შალვა შავგულიძე: არ მინდა ისე წავიდე პოლიტიკიდან, ჩემი წვლილი არ შევიტანო სამართლის დამკვიდრების გზაზე(ინტერვიუ)

„თავისუფალი დემოკრატებისა“ და „ევროპული საქართველოს“ მთაწმინდის მაჟორიტარობის კანდიდატი პარლამენტის შუალედურ არჩევნებში შალვა შავგულიძე აცხადებს, რომ არ უნდა აქტიური პოლიტიკიდან ისე არ წავიდეს, რომ სამართლის დამკვიდრების გზაზე თავისი მოკრძალებული წვლილი არ შეიტანოს და ამიტომ სთხოვს ამომრჩეველს მხარდაჭერას. შავგულიძე გახსნილობის პირობას დებს და ამბობს, რომ წინა მოწვევის პარლამენტში თავი არც ვაკელ ამომრჩეველთან შეურცხვენია და არც მთაწმინდელებთან შეირცხვენს.

ამის შესახებ შალვა შავგულიძემ „აიპრესთან“ ინტერვიუში ისაუბრა. პოლიტიკოსი საუბრობს იმ არგუმენტებზე რატომ აირჩია მისმა პარტიამ პარტნიორად „ევროპული საქართველო“, რომლის ლიდერებსაც წლების წინ უპირისპირდებოდა. შავგულიძე „ქართულ ოცნებასთან“ დაპირისპირების პირველ სიგნალებსაც იხსენებს. „დემოკრატების“ ლიდერი იმაზეც საუბრობს, რატომ დაიწყო ბიძინა ივანიშვილმა მის წინააღმდეგ „შავი პიარის“ აგორება.

ამ და სხვა საინტერესო საკითხებზე „აიპრესთან“ ინტერვიუში შალვა შავგულიძე საუბრობს. გთავაზობთ ინტერვიუს სრულ ვერსიას:

_ რატომ გადაწყვიტეთ შუალედურ არჩევნებში და კენჭისყრა მთაწმინდის მაჟორიტარულ ოლქში, კონკრეტული სპეციფიკიდან გამომდინარე თუ შესაძლებლობა გაჩნდა იმის, რომ პარლამენტში შესულიყავით და რაღაც შეგეცვალათ?

_ არა. რაღაც კონკრეტული სპეციფიკიდან გამომდინარე ნამდვილად არა. უბრალოდ გაჩნდა შესაძლებლობა შუალედური არჩევნების სახით. ჩვენს გუნდში „თავისუფალმა დემოკრატებმა“ გადავწყვიტეთ, რომ არ გამოგვეტოვებინა ეს არჩევნები. გადავწყვიტეთ, რომ ჩემი კანდიდატურა დაგვეყენებინა. რადგან ამაზე ჩამოვყალიბდით, გვქონდა კომუნიკაცია დასავლური ორიენტაციის პოლიტიკურ ძალებთან. ეს არის „ევროპული საქართველო“, გაერთიანებული ოპოზიცია… ეს იმისთვის, რომ ერთმანეთისთვის არ შეგვეშალა ხელი და პირიქით ხელი შეგვეწყო ერთმანეთისთვის. რადგან მათ გაიზიარეს პოზიცია და „ევროპულ საქართველოსთან“ შევთანხმდით, რომ ერთობლივი ბლოკით გამოვსულიყავით, გაერთიანებულ ოპოზიციასთან მივაღწიეთ შეთანხმებას, რომ ერთმანეთს არ დავუყენებდით კანდიდატებს. გაერთიანებული ოპოზიცია უჭერს მხარს მთაწმინდაზე. ზუგდიდში კი მხარს ვუჭერთ მათ კანდიდატს ზუგდიდის მერის არჩევნებში.

მიგვაჩნია, რომ ძალიან საჭიროა მკაფიოდ დასავლური ორიენტაციის ძალების კოორდინაცია იმ ხარისხში, რა ხარისხშიც ეს რეალურია. გაერთიანებულ ოპოზიციასთან კოორდინაციის თანამშრომლობა გვაქვს, ხოლო „ევროპულ საქართველოსთან“ პარტნიორულ ხარისხში. მაგრამ, დასავლურმა ძალებმა აუცილებლად უნდა მოვნახოთ თანამშრომლობის შესაძლებლობა. ვინაიდან ჩვენ ვხედავთ ძალიან სერიოზულ შემოტევას რუსულ პოლიტიკისა. რუსეთს აქვს მცდელობა, რომ ქართულ პოლიტიკაში დაბრუნდეს რუსული ფული.

_ ვინ გყავთ მხედველობაში?

_ პირველ ყოვლისა „ქართული ოცნება“ და ბიძინა ივანიშვილი. არა თუ ხელს არ უშლის ამას, პირიქით ხელს უწყობს რუსეთის დაბრუნებას საქართველოში. ვხედავთ, როგორ თანდათან აბამს რუსულ ეკონომიკაზე ქართულ პოლიტიკას. ეს იქნება „გაზპრომთან“ ურთიერთობა თუ სხვა. ვხედავთ, როგორ არ არის გამოყენებული ევროკავშირთან თავისუფალი ვაჭრობის ძალიან დიდი რესურსი, რომელიც ასოცირების ხელშეკრულებით გვაქვს და ა. შ. ვხედავთ, რომ ივანიშვილის ხელშეწყობით „პატრიოტთა ალიანსი“ ატარებს დიდ აქციებს, ეს პარტია არის პარლამენტში და აყენებს ქართველი ხალხის მიერ გამოხატული ნების – ევროატლანტიკური არჩევანის საწინააღმდეგო საკითხს. გვთავაზობენ, რომ ავირჩიოთ ნეიტრალიტეტის თუ მიუმხრობლობის პოლიტიკა, რომელიც სხვა არაფერია თუ არა რუსეთის მიერ დაგებული ხაფანგი, რათა ამ ხაფანგში შეიტყუოს საქართველო.

_ ივანიშვილის სცენარით მოქმედებს?

_ ეს რუსული თამაშია. ვხედავთ, როგორ იბრძოლა ივანიშვილმა და მისმა ძალამ, რომ სალომე ზურაბიშვილი გამხდარიყო საქართველოს პრეზიდენტი. რა ძვირი ფასი გადაიხადა ამაში, რადგან სერიოზული დარღვევებით გაიყვანეს ზურაბიშვილი პრეზიდენტად. ის პოლიტიკოსი გაიყვანეს, რომლის ანტისახელმწიფოებრივი განცხადებები ასეთ აღშფოთებას იწვევს ჩვენს საზოგადოებაში. ვგულისხმობ აგვისტოს ომის საქართველოსთვის დაბრალებას. ცოტა ხნის წინ პრეზიდენტის რანგში გააკეთა განცხადება, რომ არ არის მიზანშეწონილი აშშ-ის ბაზების საქართველოში არსებობა. გენშტაბის უფროსმა რამდენჯერმე თქვა, რომ თითქოს ჩვენ 3 სამოქალაქო ომი გადავიტანეთ და აფხაზეთისა ცხინვალის კონფლიქტები, სადაც უშუალოდ რუსულ აგრესიად არის შეფასებული მსოფლიოს მიერ, ამას „ოცნება“ და მისი გენშტაბის უფროსი სამოქალაქო დაპირისპირებად „გვასაღებენ“.

საქმე იმაშია, რომ ბიძინა ივანიშვილი არ დაიჭერს ხელში რუსულ დროშას. ამ დარტყმას თავის თავზე არ აიღებს. მისთვის უფრო ადვილია ასე ნელ-ნელა მოხდეს რუსეთის დაბრუნება საქართველოში. ამიტომ არის ერთ-ერთი უმთავრესი ამოცანა დასავლური ორიენტაციის ძალების თანამშრომლობა სხვადასხვა დოზით.

_ რომელ ოპოზიციურ პარტიებთან წარმოგიდგენიათ გარკვეული ტიპის თანამშრომლობა. გქონდათ კოორდინაცია უსუფაშვილთან. გრძელდება?

_ სხვადასხვა სახის კოორდინაცია გვაქვს დასავლური ორიენტაციის ყველა ძალასთან. ეს აუცილებლობად მიგვაჩნია.

_ რაც შეეხება იმ პარტიებს, რომლებიც მკვეთრად დაპირისპირებულები არიან ივანიშვილთან, მაგრამ არც პროდასავლურ ფლანგზე არ დგანან, პირიქით პრორუსულ პარტიებად უფრო მოიხსენიებენ. მათთან გექნებათ რაიმე კოორდინაცია?

_ მე არ ვიცი რომელ პარტიებს გულისხმობთ.

_ მაგალითად ბურჯანაძის ან კუკავას პარტიებს და ა. შ.

_ არ მგონია, რომ საბოლოოდ პრორუსული ორიენტაციის პარტიები ურთიერთდაპირისპირების რეჟიმში დარჩებიან. თანდათანობით იკვეთება, რომ პოლიტიკური სპექტრი 2 ბანაკად დაჯგუფდება. ეს იქნება პრორუსული და პროდასავლური. ამ ორ ბანაკს შორის მოუწევს ამომრჩეველს არჩევანის გაკეთება.

_ გვახსოვს თქვენი განცხადებები  სააკაშვილზე და მის ფაქტორზე, როდესაც ის ხელისუფლებაში იყო. დღესაც აკეთებს პერიოდულად ხმაურიან განცხადებებს. იმასაც ვხედავთ, რომ „ნაცმოძრაობა“ კი იშლება, მაგრამ საჭირო დროს ისევ ერთიანდებიან. ეს როგორ შეიძლება აიხსნას და ხომ არ ხედავთ რისკს, რომ სააკაშვილი და მისი გუნდი იგივე გზას დაადგეს, რა პოლიტიკასაც წლების განმავლობაში ატარებდა?

_ ცოტა მიჭირს კითხვის დანახვა, ვერ გამოგყევით.

_ სააკაშვილის განცხადებები როგორია თქვენი აღქმით?

_ რომელ განცხადებებს გულისხმობთ.

_ მაგალითად მოვატანინებ ბიზნესმენებს ფულს, დავაყაჭინებ ივანიშვილს მილიონებს და ა. შ.

_ „თავისუფალი დემოკრატები“ შეიქმნა მაშინდელი ხელისუფლების ოპოზიციურ ძალად. რა თქმა უნდა არ ვეთანხმებოდით იმ უსამართლობას, რასაც ის პოლიტიკური ძალა სჩადიოდა. სადაც არის ძალადობა, თუკი არის ვიღაცისთვის ფულის წართმევის მცდელობა და თუკი ვინმე ამას აპირებს, ეს მიუღებელია. მარტივად რომ ვთქვათ სამართლის უზენაესობა აუცილებელია სახელმწიფოსთვის. თუ ვერ არის სამართლის უზენაესობა, იქ ვერ არის შემდგარი სახელმწიფო. ამას ვხედავდი წინა ხელისუფლების დროსაც. ამიტომ ვებრძოდი ჯერ როგორც ადვოკატი და მერე როგორც პოლიტიკოსი.

სამწუხაროდ, იგივე აუცილებლობას ვხედავ ამ ხელისუფლების დროსაც, რომელმაც გადმოიბარა კონტროლირებადი სასამართლო, პროკურატურა… ინსტიტუციონალურად მის მიერ გატარებული პოლიტიკით კიდევ უფრო დაიქვემდებარა და პოლიტიკური კონტროლი გააძლიერა. მე და ჩემს პოლიტიკურ ძალას ამ თვალსაზრისით პოზიციები არ შეგვიცვლია. თუკი სადმე იყო, არის და მომავალში იქნება უკანონობა, ამის წინააღმდეგ საბრძოლველია. ამ ბრძოლაში პარტნიორობა საჭიროა იმ პარტიებთან, რომლებსაც აქვთ ღირებულებითი თანხვედრა ძირითად სტრატეგიულ მიმართულებებში. ასეთი ხაზი არის დასავლური ორიენტაცია. თუკი სააკაშვილი ან ვინმე სხვა იტყვის რამეს ისეთს, რაც მიუღებელია სამართლებრივი სახელმწიფოსთვის ამას არ დავეთანხმებით და თუ მის გატარებას შეეცდება, ამას მოჰყვება სათანადო რეაქცია.

_ კითხვა იცით სად ჩნდება? სად არის იმის გარანტია, რომ ისინი იგივე გზას დაადგებიან, რაც იყო 2012 წლამდე? იქნება ეს სააკაშვილი თუ „ევროპული საქართველოს“ ზოგიერთი წარმომადგენელი. ან თუნდაც ის გზა, რასაც დღევანდელი ხელისუფლებაც დაადგა. ისიც გვახსოვს, რომ როცა გიგი უგულავამ მთაწმინდის პარკი პატარკაციშვილების ოჯახს დაუბრუნა და სურათები გადაიღო, მაშინ თქვენ გააკრიტიკეთ ეს ქმედება სწორედ იმ გახმაურებული საქმეების გამო. იგივე რეაქცია მოჰყვა „ევროსაქართველოსთან“ ბლოკის შექმნის გამო ყბადაღებული თქვენი და უგულავას შამპანურების ჭიქების კადრებს. რა პასუხი გაქვთ?

_ მე ვფიქრობ, რომ შამპანურების ჭიქებზე სპეკულირებას ჩვენი საზოგადოება არ მიიღებს და ძალიან გაგებით უყურებს. როცა ხდება რაღაც გაერთიანება, ახალი კეთილი საქმის დაწყება, ეს არის სიმბოლური ჟესტი. გარკვეული მედიასაშუალებები ატრიალებდნენ ამ კადრებს. არ ღირს ამაზე ყურადღების დათმობა.

რაც შეეხება გარანტიებს, რა თქმა უნდა ასეთი გარანტიები არასდროს არაფერთან დაკავშირებით არ არის. ჩვენ „თავისუფალი დემოკრატები“, რომელიც კოალიციის ერთ-ერთი ძლიერი შემადგენელი ნაწილი ვიყავით, სამართლის მოტანას ვპირდებოდით საზოგადოებას. გარანტია გვქონდა, რომ ივანიშვილი ნამდვილად იბრძოლებდა სამართლისთვის? აღმოჩნდა, რომ არც კი აპირებდა ბრძოლას ამ მხრივ. სწორედ ამიტომ, რომ უღალატა ამ პრინციპებს, ჩვენ დავტოვეთ კოალიცია და ოპოზიციაში წამოვედით.

ასეთ შემთხვევაში გამოდის, რომ საერთოდ არ უნდა იმოქმედო. რადგანაც „ოცნებაც“ წინა ხელისუფლების მსგავსად დაადგა ამ უსამართლობის გზას, სწორედ ამიტომ დავუპირისპირდით. დღეს გვაქვს „ევროპულ საქართველოსთან“ სტრატეგიული თანხვედრა ამ უსამართლობაზე. ამიტომ ძალისხმევის არგაერთიანებაზე უარის თქმა არ შეიძლება. მარტო ვერც მე და ვერც სხვა პარტია. გარანტიები არა თუ პოლიტიკაში, ცხოვრებაშიც კი არ არის. ძალისხმევის გაერთიანებაზე არ უნდა თქვა უარი იმის შიშით, რომ თქვენი მოსაზრებები ხვალ და ზეგ შეიძლება რაღაცაში გაიყოს.

_ პოლიტიკურ ნაბიჯზე ისაუბრეთ, მორალურ მხარესაც გახსენებენ ხოლმე რამდენად მორალური იყო ბლოკის შექმნის გადაწყვეტილება?

_ აბსოლუტურად მორალური იყო. ჩემი მორალური პოზიცია სამართალთან დაკავშირებით აბსოლუტურად არ შეცვლილა. როგორც მიმაჩნდა, რომ უსამართლობასთან შეგუება დაუშვებელი იყო „ნაცმოძრაობის“ ხელისუფლების დროს ასევე დაუშვებელია „ოცნებასთან“ შეგუება. მე მორალური პოზიცია არ შემიცვლია!

_ რა ახსნა აქვთ იმაზე, რომ პოლიტიკური ლიდერები, რომლებიც ერთ დროს მიუღებლები იყვნენ რაღაც პერიოდის შემდეგ მისაღებები გახდნენ?

_ ეს არის პოლიტიკური პასუხისმგებლობა ქვეყნის მომავალზე. თუ ხედავ, რომ აუცილებელია პარტნიორობა ძალებთან, რომლებთანაც გაქვს ღირებულებითი თანხვედრა, რაც დაკავშირებულია ქვეყნის მომავალზე, მაშინ ეს აბსოლუტურად გასაგებია.

_ თქვენი პარტიის სახელით რომ გეყარათ კენჭი, ამის შესაძლებლობას არ ტოვებდა?

_ პრაგმატულად არ ვიცი, ხმებს მეტს მივიღებდი თუ ნაკლებს, მაგრამ აქ სხვა რამეს უნდა დანახვა. აუცილებელია სხვა რამის დანახვა. აქ არ არის პრიორიტეტული დღეს მთაწმინდაზე შედეგის მიღწევა. როდესაც ხედავ პრორუსული ძალების გააქტიურებას, რომელსაც ხელს უწყობს ივანიშვილი, ამ პირობებში თუ პასუხისმგებლობის მქონე პარტია  და პოლიტიკოსი ხარ, დასავლურ პოლიტიკურ ძალებთან შეხების წერტილები უნდა ეძებო.

გაერთიანებულმა ოპოზიციამ და „ევროპულმა საქართველომ“ საპრეზიდენტო არჩევნებზე მილიონამდე ხმა მიიღო. რა უნდა ვქნათ? იმ ორმა მილიონმა ამ 1 მილიონს საქართველოს მოქალაქეობაზე უნდა ათქმევინოს უარი თუ სამოქალაქო დაპირისპირება უნდა დაიწყონ მათ?! ასე დაპირისპირება ხელს მხოლოდ რუსეთს აძლევს. ამ მოჯადოებული წრიდან უნდა გამოვიდეთ. საზოგადოება მტრულ ბანაკებად არ უნდა დავქსაქსოთ. წარსულის გამოცდილებიდან დასკვნები უნდა გამოვიტანოთ და არა მტრობა და შური.

_ ხაზი გაუსვით ევროატლანტიკურ გზაზე საერთო ხედვას „ევროსაქართველოსთან“. კიდევ რა არის ის მთავარი პრინციპები, რომელიც ამ პარტიასთან გაერთიანებთ?

_ მარტო ეს არ არის. ეს არის ძირითადი მიმართულება, მაგრამ სხვა რამეშიც გვაქვს თანხვედრა და ამანაც განაპირობა ჩვენი პარტნიორობა. ერთნაირად ვხედავთ ავტოკრატიული მმართველობის დაუშვებლობას. ერთნაირად მიგვაჩნია, რომ ხელისუფლება ძალაუფლების განაწილებისა და ურთიერთკონტროლის პრინციპით.

_ დაინახეთ, რომ წარსული შეცდომები გაანალიზეს?

_ ფაქტობრივად ავტოკრატიული მმართველობის მიუღებლობის ნიშნით მოხდა მათი გამოყოფა „ნაციონალური მოძრაობიდან“. ჩვენი ურთიერთობისას ცხადია, რომ ეს არის ერთ-ერთი აუცილებელი ღირებულება.

_ თუმცა, იმ ხელისუფლების მთავარ შემოქმედებში ამ პარტიის ზოგიერთ ლიდერსაც ასახელებენ ხოლმე…

_ ვიმეორებ. თუკი როდესღაც ვინმეს რამე დაუშავებია და ეს აღწევდა დანაშაულის ხარისხს, ეს პოლიტიკის სფერო არ არის და სამართალს უნდა მოეკითხა. სამართალი პროკურატურა-სასამართლოანად „ქართული ოცნების“ ხელშია 7 წელია. კონკრეტული პირების პასუხისმგებლობაც დადგა.

ჩვენ ქვეყანას გაცილებით მეტი საფრთხე ემუქრება, ვიდრე იმაზე ფიქრი, რომ ადრე ესენი ხომ იმ ხელისუფლებაში იყვნენ, რომელთა ზოგიერთი წარმომადგენელი დანაშაულებს ჩადიოდა და ა. შ. გაცილებით მეტი საფრთხე გვემუქრება ჩრდილოელი მეზობლისგან და ეს უნდა იყოს პრიორიტეტი. მომავალი პრიორიტეტულია, მაგრამ ეს იმას არ ნიშნავს, რომ თუკი ვინმემ რამე დააშავა, მან პასუხი არ აგოს.

_ ძალიან მწვავედ დაგიპირისპირდათ პირადად ივანიშვილი, შემდეგ უკვე მისი გუნდის წევრებიც. რატომ მაინც და მაინც თქვენ? იმიტომ, რომ ასეთი მნიშვნელოვანია მისთვის ეს არჩევნები თუ თქვენი პიროვნული მიუღებლობა აქვს?

_ კარგი შეკითხვაა. აქ წამყვანი 2 მიზეზია. პირველი და უმთავრესი ის, რომ ივანიშვილი გააღიზიანა და შეაშფოთა ჩვენი და „ევროპული საქართველოს“ გაერთიანებამ. მან დაინახა, რომ რეალურად დასავლური ორიენტაციის ძალები, რომლებიც მისი კონტროლის ქვეშ არ არიან, ერთიანდებიან და რაღაც გაერთიანება ხდება. ისიც კარგად იცის, რომ კიდევ შემოგვემატება სხვა მისგან არაკონტროლირებადი დასავლური ორიენტაციის სუბიექტები თუ ძალები.

მეორე, ივანიშვილს ისე სჭირდება მართვადი და კონტროლირებადი სასამართლო, რომ ის წავიდა ასეთ არაპოპულარულ ნაბიჯზე, რომ არა მხოლოდ ინსტიტუციურად გაამყარა კონტროლი სასამართლო ხელისუფლებაზე. არამედ პერსონალურად იმ მოსამართლეებსაც ვერ შეელია, რომლებმაც თავი გამოიჩინეს წინა ხელისუფლების მსახურებით და მათ ჩააბარა სასამართლო ხელისუფლება.

არსებობს ერთი კონკრეტული საქმე – გირგვლიანის საქმე, სადაც მე გახლდით ადვოკატი, ხოლო მოსამართლე სასამართლოს ლიდერად აღიარებული, წინა ხელისუფლების მსახურებით გამორჩეული მოსამართლე მურუსიძე. ბიძინა ივანიშვილს აქვს მცდელობა, რომ ქართულ საზოგადოებას ახალი რეალობა შესთავაზოს, რაც იმაში მდგომარეობს, რომ დადებითად წარმოაჩინოს გირგვლიანის საქმესთან დაკავშირებული მოსამართლე მურუსიძე, რომლის მიერ გამოტანილმა განაჩენმაც ასე აღაშფოთა ევროპული სასამართლო და ჩვენ ვიცით რა შეფასებაც მისცა ევროპულმა სასამართლომ. ასევე ცდილობს, რომ ნეგატიურად წარმოაჩინოს ჩემი, როგორც იმ საქმის ადვოკატის როლი.

_ რეალურად დაგაზარალათ თქვენ ამ „შავმა პიარმა“?

_ მე ვფიქრობ, რომ ვერ დამაზარალა. ივანიშვილს მგონი ჰგონია, რომ მას შეუძლია რეალობა შეცვალოს. ჰგონია, რომ საზოგადოებას რასაც უნდა იმას ეტყვის და ეს საზოგადოებისთვის უკრიტიკო ჭეშმარიტება იქნება.

2012 წელს როცა მე წარმადგინა ვაკის მაჟორიტარად, მაშინ აცხადებდა, რომ შავგულიძე ისეთი ადვოკატია, რომ მან გირგვლიანის საქმეც კი მოიგო სტრასბურგში. ასეთი მებრძოლი და კვალიფიციური კადრი გვჭირდება გუნდშიო. მაშინ მე გავხდი ვაკის მაჟორიტარი. მას აქვს მომხმარებლური დამოკიდებულება როგორც მოვლენების, ისე ადამიანების მიმართ. მაშინ სჭირდებოდა ნაცმოძრაობის ხელისუფლების წინააღმდეგ გირგვლიანის საქმის გამოყენება. რადგან მე ვიყავი ამ კოალიციის შემადგენლობაში საჭირო იყო ჩემი პოზიტიურად წარდგენა საზოგადოებისთვის. რამდენიმე წელში ის მოსამართლეები დასჭირდა, რომლებიც ხელისუფლების მსახურებაში არიან გამოცდილები, მაგრამ ვინაიდან გირგვლიანის საქმე ნეგატიურად არის შეფასებული ევროსასამართლოს მიერ, ვერ იტყვის ეს საქმე კარგიაო. ვიღაცა ხომ ცუდი უნდა იყოს, ამიტომ მოიფიქრა ეს. თქვა, რომ მოსამართლე კარგი იყო იმ საქმეში და ადვოკატი შავგულიძე იყო ცუდი. რეალობის შეცვლას ცდილობს. ამბობს დღეს ასე მჭირდება და ასე ვიტყვი, რომ მოსამართლე მურუსიძე იყო დადებითი პიროვნება, ხოლო ადვოკატი შავგულიძე ნეგატიური.

_ ცოტა წარსულში დავბრუნდეთ და გაიხსენეთ, რა იყო თქვენი პოლიტიკური გუნდისთვის, გნებავთ პირადად თქვენთვის ის მთავარი მიუღებელი ფაქტორი ან წინააღმდეგობა, რის გამოც კოალიცია „ქართული ოცნება“ დატოვეთ?

_ პირველი ეს იყო უსამართლობა. ჩვენ ვნახეთ კონკრეტულ საქმეებზე უსამართლობა. ამის ერთ-ერთი თვალსაჩინო მაგალითი იყო ე. წ. კაბელების საქმე, როდესაც პოლიტიკური მიზნებიდან გამომდინარე მოხდა უსამართლობა ივანიშვილის დავალებით.

_ ეს იყო პირველი წინააღმდეგობა?

_ პირველი არა, ეს იყო ერთ-ერთი დამაგვირგვინებელი. სულ თავიდან რომ გითხრათ, ხელისუფლებაში მოსვლიდან ძალიან მალევე გამოჩნდა წინააღმდეგობა. მე ვიყავი იურიდიული კომიტეტის თავმჯდომარის პირველი მოადგილე გახლდით და სამართლის სფეროს რეფორმაში ვიყავი ჩართული თავიდან ბოლომდე. ჩემთვის ძალიან მალევე გახდა ნათელი, როგორ ხელს გვიშლიდა ბიძინა ივანიშვილი.

_ სასამართლო რეფორმის ტალღები გაქვთ მხედველობაში?

_ დიახ. ჩვენ გვქონდა მოფიქრებული კარგი სასამართლო რეფორმა, მაგრამ თანდათანობით დაიწყო ამ რეფორმის დაბლოკვა და გაფუჭება.

_ უკავშირდებოდა თუ არა მათ შორის მართლმსაჯულების ხარვეზების დამდგენი კომისიის შექმნის ჩავარდნასაც?

_ რა თქმა უნდა. ეს იყო ერთი საკითხი. ეს კანონპროექტი დავამუშავეთ, ნორვეგიაშიც გახლდით, ვინაიდან ეს პრაქტიკა იქ არსებობს. ასეთი კომისია დღესაც მოქმედებს იქ და ის მუდმივმოქმედია. შევისწავლეთ მათი მოდელი. ეს კანონპროექტი გავამზადეთ, ვენეციის კომისიაც გაიარა, მაგრამ აღმოჩნდა, რომ ივანიშვილს მისი შექმნის განზრახვა არ ჰქონდა.

_ ივანიშვილმა დაბლოკა?

_ რა თქმა უნდა. სხვას ვის ჰქონდა ასეთი ძალაუფლება, რომ უკვე გამზადებულ კანონპროექტზე უცებ მთავრობას ეთქვა, რომ ჩვენ ამას ვერ შემოვიტანთ.

არა მხოლოდ ეს კანონპროექტი, სასამართლო რეფორმის სხვადასხვა საფეხურები არსებობდა. უკვე ინიცირებული კანონპროექტს შიგნავდნენ და კანონპროექტიდან თანდათანობით უკან გაჰქონდათ ის პოზიტიური დებულებები, რაც შესაძლებელს ხდიდა კარგი რეფორმის გატარებას. თანდათანობით მომიწია კონფლიქტში შესვლა სასამართლო რეფორმასთან დაკავშირებით, პროკურატურისა თუ მოსმენების კანონთან დაკავშირებით. ძალიან სერიოზულ კონფლიქტში შევდიოდი საკუთარ პოლიტიკურ გუნდთან, ვინაიდან მაშინ კოალიციას წარმოვადგენდით.

_ ხომ არ გგონიათ, რომ შეცდომა იყო ის, რომ ღიად არ საუბრობდით წინააღმდეგობების თაობებზე და მას გუნდის შიგნით განიხილავდით?

_ იცით რა? რაღაც ეტაპზე თავიდანვე შენ ვერ მისცემ თავს უფლებას, რომ პოლიტიკური ერთიანობა დაარღვიო პირველივე სიგნალისთანავე. რა თქმა უნდა, რაღაც გუნდში უნდა გადაწყდეს. გუნდში უნდა იყოს კამათი. ვიმეორებ, მე სასამართლოსთან დაკავშირებით სერიოზული კონფლიქტი მქონდა გუნდში. ასევე პროკურატურისა და მოსმენების კანონებთან დაკავშირებით. როდესაც უკვე ნათელი ხდება რა სურს იმ გუნდის ლიდერს, როგორც ეს მოხდა ივანიშვილის შემთხვევაში, მაშინ უკვე უარს ამბობ იმ პოლიტიკურ გუნდში დარჩენაზე. ამას პირველივე სიგნალზე ვერ დაიყვირებ, ვინაიდან შეიძლება დააზიანო უფრო დიდი პოლიტიკური ინტერესი. იქნებ შესაძლებელია რაღაცის გამოსწორება. მაგალითად, სანდრო ბარამიძე უფრო გვიან წამოვიდა იუსტიციის მინისტრის პირველი მოადგილეობიდან და დღეს ერთად ვართ „თავისუფალ დემოკრატებში“. რაღაც დროს ხვდები, რომ აქ უკვე შეუძლებელია რაიმე პოზიტივის მოტანა და მაშინ იყრება გზები.

_ რა გაქვთ სათქმელი ამომრჩევლისთვის, რისი გაკეთება ვერ შეძელით პარლამენტში და რატომ უნდა დაგიჭირონ მათ მხარი კიდევ ერთხელ?

_ გულწრფელად ვეუბნები ამომრჩეველს, რომ ისე არ წავიდე აქტიური პოლიტიკური ცხოვრებიდან, რომ ჩემი მოკრძალებული წვლილი არ შევიტანო ამ ქვეყანაში სამართლის მოტანის კუთხით. მქონდა იმედი, რომ როდესაც 2012 წელს მოვედით, მართლაც მოვიტანდით ქვეყანაში სამართალს, სამწუხაროდ „ქართულმა ოცნებამ“ და კონკრეტულად ბიძინა ივანიშვილმა არ მოგვცა ამის შესაძლებლობა და მოგვიწია ოპოზიციაში წასვლა. მინდა დავბრუნდე პარლამენტში და გავაგრძელო მუშაობა ამ მიმართულებით.

ახლაც დამუშავებული გვაქვს სასამართლოს რადიკალური რეფორმის კონცეფცია. თუკი 2012 წელს გაცილებით რბილი რეფორმით იყო შესაძლებელი სამართლის უზენაესობა, ახლა უფრო რადიკალური რეფორმაა საჭირო, მაგრამ უსაშველო არ სჭირს სისტემას, თუ პოლიტიკური ნება იქნება. რა თქმა უნდა პრიორიტეტულად ჩემი საქმიანობა მიმართული იქნება სასამართლო რეფორმის განხორციელებაში. იგულისხმება უშუალოდ როგორც სასამართლოს რეფორმა, ასევე პროკურატურის, სასამართლო ორგანოების – საგამოძიებო სისტემაც იგულისხმება და ა. შ. დიდი სურვილი მაქვს, ამაში ჩემი მოკრძალებული წვლილი შევიტანო. ჩვენ კონცეფციას ძალიან ცოტა დრო დასჭირდება საკანონმდებლო ინიციატივის სახე რომ მიეცეს და ამას დავაყენებ ამ საკითხებს საკანონმდებლო ორგანოში.

_ უშუალოდ მთაწმინდელებისთვის რას შეცვლით?

_ ის რესურსი რაც მაჟორიტარს გააჩნია, ამ შესაძლებლობების ფარგლებში მაქსიმუმს გავაკეთებ. ადრე ვაკის მაჟორიტარი ვიყავი და თავი არ შემირცხვენია. მრავალი სისტემური პრობლემებია. 30 წელი ვცხოვრობდი მთაწმინდაზე, სულ ცოტა ხნის წინ გადმოვედი და კარგად ვიცი რა პრობლემებიცაა. მაგალითად ძეგლის სტატუს მინიჭებული შენობების სისტემური პრობლემა. ის არის ნგრევადი, მაგრამ ძეგლის სტატუსი არ აძლევს უფლებას ადგილობრივ მოსახლეობას, რომ შეაკეთონ. სახელმწიფო კი არ ზრუნავს ამაზე. იმ შენობებში ცხოვრება სიცოცხლისათვის სახიფათოა და ამ პრობლემებს სჭირდება გადაჭრა. ასევე არის უკანონო მშენებლობების პრობლემა. ეს საკითხები პრიორიტეტულად ადგილობრივი ხელისუფლების – გამგეობისა და მერიის პრეროგატივა, მაგრამ პარლამენტის მაჟორიტარსაც გაქვს ბერკეტები, რომ ეფექტურად შეძლო მოსახლეობის დახმარება. არის საკითხები როცა გამგეობასა და მერიას უნდა მიმართო და არის საკითხები, რომელიც პარლამენტის ტრიბუნიდან უნდა დააყენო.

_ ამომრჩეველთან ისეთივე გახსნილი იქნებით, როგორც არჩევნების დროს?

_ არ მინდა საკუთარი თავის ქება, მაგრამ 4 წელი ვაკის მაჟორიტარი ვიყავი. ჩემი სამაჟორიტარო ბიურო დილის 10 საათიდან საღამოს 7 საათამდე მუშაობდა ყოველდღე შაბათ-კვირის გარდა. ყველა განცხადების აღრიცხვა ხდებოდა. იქნებოდა ზეპირი თუ წერილობითი. ასევე იყო მიღების დღეები, ასეთ დღეებში ზოგჯერ შუა ღამემდეც გვიწევდა დარჩენა, ვიდრე მოსული ამომრჩევლებს არ ვიღებდით. ვახდენდით პრობლემების იდენტიფიცირებას და მათი გადაჭრისთვის ბოლომდე ვიხარჯებოდით ჩვენი შესაძლებლობების ფარგლებში. თავი არც ვაკის ამომრჩეველთან შემირცხვენია და იგივეს ვაპირებ მთაწმინდაზეც.

_ თქვენი შანსები შეაფასეთ და დაასახელეთ მთავარი კონკურენტიც.

_ კონკურენტად და ოპონენტადაც რა თქმა უნდა სახელისუფლებო ძალის წარმომადგენელს მივიჩნევ. შანსებს რაც შეეხება, მე არ შევაფასებ არც კონკურენტებისას და არც ჩემსას. საკუთარ თავსაც და მათაც კონკურენტულ საარჩევნო გარემოში მონაწილეობას ვუსურვებ.

_ დღეს სამართლიან გარემოს ხედავთ?

_ სამწუხაროდ ვერ ვხედავ.

_ რეალური შესაძლებლობა არის, რომ ფინანსური რესურსი იქნება ადმინისტრაციული თუ სხვა, რაც რესურსიც მას აქვს, მართლაც რეალური კონკურენცია გაუწიოთ?

_ თუ შევხედავთ წინა არჩევნების გამოცდილებას ვხედავთ, როგორ ცუდ არჩევნებს ატარებს ხელისუფლება. მოსყიდვა და ადმინისტრაციული რესურსის გამოყენება სულ უფრო და უფრო მეტად არის გამოყენებული ხელისუფლების მხრიდან. ვნახეთ საპრეზიდენტო არჩევნებმა, როგორ ცალსახად ნეგატიური შეფასებები დაიმსახურა საერთაშორისო აქტორების მხრიდან. ვითვალისწინებ ამ რეალობას და ვფიქრობ, რომ მთაწმინდაზეც ასე მოიქცევა ხელისუფლება, მაგრამ სურვილი მაქვს რეალურად კონკურენტული და სამართლიანი გარემოს შექმნა.

_ ინტერვიუს ბოლო სუს-ის განცხადებაზე მოგვახსენეთ თქვენი პოზიცია, რომელიც მან მალხაზ მაჩალიკაშვილთან დაკავშირებით გაავრცელა და თქვა, რომ საკუთარ ძმის შვილთან ერთად ტერორისტულ აქტს გეგმავდა.

_ ძალიან ცუდი და არასახელმწიფოებრივი განცხადებაა. სამართლებრივადაც სრულიად გაუმართლებელია. თუ ეს ჩანაწერები რეალურია და არსებობს საფუძველი ვარაუდისა, რომ მალხაზ მაჩალიკაშვილი რაღაც დანაშაულს ამზადებდა, ამის პიარ-კამპანიაში გამოყენება სამართალდამცავი ორგანოების მხრიდან დაუშვებელია. მათ ჯერ უნდა შეემოწმებინათ ამ ჩანაწერების ავთენტურობა, შემდეგ მიეცათ სამართლებრივი შეფასება და ემოქმედათ სამართლებრივი საჭიროებებიდან და მოთხოვნილებებიდან გამომდინარე. მათ გაავრცელეს ჩანაწერი, რომლის ავთენტურობა დადგენილი ექსპერტიზის მხრიდან ჯერ არ არის დადგენილი და ამას იყენებენ რაღაც პოლიტიკური მიზნებისთვის. ამაშია უბედურება. „ოცნებამ“ ვერ დაინახა ის აუცილებლობა, რომ არ შეიძლება სამართალწარმოება პოლიტიკურ მიზნებს მოახმარო.

სამწუხაროდ ბიძინა ივანიშვილმა საკუთარ მოხმარებად აქცია სასამართლოც და ყველაფერიც. ასე, რომ ამაზე უფრო ცუდ საქციელს, სახელმწიფოსთვის დამაზიანებელს ისინი ვერ ჩაიდენდნენ. კიდევ ერთი არასახელმწიფოებრივი ხედვაა ის, რომ მაშინ როცა პანკისის რეგიონში ჯერ ამ სპეცოპერაციამ, რაც მაჩალიკაშვილების ოჯახში ჩაატარეს ასეთი ფეთქებადი სიტუაცია შექმნა, მერე ამას დაემატა ის, რომ 2 წელი გადის და ვერ იძიებენ ამას, რაც ამწვავებს იქ სიტუაციას. ვნახეთ ცოტა ხნის წინ სპეცრაზმის უგუნური შეყვანა, რამაც იქაური მოსახლეობის ასეთი აღშფოთება გამოიწვია. ახლა კიდევ აგრძელებს იგივეს. მე ვფიქრობ, „ქართული ოცნებამ“ ეს ანტისახელმწიფოებრივად, განზრახ გააკეთა, რომ არ დამშვიდდეს სიტუაცია პანკისის რეგიონში. ვის აძლევს პანკისის რეგიონში სიტუაციის არ-დამშვიდება? მხოლოდ რუსეთს. ეს კიდევ ერთი არგუმენტია იმის გასამყარებლად, რომ ქართული ოცნება და მისი უსაფრთხოების სამსახური იქნება თუ სასამართლო რუსეთის ინტერესებს ემსახურება და არა ჩვენი ქვეყნის.

ჯერ ავთენტურობა არ აქვთ დადგენილი და პიარკამპანიას ატარებენ. ამის ჩამდენი გამომძიებელი და პროკურორი პასუხისგებაში უნდა მისცე. თანამდებობა მაინც უნდა დაატოვებინო მათ. ეს მისი სამსახურებრივი ვალდებულების საწინააღმდეგო მოქმედებაა.

ავტორი: იაგო ნაცვლიშვილი

მსგავსი სიახლეები
კომენტარები
იტვირთება...