სენატორი ჯიმ რიში: საქართველოს პოლიტიკურმა პარტიებმა უნდა დაიცვან ახალი შეთანხმების სულისკვეთება

აშშ-ის სენატის საგარეო კომიტეტის წამყვანი წევრი, რესპუბლიკელი სენატორი ჯიმ რიში საგანგებო განცხადებით გამოეხმაურა საქართველოს ხელისუფლებასა და ოპოზიციური პარტიის ლიდერებს შორის ორშაბათს ხელმოწერილ შეთანხმებას, რომელიც, სენატორის აზრით, ოქტომბრის საპრლამენტო არჩევნების შემდეგ განვითარებული „პოლიტიკური კრიზისის მოგვარებისკენ გადადგმულ მნიშვნელოვან ნაბიჯს“ წარმოადგენს.

„მიხარია, რომ ვხედავ, რომ შეთანხმება მოიცავს სასამართლო და საარჩევნო რეფორმებს, რეზოლუციას საპატიმროში მყოფი ორი ოპოზიციონერი ფიგურის თაობაზე და დაპირებას, რომ ოპოზიცია შევა პარლამენტში. ორივე მხარემ გამოავლინა ლიდერობა და გამბედაობა მათ იმ ძალისხმევაში, რომ მიეღწიათ კომპრომისისთვის თავიანთი ქვეყნისა და ქართველი ხალხის საკეთილდღეოდ, და ამ შეთანხმებას ძალუძს საქართველოს დაბრუნება ევროატლანტიკურ გზაზე“, – წერს განცხადებაში სენატორი რიში, რომელიც განსაკუთრებული მადლიერებით ახსენებს მოლაპარაკების პროცესში ევროკავშირის ხელმძღვანელობისა და აშშ-ის ელჩის, კელი დეგნანის „დაუღავალ მუშაობას“.

„კომპრომისის მიღწევა არის პირველი ნაბიჯი, მაგრამ შეთანხმების სიმტკიცის ჭეშმარიტი გამოცდა მისი რეალიზება იქნება. „ქართული ოცნებაც” და ოპოზიციაც პასუხისმგებლები იქნებიან ამ შეთანხმების შინაარსისა და სულისკვეთების დაცვაზე, და ასევე პოლიტიკური ნდობის აღდგენაზე. და როგორც არაერთხელ მითქვას, საქართველომ უნდა გადაუხვიოს პოლიტიკური დევნის გზიდან და უნდა იაროს ძლიერი და აყვავებული ქვეყნისკენ. მაგრამ აშშ-ი, მათ რიცხვში საქართველოს მეგობართა ჯგუფი აშშ-ის კონგრესში, ყურადღებით დააკვირდებიან ამ შეთანხმებას, რომელსაც ქვეყანა სწორედ ასეთი მიმართულებით მიყავს”, – წერს სენატორი ჯიმ რიში.

მანამდე საქართველოში 19 აპრილს მიღწეულ პოლიტიკურ შეთანხმებას მიესალმა აშშ-ის სახელმწიფო დეპარტამენტი.

მსგავსი სიახლეები
კომენტარები
იტვირთება...