დეპუტატია. „ოცნებაში“ დღეს მეტი წილი ძალიან დაბალი დონის განათლების მქონე ხალხია საკანონმდებლო ორგანოში. მათ თავის განათლების დონეზე დაიყვანეს ყველაფერი და ეს არის უბედურება. გაოცებული ვუყურებ ვასაძისა და ბრეგაძის გამოხტომებს. ვინ არიან საერთოდ, თუ არ უნდათ, ნუ ნახავენ. ან საკუთარ შვილებს როგორ კადრებენ, არ ვიცი რა ხნის შვილები ჰყავთ, მაგრამ თუ ისინი სრულწლოვანები არიან, მათ უფლებებსა და ინტელექტს როგორ კადრებენ, რომ რაღაც აუკრძალონ და აკრძალვითი ენით ესაუბრონ.

ძალიან ტრადიციულ ოჯახში გავიზარდე, მაგრამ არ მახსოვს, რომ ჩვენთვის ეკადრებინოს მამაჩემს ჩემთვის და მამუკასთვის, რომ მე თქვენ გიკრძალავთ რაღაცას გიკრძალავთ. ეს არის კავშირში იმ გაუნათლებელ პოლიტიკასთან, რასაც ატარებს დღეს ქართულ ოცნება. ისინი წავლენ ამ სახელით, მათ უკვე „აიკიდეს“ ეს სახელი. განათლების სიმწორეა გუნდში და ეს გამოკვეთილად ჩანს.

_ ახსენეთ განათლება და თემატურად გადავალ განათლების მინისტრის შეცვლაზე. მან დააანონსა და დაიწყო განათლების რეფორმა. ამ რეფორმის მთავარ აქტორებად ჩანდნენ ბატიაშვილი და ბახტაძე, დღეს კი აღარც ერთია მთავრობაში. ამ ფონზე რა ბედი ელის რეფორმას?

_ არანაირი რეფორმა არ შეიძლება განვითარდეს პატრონ-ყმურ წყობაში. ამის იმედი ნუ გვექნება. თავად ივანიშვილის დამოკიდებულება გამორიცხავს რაიმე პროგრესს.

_ რას შეეწირა მიხეილ ბატიაშვილი?

_ მე ვერ გეტყვით, რას შეეწირა, მაგრამ თუ ის არ იქნება, სხვას დანიშნავს. შესაძლოა, მართლა მოინდომა ოდნავ მეტის გაკეთება ამ ადამიანმა. მე ვერ გეტყვით. არც ამაში ვარ დარწმუნებული, მაგრამ შეიძლება სურვილი გაუჩნდა და სურვილიც არ აპატიეს.

_ უკავშირდება ია კერზაიას საქმეს?

_ არ ვიცი, ალბათ დაუკავშირდება, მაგრამ სურვილსაც კი არ აპატიებს ივანიშვილი, რომ როგორ გაგიჩნდათ სურვილი ოდნავ ინიციატორი აღმოჩნდეთ რაიმესი. მე, რასაც ვყვირი 7 წელია, ეს ამ ყველაფრის თანმდევია. დღეს საქართველოში არის პატრონ-ყმური წყობა და ეს ამბავი უნდა დასრულდეს.

დღეს რაც საპატრიარქოში ხდება, ესეც ამის გამოძახილია. მე არაერთხელ მისაუბრია საპატრიარქოში არსებულ პრობლემებზე. ვგულისხმობ გაუკონტროლებელ ფინანსურ თემებს. ვხედავთ ჯიპებს და ერთხელ ეთერში ვიხუმრე, რომ 007-ებით ჯეიმს ბონდებივით დადიან ეს მღვდლები-მეთქი. ყველაფერი გასაგები იქნებოდა მამა პეტრეს განცხადებასთან დაკავშირებით, სანამ ის ჩაჯდებოდა მანქანაში და იმ განცხადებას გააკეთებდა.

_ უკვე მამა პეტრეს ეძახით?

_ არა, მე ასე არ ვიცი ხოლმე ადამიანების ჩაძირვა. მე მამა პეტრეთი მოვიხსენიებდი. თუ თქვენ იფიქრეთ, რომ მეუფეს აღარ ვეძახი, ეს ასე არაა. მეუფე პეტრე. როგორც სამღვდელო პირს, იმიტომ დავუძახე მამა პეტრე.

მის განცხადებასთან დაკავშირებით, ჩემთვის პირადად ყველაფერი მისაღები იქნებოდა, გარდა იმ ფრაზისა, რომელიც მან თქვა, მაშინ როცა მანქანაში ჯდებოდა. ჩემს პარტიას „კანონი და სამართალი“ ჰქვია და ვერცერთ შემთხვევაში ვერ ვიქნები უპირობო მომხრე იმ ტიპის განცხადებებისა, რომელიც ემსგავსება ცილისმწამებლურ ჭორებს.

_ „მამათმავალი“ რომ უწოდა?

_ დიახ. ამასთანავე როდესაც ის შეეხო პერსონალიას…

_ მან ეს პატრიარქზე თქვა? ასე გაიგეთ?

_ მგონი ღიად თქვა. სინოდის თავმჯდომარეო თქვა.

ამ შემთხვევაში როცა ამაზე გადადიხარ გჭირდება მტკიცებულება. ყველაფერი მტკიცებულების გარეშე არის ცილისწამება. ეს ჩემი სიტყვები არ არის, ეს ასეა. რა თქმა უნდა, პრობლემები არის და ეკლესია ამისგან უნდა გათავისუფლდეს.

მე მეუფე პეტრე მგონია ამ ყველაფრის მსხვერპლი. ის არის სიტუაციისა და ჭორ-მართალი მანქანის მსხვერპლი. ახლანდელი სიტუაცია  ძალიან მაგონებს 90-იანი წლების მანქანას.

ჩვენ – იმ ჭორ-მართალი მანქანის მსხვერპლი ვიყავით, ორივე მხარე. ჩვენი მხარე იჯერებდა იმ ჭორებს, რაზეც გამსახურდიაზე ამბობდნენ და გამსახურდიას მხარეც იჯერებდა გარკვეულ ადამიანებზე თქმულს. იმიტომ, რომ ორივე მხარეზე მუშაობდნენ. გამსახურდიას წარმოუდგენელ ჭორებს უვრცელებდნენ. მაგალითად ამბობდნენ, რომ ოსეთიდან ხალხის გაძევება უნდაო. ბოლოს ტყუილი აღმოჩნდა ეს ყველაფერი. თქვენ გამსახურდიას თავდები რომ ნახოთ იცით ვინ არის?, 1989 წელს 9 აპრილს რომ დაიჭირეს ჯანსუღის თავდებით გამოუშვეს, მაშინ ეს ძალიან რთული იყო, რადგან გარეთ რუსის ჯარი იდგა.

_ მაშინ „ჩვენ მხარეს“ და მეორე მხარეს რატომ უწოდებთ?

_ იმიტომ, რომ მაშინ ჩვენ ვიდექით ერთ მხარეს და გამსახურდია იდგა მეორე მხარეს. 90-იანი წლების მიტინგი რომ ნახოთ… ვაკის პარკის მიტინგი, რომელიც გამსახურდიას მიერ იყო მოწყობილი უზარმაზარი მიტინგი და იცით ვის მიჰყავს? – ჯანსუღ ჩარკვიანს. იცით ვისი თხოვნით? – გამსახურდიას თხოვნით. ის მიტინგი გახდა უშიშროებისთვის ლაკმუსის ფურცელი, მაშინ როდესაც „დაყავი და იბატონეს“ პრინციპი უფრო გამოსადეგი იქნებოდა მათთვის და გამსახურდია პლუს ჯანსუღის მსგავსი ადამიანები ერთად არ უნდა ყოფილიყვნენ. ყველაფერი გააკეთეს დასაპირისპირებლად. ძალიან დასანანია, რომ სხვადასხვა მხარეს აღმოვჩნდით და მივიღეთ დასისხლიანებული რუსთაველი. იარაღი არ გვეჭირა ხელში, მაგრამ იდეოლოგიურად ერთად უკვე აღარ ვიყავით. ეს იყო დასანანი ამბავი.

დღევანდელი ვითარება ძალიან ჰგავს 90-იან წლებს. დღეს ჩვენ ტროლთა მანქანას როდესაც ვეძახით, ზუსტად ეს ტროლთა მანქანა მუშაობდა 90-იან წლებში. ისინი მოდიოდნენ ჩვენთან, აგიჟებდნენ ჩვენ ოჯახს, მერე მიდიოდნენ გამსახურდიასთან და ვითომ მისი მომხრეები იყვნენ და ათას სიბინძურეს უყვებოდნენ. არ იყვნენ სინამდვილეში გამსახურდიას მომხრეები,  შემიძლია გვარები და სახელები ჩამოგითვალოთ. დღეს ისინი რუსეთის მომხრეებად დგანან.

_ ვინ არიან ისინი?

_ ერთხელ ივანიშვილის ძალიან ახლობელმა მითხრა, რომ ასე ძალიან რას საყვედურობ ივანიშვილსო. ივანიშვილმა გააღვიძა ის მიძინებული ტროლთა ქარხანა, რასაც ჰქვია ყანდიაშვილ-ფოფხაძის ქარხანა. პროკურორის მოადგილედ მოიყვანა ლაშა ნაცვლიშვილი. ჩვენ ეს შემთხვევითი გვეგონა. შემთხვევითი გვეგონა ისიც, როდესაც კოკა ყანდიაშვილს ჩააბარა კანცელარია. მაგრამ, ეს არ ყოფილა შემთხვევითი. ეს ის ტროლთა ქარხანაა, რომელიც არის რუსთაველის 12-ში იპოვეს. გახსოვთ, ნოდარ მელაძის სიუჟეტი იყო, სადაც თეთრ დაფაზე თაკო ჩარკვიანი შავი ფლომასტერით ეწერა. არჩევნების პერიოდში მათ პროგრამაში ვიყავი კვირების განმავლობაში. აი ამას ვსაყვედურობ, რომ რუსეთის უშიშროების ტროლთა ქარხანა გაცოცხლა, რომელმაც დიდი ცოდვები დაატრიალა 90-იან წლებში. რატომ ხარ ივანიშვილო ტროლთა ქარხნის დამფინასებელი და მფარველი? იმიტომ, რომ თავად ასრულებ რუსეთის დავალებებს.

_ ერთ დროს აქტიურად უჭერდით მხარს ივანიშვილს. რა გახდა ის წყალგამყოფი, რომ ჯერ მას სამოქალაქო აქტივისტის პოზიციით დაპირისპირებოდით და შემდეგ კი გადაწყვიტეთ, რომ თავად ჩართულიყავით პოლიტიკურ პროცესში?

_ ვინაიდან სააკაშვილის დროს ვიყავი ოპოზიციაში და ამის კადრებიც არსებობს. შეგიძლიათ მოიძიოთ, რომ სანდრო გირგვლიანის მკვლელობის ფაქტის გამო 30 ადამიანი ვიდექით რუსთაველზე. მაშინ ხალხს ეშინოდა ქუჩაში გამოსვლა.

_ ვისი ბრალი იყო ეს, რომ ეშინოდათ?

_ იმ ხელისუფლების. ოპოზიციაში აბა რატომ ვიყავი?! დანაშაულებრივი ქმედებები იყო. სასტიკი დანაშაულებრივი ქმედება იყო სანდრო გირგვლიანის ამბავი. დავუშვათ, რომ რაღაც დააშავა და დააკავე, რატომ მიგყავს ოქროყანის ტყეში, თუ პოლიცია ხარ? პოლიციაში წაიყვანე. რა თქმა უნდა უსასტიკესი დანაშაულებრივი ქმედებები იყო და იმიტომ ვიყავი ოპოზიციაში, მაგრამ ამ გადასახედიდან ჩანს, რომ თურმე სახელმწიფო ინსტიტუტების შენება იყო უძლიერესი. ფაქტია და ჩამოვთვლი კიდეც.

ოპოზიციაში ვიყავი წლები, ჩვენ გვქონდა გაზეთი „ქართული სიტყვა“, ჯანსუღი იყო რედაქტორი, ვანო პავლიაშვილი კი მოადგილე. რას არ ვბეჭდავდით იმ გაზეთში. დასავლეთისკენ ლტოლვა უდავოდ იყო და მუდმივი მუშაობა იმისათვის, რომ ჩვენ გავმხდარიყავით დასავლეთის წევრები. ახლა არა თუ მუშაობა, ჯგუფი უნდა არსებობდეს იმისათვის, რომ მან იმუშაოს იმისათვის, რათა საქართველო როგორმე მალე გახდეს ნატოს წევრი და ეს ჯგუფი მხოლოდ დე-ოკუპაციაზე უნდა მუშაობდეს. ეს უნდა იდოს ჩვენს ტვინში. თუ სააკაშვილის დროს შვილმოკლულ დედას ვიცავდი, ახლა შვილმოკლულ მამას ვიცავ – მაჩალიკაშვილს. გაგრძელდა დანაშაულებრივი ქმედებები და სამაგიეროდ დაიწყო სახელმწიფო ინსტიტუტების ნგრევა. ახლა ვხედავ სახელმწიფო ინსტიტუტების ნგრევას, თვალების დათხრას რუსთაველზე და გავრილოვის ღამეს. გაბედა გავრილოვმა და მოსინჯა, შეეგუებოდა თუ არა სახელმწიფოებრიობის დაკარგვას საქართველო. მაჩალიკაშვილს დაზარალებულის ცნობას არ აძლევენ. ხდება ადამიანების მოტაცება, ამის მაგალითია მუხთარლის საქმე. ეს ყველაფერი თაროზე დევს. აი ეს იყო წყალგამყოფი.

სხვათა შორის კანონი შესაცვლელია უვადო გამოძიებასთან დაკავშირებით და ამის გამოა ეს დაუსრულებელი გამოძიებები. ამ კანონით უფლებას ვაძლევთ, რომ დაუსრულებელი გამოძიება იყოს. ჩვენ როდესაც მოვალთ ხელისუფლებაში კოალიციით ეს უნდა შევცვალოთ.

2012 წლის ივლისში „მეცხრე არხზე“ მოვისმინე გადაცემა, რომელიც მიყავდა ვასილ მაღლაფერიძეს. იქ ლაშა ნაცვლიშვილი ყავდათ სტუდიაში მაღლაფერიძეს და მთელი გადაცემა მიდიოდა იმაზე, რომ საქართველომ დაიწყო ომი. რომ დამთავრდა გამოვედი ოთახიდან და მამაჩემმა მითხრა, რატომ ხარ შეშფოთებულიო. რომ ვუთხარი რაც იყო, კი მაგრამ ეგ ბიძინას არხი არ არის, რატომ მიდის ეგ გადაცემაო?…

იმის მიუხედავად, რომ სააკაშვილის ოპოზიციაში ვიყავით, 2008 წელს ჯაჭვში ვიდექით. ეუბნებოდნენ მამაჩემს მაშინ, რატომ დგახარ მიას ჯაჭვშიო, რაზეც პასუხობდა, რომ საქართველოს ჯაჭვში ვდგავარ რუსეთის წინააღმდეგო. ის ბინძური სტატია, რომელიც ჯანსუღს დაუწერეს, სწორედ ამან გამოიწვია, რომ ინგასთან თქვა, რომ ომი საქართველოს არ დაუწყია.

_ მისი ერთი ცნობილი ფრაზა მახსოვს – „ადრე გვებრძოდნენ მუსულმანები, ახლა გვებრძვიან რუსულმანები“.

_ მას ეუბნებოდნენ, რომ შენ იმ დროს აქ არ ცხოვრობდიო? დიახ, ცხოვრობდა გაზეთის რედაქტორი იყო დათა თუთაშხიას ბეჭდავდა და წერდა: ტყვია მიზანში მოსახვედრია“ და „თავისუფლება ისე არ მოდის, თავისუფლება ლომთა ხვედრია“-ო. დიახ აქ ვცხოვრობდით მაშინ, როდესაც ფოთოლიც კი არ ბრუნავდა. არსებობენ კაცები და არაკაცები, ვაჟკაცები და არავაჟკაცები და მე ძალიან ბედნიერი ვარ, რომ ძალიან ვაჟკაცი კაცის შვილი ვარ. ბედნიერი ვარ, რომ ჯანსუღის ის ინტერვიუ არსებობს და ინგა გრიგოლიას ამის გამო სულ მადლობას ვეუბნები ხოლმე. ერთია ოპოზიციაში იყო და მეორეა, რომ სააკაშვილის სიძულვილს ქვეყანა გადააყოლეს.

_ როდესაც ივანიშვილის ოპოზიციაში მიდიოდით, უხერხულობას არ გრძნობდით?

_ გადავახტი თემას და კარგია, რომ დამაბრუნე. როდესაც ეს წავიკითხე და ჯანსუღმა მკითხა რამეს ეჭვობო და გავუზიარე ჩემი აზრი, დავწერე წერილი, რომელიც ლაშა ტუღუშს გავუგზავნე „რეზონანსში“ დასაბეჭდად. მან ეს წერილი უცვლელად დამიბეჭდა, რომელსაც სათაური ჰქონდა: „მე ვასილ მაღლაფერიძე, გრომიკო და სამების ამშენებელი“.

_ გრომიკო რატომ?

_ ვეკითხებოდი გრომიკო ხომ არ ხარ-მეთქი.

ამის შემდე აგვისტოში მან ისეთი სიმპატიები გამოხატა ირაკლი ალასანიას მიმართ. მან ირაკლი ხელიც მოარტყა და თქვა, რომ მე ამას ქვეყნის მართვასაც ჩავაბარებდიო. ეს რომ ვნახე, მე და მამაჩემმა ერთმანეთს დავურეკეთ გახარებულებმა, რომ ჩვენი ეჭვი „მეცხრე არხზე“ გასული გადაცემის გამო, უსაფუძვლო იყო. ჩავთვალეთ, რომ რახან მან ასეთი ფრაზა ამოთქვა, ეს ნიშნავდა, რომ დასავლეთს ემხრობოდა, რადგან ალასანია დასავლეთის მომხრე იყო.

_ დღეს აკლია ალასანია ქართულ პოლიტიკას?

_ რა თქმა უნდა. ირაკლი არის ძალიან წესიერი ადამიანი. ვმეგობრობ ნათიასთან [ფანჯიკიძე, ირაკლი ალასანიას მეუღლე] და უწესიერესი კაცი იყო ირაკლის მამაც და ნათიას მამაც. დიდი ტალახი ასხეს ალასანიას ოჯახს, რაშიც დიდი წვლილი მიუძღვის ივანიშვილს.

მაპატიეთ ჟარგონისთვის და მთელი ქართული საზოგადოება მოგვატყუა და „გადაგვაგდო“ ივანიშვილმა. დავინახეთ ეს საზოგადოებამ და ვინც არ დაინახა, მათ ლაგამამოდებულებს ვეძახი. ეგ რომ ქველმოქმედებას ეძახის, ის ქველმოქმედება არ არის, რადგან ქველმოქმედება უანგაროა და შენ რომ ამაში სამშობლოს გაყიდვას მოგთხოვს, იმას ქველმოქმედება აღარ ჰქვია. მან ხომ შეგნებულად დაგვასვა პრეზიდენტად ზურაბიშვილი? რომლის გაკეთებული განცხადებებიც საქართველოს წინააღმდეგ გამოიყენა რუსეთმა.

_ რატომ დაუჭირეთ მხარი გრიგოლ ვაშაძეს?

_ ზუსტად ამ ფაქტების გამო. როდესაც ის უნდა დაესახელებინათ, მაშინ ჩემთან მოვიდა ბატონი გრიგოლი და შემომთავაზა, რომ მე უნდა წარმედგინა ბაგრატის ტაძრიდან. კი ოპოზიციაში ვარ, მაგრამ მთელი ცხოვრება ოპოზიციაში ვარ და არ შემიძლია მე და პაატა ბურჭულაძემ რომ წარგადგინოთ და #5 წარვადგინო-მეთქი. მერე ვისაუბრეთ კიდევ მე და ბატონმა გრიგოლმა, ნიკა მელიაც იყო მოსული და დრო უნდა მომცეთ-მეთქი. მერე მივხვდი, რომ ეს უნდა გამეკეთებინა. 2016 წელს „ნაციონალურმა მოძრაობამ“ არ აჩვენა კარგი მაჩვენებელი. მივხვდი, რომ ივანიშვილისთვის ოპოზიციის განადგურება ძალიან ხელსაყრელია. ერთადერთი გამოსავალი იმისათვის, რომ ფეოდალმა და ოლიგარქმა ივანიშვილმა ქვეყანა ფეხქვეშ არ ამოიდოს, არის ძლიერი ოპოზიცია. მხოლოდ „ნაციონალები“ ვეღარ აძლიერებდნენ.

_ იმაზე არ გიფიქრიათ, როგორ იქნებოდა აღქმული საზოგადოების მხრიდან, მაშინ როდესაც მწვავედ აკრიტიკებდით ამ პარტიას როდესაც ხელისუფლებაში იყვნენ?

_ მე ძალიან თავისუფალი კაცის გაზრდილი ვარ და არასდროს არ ვფიქრობ, რა, როდის და როგორ არის აღქმული, თუ ის ჩემ ქვეყანას ჭირდება. მე ამაყი ვარ, რომ ეს ნაბიჯი გადავდგი, თორემ კარგად გახსოვთ, რა ტალახში გამოვიარე.

_ არ იყო რთული?

_ მაშინ პირველი იცი რა გავაკეთე? – სიცილით მოვკვდი და „ფეისბუქი“ გამოვრთე. შეესივნენ ჩემი უახლოესი სამეგობრო და კბილებით მიცავდნენ და ჩემს გამო ღამეებს ათენებდნენ. ამის გამო მადლობას ვეუბნები თქვენი ინტერვიუს საშუალებით. მათ ამიკრძალეს „ფეისბუქთან“ მიკარება. ჩემს შვილს უთხრეს, რომ არ გააკარო. ტალახი მოდიოდა ჩემზე და ტროლთა მანქანა – ყანდიაშვილები და მათი ჯგუფი გვარებით ვიცი, მაგრამ ამისთვის ყურადღება არ მიმიქცევია. ვერ დამძრავ ადგილიდან, თუ ეს ეხება რუსეთ-საქართველოს ამბავს. მე მაშინ ოპოზიციის გაძლიერებაში დიდი წვლილი შევიტანე და ერთ-ერთი ვიყავი მათ შორის, ვინც ოპოზიციის გაძლიერებაში ლომის წვლილი შეიტანა. ჩვენ მაშინ 900 000 ხმა დავდეთ. იმუშავა ბრენდმა, გაერთიანებული ოპოზიცია – ძალა ერთობაშია.

_ იმ ვითარებაში, როდესაც საუბრობთ, რომ როგორი სისასტიკე იყო წინა ხელისუფლების დროს და ამ დროს კოალიციას ამ პარტიასთან ქმნით, რა გაძლევთ იმის გარანტიას, რომ ასეთი რაღაც აღარ გამეორდება სააკაშვილის დაბრუნების შემთხვევაში?

_ ძალიან კარგი კითხვაა. ეგ კითხვა მე დასმული მაქვს გაერთიანებული ოპოზიციის სხდომაზე.

_ სააკაშვილთანაც გილაპარაკიათ ამ თემაზე?

_ ყველას ყველასთან გვილაპარაკია.

გარანტია არის გაერთიანებული ოპოზიცია და პარტია „კანონი და სამართალი“. გაერთიანებულ ოპოზიციაში ვთქვით ასეთი რაღაც და თავად გრიგოლ ვაშაძესაც აქვს ამაზე დასმული კითხვა, როგორ უნდა მოვახერხოთ, რომ წინა ხელისუფლების დროს საუკეთესო რაც იყო ის დავტოვოთ და ის ყველაფერი უბედურება რაც იყო, ის არ შემოყვეს. ამიტომ, „ნაცმოძრაობა“ პარიტეტის წესით უნდა დავტოვოთ ერთ-ერთ პარტიად 12 პარტიას შორის და არა მეტში. ზუსტად ასეთი როლი ჰქონდეს კოალიციაში და გავაკეთოთ მემორანდუმი. ეს მემორანდუმი იქნება იმის გარანტი, არ კი არა ვერ მოხდეს ეს და ყველა ერთნაირად კანონმორჩილი აღმოჩნდეს იმ მემორანდუმისა. წინააღმდეგ შემთხვევაში არანაირ პოლიტიკურ ველზე არ შევალ. ერთმა ადამიანმაც რომ მითხრას ქუჩაში, რომ თქვენ დანაპირები ვერ ან არ შეასრულეთო, შეიძლება გული გამისკდეს.

ამიტომ ვისაუბრეთ ამ თემაზე, რომელსაც გრიგოლ ვაშაძე და ნიკა მელიაც ესწრებოდნენ. ამიტომ აუცილებელია, რომ ასეთი მემორანდუმი გავაფორმოთ. სხვათა შორის ვაშაძე თავად არის ბუნებით დემოკრატი.

_ თქვენ ვაშაძის ყველა ეთერი მოგწონთ? არჩევნების წინ ერთ-ერთ ეთერში „ტვ პირველის“ ეთერში კრიტიკული კითხვების გამო წამყვანებს გაუბრაზდა. მოგეწონათ?

_ გრიგოლს ჰქონდა ასეთი ინტერვიუ? არ მახსენდება ნამდვილად. თუ კონკრეტულად მაჩვენებთ ეთერს, შევაფასებ. რაც მომისმენია, ნამდვილად ერთ-ერთი საუკეთესო დიპლომატია.

გარანტიები თუ არ მექნება მე იმ თამაშში არ შევალ. ამიტომ „ვაწვებით“ გაერთიანებულ ოპოზიციას, რომელიც უნდა იყოს პარიტეტზე გაერთიანებული. ვგულისხმობ პოლიტიკურ თამაშში შესვლა, თორემ გაერთიანებულ ოპოზიციას რომ დავუჭირე მხარი, ეს თქვენ კარგად იცით. მე თვითონ მოვითხოვე ეს გარანტია, იმიტომ რომ ჩემმა ამომრჩეველმა მომთხოვა ეს.

_ არ ფიქრობთ, რომ სააკაშვილი თავისი განცხადებებით ნებსით თუ უნებლიედ ივანიშვილის წისქვილზე ასხამს წყალს? თუნდაც ის, რომ მეორე ტურში ანტიმიშისტებმა მისი განცხადებების გამოც მისცეს ხმა ზურაბიშვილს. მან თქვა, რომ ბიზნესმენებს მოვატანინებ ფულებს და ა. შ. რამდენად ჯდება თანმიმდევრულ პოლიტიკაში?

_ იცით რა მიშაა. მას ასე დავახასიათებდი, რომ ეს არის ადამიანი თავისი პლუს-მინუსებით. ეს არის უნიჭიერესი ადამიანი.

_ ყველაზე ნიჭიერი?

_ უნიჭიერესების მეტი რა არის?!

_ უნიჭიერესი ნიშნავს ყველაზე ნიჭიერს.

_ ერთ-ერთი უნიჭიერესი ადამიანია. სახელმწიფოებრივად მოაზროვნე. ამ გადასახედიდან კარგად ჩანს, რომ სახელმწიფოებრივად მოაზროვნეა. რა თქმა უნდა, მას აქვს ხოლმე უკიდურესი ტიპის განცხადებების გაკეთება და ესეც შედის მისი პერსონალიის დახასიათებაში. შეიძლება რაღაც მომენტში მისი განცხადება მომგებიანი არ იყო, მაგრამ თვეები რომ გადის ხოლმე, ხვდები, რომ იმდენად უნდოდა და უნდა სიკეთე. საინტერესო ტიპია თავისი პლუს-მინუსით.

_ მისი უკიდურესი განცხადებები პროცესს აზიანებს?

_ უფრო თავად დააზიანა მიშა, მაგრამ იმდენი აქვს სახელმწიფოებრივი თვალსაზრისით გაკეთებული, თუნდაც სწრაფი და ჩქარი ენერგეტიკით ინსტიტუტების შენების თვალსაზრისით, რომ მაინც ის გადაწონის, ვიდრე გაფუჭებული.

_ ინსტიტუტები უფრო მაღლა დგას, ვიდრე ის სისასტიკე, რომელზეც საუბრობდით?

_ იცით რაშია საქმე? საქმეს ასე ვერ დააყენებ. ადამიანზე მაღლა ვერაფერს ვერ დააყენებ. მაგრამ სახელმწიფო ინსტიტუტების დროს ძალიან ბევრ სახელმწიფო ამშენებელს მოსვლია ძალიან დიდი სისასტიკე. ვერ ზომავენ ხოლმე, ხან ახალგაზრდა ასაკის გამო. ხან ვფიქრობ ხოლმე, რომ დასანანია იმ პერიოდში მას რომ არ ვიცნობდი, თუმცა შეიძლება არც მოესმინა, ვერ გეტყვით. ახალგაზრდა ადამიანმა, რომელმაც ნახა ფოფხაძე-ყანდიაშვილის მსგავსი ბევრი ადამიანი, ვერ მოზომოს. შესაძლოა დანაშაულებრივ ქმედებებში ნაწილი იცოდა, ნაწილი კი არ იცოდა.

მაგალითად, ციხის კადრებში ნაწილი კატასტროფაა, ნაწილი კი დადგმულია. ბედუკაძეს გმირად რომ აღიარებ, ის ხელისუფლება ხომ არ უნდა გვინდოდეს?! რა თქმა უნდა სრულად არ არის დადგმული, დადგმული კი არა ისეთი სისასტიკეა, რომ უდიდესი დანაშაულია, მაგრამ დადგმულიც დანაშაულია. არ გაიგოთ ისე, რომ ან „ვაპრავებ“, ან ვადანაშაულებ. ობიექტურად ვაფასებ.

მე ამას ვაბრალებ მათ ახალგაზრდობას, როცა რაღაცებს ვერ ზომავდნენ და გარკვეული ქმედებები გადავიდა სისასტიკეში და ხალხმა სწორად გაუშვა სახლში, მაგრამ ის, რომ პოლიტიკაში ყოფნის უფლება არ აქვთ, ეს არასწორია. თუ არ აქვთ ხმების მიღების უფლება, ლეგიტიმური არჩევნები ჩაატარონ და იქ გაირკვეს. 500 000 ხმა მიიღო და შენ გინდა 500 000 ადამიანი დამნაშავედ გამოაცხადო?! ეს შენი ერის წინააღმდეგ დანაშაულებრივი ქმედებაა. მეტსაც გეტყვით, როდესაც სააკაშვილს იჭერდნენ უკრაინაში ფეხზე ავდექი ორჯერ და აღმოვაჩინე, რომ ადამიანი, რომლის ოპოზიციაშიც ვიყავი არ მინდოდა რომ დაეჭირათ და ორჯერ ავდექი ფეხზე. პუტინის დასაჭერი პრეზიდენტი არ მყოლია მე, არ მყავს და არ მეყოლება არასდროს.

_ ევროპულ საქართველოსთან და ბოკერიასთან საბოლოოდ მორიგდით თუ გრძელდება თქვენი დაპირისპირება?

_ არაფერი მოსარიგებელი არ არის. მე მათ ვუთხარი, რომ თქვენ ამბობთ, რომ ემხრობით გაერთიანებას და მუდმივად ყველაფერს აკეთებთ ივანიშვილისთვის-მეთქი.

_ იგივე ვითარებაა დღესაც?

_ იცით რა? ცოტა შეანელეს. საერთოდ საქციელი, რომელიც მოქმედებაში მოგყავს და ისე დებს შედეგს, ამით შემიძლია დასკვნა გამოვიტანო. ჩემი საქციელში ვერავინ ეჭვს ვერ შეიტანს. მე გამოვხატე ბაგრატის ტაძართან ვაშაძის წარდგენისას, დაუზოგავად ვიშრომე. ახლა ვეუბნები ევროპულ საქართველოს, რომ მოდით დადეთ შედეგი. თქვენ მუდმივად აძლიერებთ ივანიშვილს და დამანახეთ საპირისპირო-მეთქი.

_ რით აძლიერებენ ივანიშვილს?

_ ყველაფრით. თუნდაც, რაც მოხდა 20 ივნისს, იმასთან დაკავშირებით. ხან მელიას ლანძღავდნენ, ხან „ნაცმოძრაობას“ და გაერთიანებულ ოპოზიციას ეძახდნენ „ნაციონალურ მოძრაობას“. ეს არის ივანიშვილის ტრენდი.

_ შეურაცხყოფილად იგრძენით ამის გამო თავი?

_ დიახ, იმიტომ რომ სწორი არ არის. იმიტომ კი არა, რომ „ნაციონალური მოძრაობაა“ შეურაცხყოფა. იქ არიან პარტიები, რომლებიც არ არიან „ნაცმოძრაობის“ წევრები. ჩვენ გავერთიანდით იმიტომ, რომ საქართველოს დასჭირდა რუსეთის წინააღმდეგ გაერთიანება.

ბოკერია გვებრძვის მეუღლესთან ერთად. როცა უნდა ამბობს, მეუღლეა და არ მკითხოთო, დაცვა როცა სჭირდება, მაშინ მეუღლეს იშველიებს.

_ კითხვები იმანაც ხომ არ გაგიჩინათ, რომ შსს-მ თავიდანვე დაასახელა სამი გვარი და დაიბარა გამოკითხვაზე – ეს იყო მელია, ოქრუაშვილი და უგულავა. მელიას სამაჯური ადევს, ოქრუაშვილი ციხეში ზის, ხოლო უგულავას არაფერი შეეხო. ამაზეც გაგიჩნდათ კითხვა?

_ რა თქმა უნდა. ყველას გაუჩნდა. მე თავიდანვე არ მითქვამს არაფერი, სანამ არ დავინახე, როგორ მოიყვანეს საქციელი მოქმედებაში. ახლა ცოტა შეარბილეს რიტორიკა და მომწონს. ვნახოთ, თუ ისინი კვლავ გააგრძელებენ ივანიშვილის ტრენდზე ჯდომას, მექნება საფუძველი ვთქვა, რომ ივანიშვილის ტრენდზე ზიან. აქვე გავიხსენებ იმასაც, რომ ბოკერიამ დააანონსა, რომ ხელშეუხებლობას ვპირდებით ივანიშვილსო.

_ რა თქვა ცუდი? მან ამით ხაზი გაუსვა, რომ შურისძიების პოლიტიკა გამოვრიცხოთო.

_ შურისძიების მომხრე მეც არ ვარ, მაგრამ კანონდარღვევის უფლება შენ ვინ მოგცა?! ამას ჰქვია წინასწარი გარიგება. თუ ვიღაცამ მოიპარა ხალხის ფული, შენ ბოკერია კანონზე მაღლა დგახარ?! მე ვინ ვარ, თაკო ჩარკვიანი, რომ მსგავსი განცხადება გავაკეთო, რა უფლება მაქვს?! მე ვითხოვ კანონის უზენაესობას. პოლიტიკური ამნისტია არ არსებობს ასეთი, ეს არის მცირე პოლიტიკური გარიგება.

_ ბიძინას ტრენდზე საუბრობდით, თქვენზეც ვრცელდება ხოლმე ხმები, რომ ივანიშვილმა შეუქმნა პარტიაო. ამაზე რა პასუხი გაქვთ?

_ ყველაფერს გამორიცხავს ხოლმე შენი საქციელი, რომელიც მოგყავს მოქმედებაში, რომელიც დებს იმ შედეგს, რომელიც სჭირდება ივანიშვილს, ესე იგი შენ ხარ სატელიტი. თუ შენი საქციელით დებ იმ შედეგს, რომელიც გამოადგა ხალხს და ოპოზიციას, ესე იგი, შენ ხარ ოპოზიცია. მე უკვე დავდე შედეგი ხალხისა და ოპოზიციისთვის და ეს არის 900 000 ხმა. ასე, რომ პასუხი გაცემულია. მე ვარ ჩემი ქვეყნისთვის თავდადებული ადამიანი. მე ვარ იდეალისტი და სიამოვნებით შევაკლავ თავს, თუ მომავალ თაობას ჩემი შვილიდან დაწყებული ეცოდინება, რომ შევეწირე რუსეთ-საქართველოს ბრძოლას და რუსეთის მხრიდან ჩემის ქვეყნის ოკუპაციის წინააღმდეგ ბრძოლას.

_ გაერთიანებული ოპოზიციის გარდა პარტნიორებად ვის განიხილავთ?

_ სადღაც ორ კვირაში ნახავთ დამატებით ძალები როგორ შემოგვემატებიან და უფრო დიდი გაერთიანება გამოცხადდება. „რესპუბლიკელებთან“ ვურთიერთობთ. უსუფაშვილს არ ვგულისხმობ, მას უფრო სხვა პოზიციები აქვს და გამოკვეთილად ჩანს. არც მან და არც ანა დოლიძემ არ მოაწერეს ხელი გვარამიას ეთერში იმას, რომ გამორიცხავენ ივანიშვილთან კოალიციას. არ მინდა ცუდად გამომივიდეს, მაგრამ მგონი თვითონვე სცემენ კითხვას პასუხს. უშვებენ ივანიშვილის კოალიციასთან ურთიერთობას და მეტი რა ქნან?! ჩემთვის ეს გამორიცხულია.

_ გუბაზ სანიკიძე შემოდის თქვენს კოალიციაში?

_ ვიცი რომ საუბარი მიმდინარეობს მასთან. თუ შემოვა, ძალიან გამიხარდება.

_ პარტიასთან ერთად თუ ინდივიდუალურად?

_ ვერ გეტყვით. მე მგონი პარტიასთან ერთად. ზუსტად არ ვიცი.

ავტორი: იაგო ნაცვლიშვილი

მსგავსი სიახლეები
კომენტარები
იტვირთება...

ეს ვებ – გვერდი იყენებს cookie– ს თქვენი გამოცდილების გასაუმჯობესებლად. ვეთანხმები დეტალურად