”შეშფოთებული ვარ საქართველოში დემოკრატიის უკუსვლის გამო”-კონგრესმენის მორიგი კრიტიკული წერილი გახარიას

ამერიკელმა კონგრესმენმა, ბრაიან ბაბინმა საქართველოს პრემიერმინისტრს კრიტიკული წერილი მისწერა. დოკუმენტში რესპუბლიკელი შეშფოთებას გამოთქვამს საქართველოში რეფორმების შეფერხებისა და საინვესტიციო კლიმატის გაუარესების გამო, ეს განსაკუთრებით ენერგეტიკულ კომპანიებს ეხება.

“როგორც კონგრესის წევრი, შეშფოთებული ვარ საქართველოს დემოკრატიის უკუსვლისა და ეკონომიკური მდგომარეობის გაუარესების გამო.

ამიტომ, ვუერთდები ჩემს კოლეგებს კონგრესიდან, რომლებმაც შეშფოთება გამოთქვეს დაპირებული დემოკრატიული რეფორმების შეჩერების, ასევე მშვიდობიანი საპროტესტო აქციებისას ძალადობის გამო.

გასულ წელს აშშ-ის წარმომადგენელთა პალატამ მიიღო “საქართველოს მხარდამჭერი აქტი”, რომელშიც ხაზგასმულია, რომ შეერთებული შტატების პოლიტიკაა მხარი დაუჭიროს საქართველოში დემოკრატიული ღირებულებების უწყვეტ განვითარებას, მათ შორის, თავისუფალ და სამართლიან არჩევნებს, კანონის უზენაეობას და ანტიკორუფციულ ძალისხმევებს;

სწორედ ამ ჩანაწერის სულისკვეთების გამო გწერთ, ვინაიდან საყურადღებოა საქართველოში დემოკრატიული ღირებულებების და თავისუფალი ბაზრის ეკონომიკის ინდიკატორების კუთხით ნეგატიური ტენდენციების ზრდა.

ამისი პირდაპირი შედეგი არის ის , რომ საქართველოში პირდაპირი ინვესტიციები შემცირდა, ვინაიდან ამერიკელი და ევროპელი ინვესტორები შევიწროების ობიექტები ხდებიან, უწყდებათ კონტრაქტები. ამის მაგალითი ტეხასური ნავთობის და გაზის კომპანია “ფრონტერაა”. ასევე, საგანგაშოა იმის ხილვა, რომ სოციალური მედიის ამერიკულმა კომპანიამ, “ფეისბუკმა” ცოტა ხნის წინ განაცხადა, რომ დახურა ფართო ქსელი, რომელიც მმართველ პარტიასთან იყო დაკავშირებული და ჰქონდა “კოორდინირებული არაავთენტური ქცევა” ოპოზიციური ხედვების წინააღმდეგ, ავრცელებდა ანტიდასავლურ განწყობებს, განსაკუთრებით შტატების მიმართ.

სწორედ გაუარესებული გარემოს გამო, აშშ-ის პრეზიდენტმა 2019-2020 წლებში დაამტკიცა კანონპროექტი კონგრესიდან თანხის გამოყოფის შესახებ, რომლებიც კონკრეტულად მიემართება საქართველოს ხელისუფლების მზარდ ანტაგონისტურ ქმედებებს დემოკრატიული ღირებულებების, თავისუფალი ბაზრის პრინციპებისა და ამერიკული ბიზნეს-კომპანიების წინააღმდეგ. პირველად საქართველოს ისტორიაში, თქვენი ქვეყანა წარმოჩინდა ნეგატიურ და გამაფრთხილებელ ჭრილში აშშ-ის მთავრობის ასიგნებების მიმართ.
იზრდება მოწოდებები სანქციების დაწესების და სხვა სასჯელების შესახებ.

ვიმედოვნებ, რომ საქართველო ააშენებს რა მის დემოკრატიულ ინსტიტუტებსა და თავისუფალი ბაზრის ეკონომიკას, რისი მტკიცე საფუძველიც იქნება „თავისუფალი და სამართლიანი არჩევნები. ასევე, გამოვთქვამ იმედს, რომ თქვენი მთავრობა გამონახავს გზებს, შეაკავოს აგრესიული ქმედებები ამერიკული კომპანიების მიმართ, ასევე იმუშავებს საგანგაშო ნიშნების აღმოფხვრაზე დემოკრატიის ეკონომიკური კეთილდღეობის და თავისუფლების მიმართ საფრთხის შესახებ,

ვეთანხმები ჩემს კოლეგა ადამ კინზინგერს. საქართველოს კორუმპირებული მთავრობა თავს ესხმის დემოკრატიულ ღირებულებებს, მიმართავს სისასტიკეს მშვიდობიანი პროტესტის მონაწილეების წინააღმდეგ და ანტაგონიზმია იმ ამერიკული ინვესტიციების მიმართ, რაც ორივე ქვეყნისთვის სასარგებლოა. ქართველი ხალხი უკეთესს იმსახურებს,” – აღნიშნულია წერილში.

ამა წლის 22 იანვარს, საქართველოს პრემიერ-მინისტრმა გიორგი გახარიამ ოთხი კონგრესმენის წერილი გაასაჯაროვა, რომლითაც ამერიკელმა კონგრესმენებმა გიორგი გახარიას მიმართეს. წერილს ხელს აწერენ კონგრესმენები – ადამ კიზინგერი, ჯერალდ კონოლი, ელიოტ ენგელი და მაიკლ მაკკოლი.

მსგავსი სიახლეები
კომენტარები
იტვირთება...

ეს ვებ – გვერდი იყენებს cookie– ს თქვენი გამოცდილების გასაუმჯობესებლად. ვეთანხმები დეტალურად