კაპანაძე: თაკო ჩარკვიანი ან მისი პარტიის წარმომადგენელი ოპოზიციურ შეხვედრებზე ისევ დადის

“ევროპული საქართველოს” ერთ-ერთი ლიდერი სერგი კაპანაძე აცხადებს, რომ “ერთიანი საქართველო – დემოკრატიული მოძრაობის” ნინო ბურჯანაძის საგარეო პოლიტიკა მისთვის ისევ მიუღებელი და ერთგვარი წითელი ხაზია. დეპუტატის თქმით, ბურჯანაძესთან მხოლოდ საარჩევნო რეფორმირების ფარგლებში საუბრობენ.

კაპანაძეს გავახსენეთ, რომ მაგალითად ამ თემის გამო ოპოზიციური მოლაპარაკებების ფორმატი დატოვა პარტია “კანონი და სამართალის” დამფუძნებელმა თაკო ჩარკვიანმა, რაზეც დეპუტატმა გვითხრა, რომ ჩარკვიანი ისევ დადის შეხვედრებზე, ის ან მისი პარტიის წარმომადგენელი.

ამის შესახებ პარლამენტის ვიცე-სპიკერმა “აიპრესთან” ინტერვიუში ისაუბრა, რომლის სრულ ვერსიასაც მკითხველს მოგვიანებით შევთავაზებთ, იქამდე კი ინტერვიუს ამ მონაკვეთს ვთავაზობთ.

_ როდესაც ოპოზიციაზე ვსაუბრობთ, კითხვებს აჩენს ნინო ბურჯანაძესთან თანამშრომლობა, რაზეც მუდმივად წითელი ხაზი გქონდათ „ევროპულ საქართველოს“ გავლებული მისი პრორუსული პოლიტიკის გამო, მაგრამ გარკვეული თანამშრომლობა შედგა. რით აიხსნება ეს? ეს იყო უკიდურესი აუცილებლობა  შექმნილი რეალობიდან გამომდინარე თუ მის ელექტორატზეც დაიწყეთ მუშაობა?

_ წითელი ხაზი მასთან ისევ გვაქვს. მაგრამ თქვენი კითხვაში თავიდან ბოლომდე არასწორი დეფინიციაა. ჩვენ არ გვაქვს თანამშრომლობა ბურჯანაძესთან, ჩვენ გვაქვს თანამშრომლობა ყველა პარტიასთან მხოლოდ საარჩევნო სისტემის რეფორმირების ირგვლივ. სხვა არაფერზე არ არის თანამშრომლობა, არცერთ შინაარსობრივ და თემატურ საკითხზე. აქედან გამომდინარე თქვენი კითხვის მეორე ნაწილი – დავიწყეთ თუ არა მის ელექტორატზე მუშაობა აზრს კარგავს.

ის პოლიტიკური ძალები, რომლებიც ვიკრიბებით „ლეიბორისტების“ ოფისში, გაერთიანებული ვართ ერთადერთი მოსაზრების გამო, რომ გვქონდეს სამართლიანი პროპორციული არჩევნები. იმის იქით ჩვენს შორის თანამშრომლობა არ არის – შინაარსობრივ საკითხებზე, იდეოლოგიურ საკითხებზე, ეკონომიკურ საკითხებზე საუბარი არ ყოფილა, განსაკუთრებით კი საგარეო პოლიტიკურ საკითხებზე თანამშრომლობა არც ყოფილა და არც გვექნება.

_ ერთ-ერთმა პარტიამ დატოვა თქვენი მოლაპარაკებები, რომლისთვისაც მიუღებელი იყო ბურჯანაძესთან ერთად ჯდომა?

_ ვინ?

_ თაკო ჩარკვიანმა.

_ არა, ისევ მონაწილეობს თაკო ჩარკვიანი ამ მოლაპარაკებებში.

_ საჯაროდ ასე ამბობს. მის მიღმა რა ხდება, არ ვიცი.

_ ფაქტია, რომ მონაწილეობს.

_ დადის იმ შეხვედრებზე?

_ კი, მე როცა ვიყავი… იქ არის ხოლმე ის ან მისი პარტიის წარმომადგენელი.

ბურჯანაძის საგარეო პოლიტიკურ თემებზე მიუღებლობა ალბათ ყველაზე მეტად ჩვენ გვაქვს. ვიმეორებ, ეს იმას არ ნიშნავს, რომ ჩვენ ერთად არ ვიქნებით პროპორციული არჩევნების მოთხოვნის საქმეში. პროპორციული არჩევნების არსი და პეწი სწორედ ეგ არის, რომ მერე მოსახლეობამ უნდა გადაწყვიტოს, მერე ვინ შევა და რა რაოდენობით პარლამენტში. ვიცით, რომ არის საქართველოში პრორუსულად განწყობილი მოსახლეობაც და მას თუ უნდა, რომ ბურჯანაძე აირჩიოს, ამის უფლება მათ უნდა ჰქონდეთ. პრორუსულობა დანაშაული კი არ არის საქართველოში, უბრალოდ ჩვენთვის არის კატეგორიულად მიუღებელი. ვინც იტყვის, რომ დანაშაულია, ის ჩვეულებრივ ფაშისტურ აზრს ავითარებს. ამიტომ, შეუძლია იყოს პარლამენტში. უბრალოდ ჩვენთან ვერ ითანამშრომლებს და ჩვენ არ შევალთ მასთან თანამშრომლობაში.

_ სხვა საკითხებზე თანამშრომლობას გამორიცხავთ?

_ რა თქმა უნდა. შინაარსობრივ საკითხებზე მასთან თანამშრომლობა არ გვექნება.

_ თუ დადგა რეალობა, რომ ბურჯანაძე გჭირდებათ კოალიციის შესაქმნელად, ამ შემთხვევაში რას იზამთ?

_ ჩემ აზრს გეუბნებით, საგარეო პოლიტიკურ თემაზე ბურჯანაძეს გავლენა არ ექნება, კიდეც რომ შევქმნათ კოალიცია. ოღონდ მე გამოვრიცხავ, რომ ეგეთი ვარიანტი დადგეს. იმიტომ რომ ბურჯანაძეს ძალიან მცირე მხარდაჭერა აქვს. დიდი ალბათობით მომავალ კოალიციურ ერთობაში მისი ადგილი არ იქნება, იქიდან გამომდინარე, რომ ჩვენი ამოცანაა, რომ პროდასავლურ ძალებს შორის შეიკრას კოალიცია.

_ პოტენციურ შესაძლებლობებზე გეკითხებით.

_ პოტენციურად ბურჯანაძე პარლამენტში ალბათ მოხვდება ერთი ან ორი ადამიანით, მაგრამ თუ ის გადაწყვეტს, რომ კოალიციას შემოერთდეს, ამის შესაძლებლობა ალბათ ექნებათ მათ, რადგან ამას ერთი ან ორი პარტია ვერ გადაწყვეტს. მაგრამ, მას არანაირი გავლენა არ ექნება საგარეო პოლიტიკაზე. ეს არის ცალსახა წითელი ხაზი ჩვენთვის და ამ წითელ ხაზს არ გადავუხვევთ. რაც არ უნდა პროპაგანდა მძვინვარებდეს ხელისუფლების მხრიდან, რომ ნახეთ „ევროპული საქართველო“ პრორუსულ ძალებთან გაერთიანდა. ეს არის უბრალოდ ტყუილი, მაგრამ ვიცით, რომ ეს ხელისუფლებისთვის ჩვეულებრივი ხელწერაა. სოციალურ ქსელებში მთელი მაგათი საქმიანობა ტროლებისა და ბოტების მეშვეობით მაგაზეა ორიენტირებული.

ავტორი: იაგო ნაცვლიშვილი

მსგავსი სიახლეები
კომენტარები
იტვირთება...

ეს ვებ – გვერდი იყენებს cookie– ს თქვენი გამოცდილების გასაუმჯობესებლად. ვეთანხმები დეტალურად