თამარ კორძაია: “ნაცმოძრაობის” მსგავსად “ოცნებაც” ძალადობა-სისასტიკის გზას დაადგა (ინტერვიუ)

„რესპუბლიკური პარტიის“ ერთ-ერთი ლიდერი თამარ კორძაია აცხადებს, რომ „ნაციონალური მოძრაობის“ მსგავსად „ქართული ოცნებაც“ ძალადობისა და სისასტიკის გზას დაადგა და ასე ამთავრებს მმართველობას.

პოლიტიკოსმა ამის შესახებ აუდიო ჩანაწერების თემაზე „აიპრესთან“ ინტერვიუში ისაუბრა. კორძაია ამბობს, ჩანაწერებმა გამოავლინა, რომ სამოქალაქო დაპირისპირების რისკის ქვეშ ვართ.

რაც შეეხება იმას, როდესაც ხელისუფლებაში იყვნენ მაშინ არ შეუმჩნევიათ ასეთი ფაქტები და იღებს თუ არა მის წილ პასუხისმგებლობას? –  კორძაია ამბობს, რომ მაშინ ასეთი ფაქტები არ იყო და შესაბამისად პასუხისმგებლობაც მხოლოდ „ქართულ ოცნებას“ ეკისრება.

რა შეფასებას გააკეთებთ იმ ჩანაწერებზე, რაც გვესმის. რამდენად ადეკვატურია ხელისუფლება იმაზე, რაც ხდება?

დავიწყოთ იმით, რომ ჩანაწერებში მყოფი ადამიანი ვიქტორ ჯაფარიძე ამბობს, რომ მას არ სჯეროდა სუბელიანის ნათქვამი და მისი მდგომარეობა არ არის მდგრადი. დღეს გავრცელებულ ინფორმაციას ხელისუფლება ადასტურებს, რომ სუიციდის მცდელობა ჰქონდა სუბელიანს.

ხელისუფლება ხვდება, რომ სიმართლემ გამოჟონა და ახლა ცდილობენ სუბელიანი ბოლომდე გაიმეტონ და მის ფსიქიკურ მდგომარეობას დააბრალონ ყველაფერი. ანუ, ფაქტია, რომ ხელისუფლება ადასტურებს ჩანაწერის ნამდვილობას. უბრალოდ ცდილობს, რომ არ დაადასტუროს ჩანაწერში აღწერილი ფაქტების ნამდვილობა. ცდილობს სუბელიანი წარმოაჩინოს როგორც ფსიქიკურად არამდგრადი და მენტალური პრობლემების მქონე ადამიანი, რათა მან საზოგადოების თვალში ნდობა დაკარგოს. რამდენად მიიღებს საზოგადოება, ეს მეორე საკითხია. იმის ნაცვლად, რომ რეაგირება მოახდინონ და რამდენიმე მინისტრი გადადგეს, ისინი მზად არიან ადამიანი გაიმეტონ იმისთვის, რომ თავიანთი ცოდვები და დანაშაული დამალონ.

სხვა გზა ხელისუფლებას აღარ აქვს, გარდა იმისა რომ აღიაროს მარცხი, რომელმაც ახალი ვერაფერი ვერ შექმნა. დაადგა „ნაციონალური მოძრაობის“ გზას და ისეთივე სისასტიკით და ადამიანებზე ძალადობით ამთავრებს, როგორც დაასრულა „ნაციონალურმა მოძრაობამ“.

სუბელიანის გამეტებაზე ისაუბრეთ. ამ ვითარებაში ის მსხვერპლია? მის დანაშაულებს ვერ ხედავთ?

აშკარაა ის, რომ მსხვერპლი კი არა ამ ხელისუფლების ჯალათი იყო. ამ შემთხვევაში დანაშაულებრივი ხელისუფლებისთვის ხელის დაფარების კლასიკაა. ადამიანი, რომელიც აბსოლუტური შემთხვევითობის გამო მოხვდა ამ ვითარებაში, იმიტომ რომ ვერავინ წარმოიდგენდა, რომ ხორავას ტრაგედია მოხდებოდა, არასრულწლოვნებს მოკლავდნენ და აქ ამოტივტივდებოდა ეს პრობლემები. ამ ვითარებაში არსებულმა პრობლემებმა დროზე ადრე გამოჟონა. ეს ამბავი აუცილებლად გამოჟონავდა, მაგრამ დეტონატორი გახდა სრულიად მოულოდნელი, სასტიკი მკვლელობა.

თუმცა, ეს მკვლელობაც მოულოდნელი ვერ იქნებოდა. თუ ასეთი ძალადობრივი გარემოა, თუ მირზა სუბელიანი ასეთი ტიპის იყო, შეუძლებელია ბავშვები გაიზარდონ სივრცეში, სადაც ძალადობა არ იქნება. შესაბამისად ამ ძალადობამაც ლოგიკურად გამოჟონა და ასეთი შედეგი მივიღეთ. დამნაშავე გარემოა და ჩვენ ყველანი ვართ, ვინც სკოლაში ძალადობაზე თვალს ვხუჭავთ, ოჯახში ძალადობაზე ვხუჭავთ თვალს და ა. შ. ამ მოვლენამ გამოაშკარავა, რომ თურმე რამდენი ჯალათია ხელისუფლებაში, რომლებიც ჩვენების მოსაპოვებლად ადამიანებს აწამებენ, რაც ჩვენ არ ვიცით.

ჯალათი, რომელიც სახელმწიფოს საქმეს უკეთებდა, დღეს იმ ხელისუფლებამ გაიმეტა, ვისაც ის საქმეს უკეთებდა. ისინი საკუთარი თავის გადარჩენის მიზნით წავიდნენ იმაზე, რომ მათი ერთგული ადამიანი გაიმეტეს.

კითხვა იმაზეც ისმის, ხომ არ გვაქვს საქმე სისტემურ პრობლემებთან?

რა თქმა უნდა სისტემური პრობლემაა. რომელიმე სფეროა, რომელიც არ ახსენეს?! სამართალდამცავი სტრუქტურები, აღმასრულებელი ხელისუფლება, პარლამენტი. ყველა ახსენა, ყველა ჩართულია ამ პროცესში. ეს არის კლანური მმართველობა და ჩვენ დავინახეთ ეს.

თუ „ნაციონალური მოძრაობის“ დროს მართვა ხდებოდა ერთი პარტიის მიერ და იყო მონოლითი, ერთიანი ორგანიზმი და შიდა დაპირისპირებას ვერავინ ვერ გაბედავდა და მერე მოხდა ისე, რომ ხალხთან კავშირის დაკარგვამ ისინი იქამდე მიიყვანა, რომ გადავიდნენ ძალადობაზე. ამ შემთხვევაში აბსოლუტურად სხვა ვითარებაა, სამოქალაქო დაპირისპირების ზღვარზე გავდივართ. ჩვენ ვხედავთ დაპირისპირებულ ჯგუფებს, შეიარაღებულ დაპირისპირებულ ჯგუფებს, რაც ერთხელ მოქმედებაში გადავა. ანუ არა მარტო ჟღარუნი და იარაღით მუქარა იქნება, არამედ იარაღი გავარდება. იარაღის პირდაპირი გაგებით გავარდნას არ ვგულისხმობ. მაგრამ ეს ნიშნავს, რომ მათ შორის უკვე დაპირისპირება დაიწყება. რომელმაც შესაძლოა ქუჩაში გამოიყვანოს ხალხი. სამოქალაქო დაპირისპირება ნებისმიერი სახელმწიფოსთვის ყველაზე დიდი ტრაგედიაა. ამ ჩანაწერებმა ეს გამოავლინა, რომ ამის რისკის ქვეშ ვართ დღეს ჩვენ.

ეს გამოავლინა სუბელიანის ლაპარაკმა. წინა შემთხვევებში პრობლემები რა თქმა უნდა იყო, შეიძლება პარტიაში პოლიტიკური ინტრიგები იყო, მაგრამ თუ ამ ხარისხის დაპირისპირება ხდებოდა, ამის დამადასტურებელი არაფერი არ გვქონდა.

როდესაც თქვენ იყავით ხელისუფლებაში ამის შესახებ არაფერი არ იცოდით?

არა, მაშინ ასეთი რამე არ ხდებოდა. „რესპუბლიკელები“ ყოველთვის ვამბობდით, რომ ყველაზე კარგია კოალიციური მმართველობა. ჩვენ დროს იყო კოალიციური მმართველობა და პარტიები ვიყავით დისკუსიის რეჟიმში, პოლიტიკურ საკითხებზე. როდესაც დავინახეთ, რომ ბევრ რამეს ვერ აკეთებდა კოალიცია „ქართული ოცნება“, დაიწყო დაპირისპირება და დავტოვეთ კოალიცია. ამის შემდეგ „ქართული ოცნება“ დარჩა მარტო და ეს აღმოჩნდა დამღუპველი. შემდეგ გაურკვეველი წარმოშობის ადამიანებმა დაისაკუთრეს პარტიაში ძალაუფლება და გარე მაკონტროლებელი ძალა ამ პარტიისთვის არ აღმოჩნდა. ლაპარაკობენ, რომ „მრეწველები“ და „კონსერვატორები“ ჰყავთ, მაგრამ ესენი პარტიები არ არიან, ისინი არიან პერსონები ამ პარტიების სახელებით, რომლებიც შეეზარდნენ ამ დანაშაულებრივ პარტიას და იცავენ კიდეც ყველაფერს იმას რაც ხდება დღეს.

მიუხედავად იმისა, რომ საუბრობთ, რომ მმართველი კოალიციაში თქვენი ყოფნის დროს სხვა ვითარება იყო და სისტემური პრობლემები არ იყო. ამის მიუხედავად გრძნობთ თუ არა თქვენს წილ პასუხისმგებლობას იმ ვითარებაზე, რაც დღესაა?

რას გულისხმობთ პასუხისმგებლობაში? რა დააშავა „რესპუბლიკურმა პარტიამ“?

მე არ მიკითხავს, რომ „რესპუბლიკურმა პარტიამ“ რამე დააშავა, მაგრამ მაშინ იყავით ხელისუფლებაში.

ერთი ფაქტი მომიყვანეთ მსგავსი დანაშაულის, რაც წინა მოწვევის პარლამენტის დროს მოხდა და კი ბატონო.

მაშინაც აკეთებდნენ თქვენი ოპონენტები მწვავე განცხადებებს…

მაგრამ მაშინ ფაქტები არ იყო დასახელებული. თუ იყო და მაშინ არ ხდებოდა გამოვლენა ძალიან ცუდია. შეგახსენებთ, რომ იმ პარლამენტში ჩვენ ვიყავით ის ადამიანები, ვინც მოსმენების კანონის წინააღმდეგ გამოდიოდა და ეს ყველაფერი მოსმენებს და ჩაწერებს უკავშირდება. ე.წ. ოდეერების წინააღმდეგ გამოვდიოდით და გავაუქმებინეთ ეს კანონი. ჩვენ გამოვდიოდით სამართალდამცავი სტრუქტურების პოლიტიზირების წინააღმდეგ. შეგიძლიათ ნახოთ ჩანაწერები, სადაც ჩვენ აქტიურები ვიყავით ამ თვალსაზრისით.

როდესაც დავტოვეთ, რომ ჩვენი ძალა არ იყო საკმარისი ჩვენ დავტოვეთ კოალიცია და წამოვედით ცალკე. ჩვენ ვხედავდით, რომ უკვე სუს-ი იღებდა გადაწყვეტილებებს. ჩვენ არ გვინდოდა, რომ ამ პროცესის მონაწილე ვყოფილიყავით. ახლა კეთილი ინებოს „ქართულმა ოცნებამ“ და თავად აიღოს პასუხისმგებლობა ყველა იმ დანაშაულზე რაც ხდება.

ანუ დღევანდელ ვითარებაზე თქვენ არავითარ პასუხისმგებლობას არ გრძნობთ?

ობიექტურად არ არსებობს იმის დამადასტურებელი ფაქტები, რომ რაიმე ფორმით ჩვენ ვიგრძნოთ პასუხისმგებლობა. ჩვენ ვიყავით მიშა და „ნაციონალური მოძრაობის“ დანაშაულების წინააღმდეგი, ჩვენ ახლა ვართ „ქართული ოცნების“ დანაშაულების წინააღმდეგი. ნებისმიერი ხელისუფლება, ვინც ამას ჩაიდენს, იმის წინააღმდეგიც ვიქნებით. თუ ოდესმე, „რესპუბლიკური პარტია“ მოვა ხელისუფლებაში და პოტენციურად ის გახდება მსგავსი დანაშაულის მონაწილე, მისი წინააღმდეგიც ვიქნებით.

ავტორი: იაგო ნაცვლიშვილი

მსგავსი სიახლეები
კომენტარები
იტვირთება...