სანდრო ბრეგაძე: 50 000 კაცი მოვა იქ და ყველაზე პასუხისმგებლობას როგორ ავიღებ?! (ინტერვიუ)

საქართველოს კინოთეატრებში 8 ნოემბრიდან ქართველი წარმოშობის შვედი რეჟისორის ლევან აკინის ფილმი „და ჩვენ ვიცეკვეთ“ (And then we danced) გამოჩნდება, რომელიც ქართულ-შვედური ნამუშევარია. ფილმმა უკვე მიიღო არაერთი საერთაშორისო ჯილდო, მათ შორის ჩიკაგოს, სარაევოსა და ოდესის კინოფესტივალის გამარჯვებული გახდა. ფილმი ასევე წარდგენილია ოსკარზე, შვედეთის სახელით და ასევე ევროპული საუნივერსიტეტო ფილმების ჯილდოზეც.

„ქართული მარში“, ბიზნესმენი ლევან ვასაძე და კიდევ რამდენიმე ჯგუფი ფილმის ჩაშლით იმუქრება. მათი თქმით, ფილმში ნაჩვენები 2 ახალგაზრდა მამაკაცის სასიყვარულო ისტორია ქართულ ფასეულობებს ეწინააღმდეგება. ორგანიზაციის ლიდერმა სანდრო ბრეგაძემ ამის შესახებ „აიპრესთან“ ინტერვიუში ისაუბრა.

ბრეგაძე იმასაც ამბობს, რომ ის ვერ აიღებს სრულ პასუხისმგებლობას იმაზე, რომ იქ არაფერი მოხდება. აცხადებს, რომ პასუხისმგებლობა “ამ პროპაგანდისტული” ფილმის მესვეურებმა უნდა აიღონ.

_ რატომ აპირებთ ფილმის ჩაშლას და პროტესტის რა ფორმებს გამოიყენებთ?

_ ეს ფილმი არ წარმოადგენს არანაირ მხატვრულ ღირებულებას. ეს ფილმი არის თავისუფალ გერმანიაში გებელსის პროპაგანდის მსგავსი პროპაგანდისტული ფილმი.

_ თქვენ ნანახი გაქვთ ეს ფილმი?

_ კი ბატონო. მაქვს ეს „ბედნიერება“, რომელიც არის პროპაგანდისტული ფილმი და რომელიც ეწევა ჰომოსექსუალიზმისა და გარყვნილების პროპაგანდას. ნატურალურად ნაჩვენებია მამაკაცებს შორის სექსი და მამაკაცებს შორის სექსუალური ურთიერთობები და ეს ყველაფერი განხილულია, როგორც დადებით და მისაბაძ კონტექსტში და მომავალი თაობებისადმი მოწოდებაა, რომ ჰომოსექსუალური წესით იცხოვრონ.

_ კი, მაგრამ ფილმი ხომ ისეთი პროდუქტია, რაც ვიღაცისთვის შეიძლება მისაღები იყოს, ვიღაცისთვის მიუღებელი, ვიღაცისთვის აქვს მხატვრული ღირებულება, ვიღაცისთვის კი არა?

_ კი ბატონო. არის ფილმები, რომლებიც საფრთხეს წარმოადგენენ ქვეყნისთვის და საფრთხეს ადამიანებისათვის. მაგალითად, როდესაც საქართველოს დაკვეთით გადაიღეს აგვისტოს ომზე ფილმი „აგვისტოს 5 დღე“, ამის საპირისპიროდ რუსებმაც გადაიღეს, სადაც აღწერილია როგორი „განმათავისუფლებელი“ ბრძოლა აწარმოეს რუსმა ოკუპანტებმა. ეს ფილმი აკრძალულია საქართველოს ტერიტორიაზე და აკრძალული უნდა იყოს, რადგანაც არ შეიძლება ოკუპანტების იდეოლოგიის გატარება და საქართველოს ინტერესების წინააღმდეგ მიმართული ქმედებების ამსახველი ფილმის ჩვენება. ჩემთვის იგივე საფრთხეს წარმოადგენს ეს ფილმიც.

_ ოკუპაციასთან აიგივებთ?

_ კი ბატონო. ოკუპაციის პროპაგანდასთან ვაიგივებ მე „მამათმავლობის“ პროპაგანდას. ეს ორივე ჭუჭყი და ტალახია, რომელიც არ უნდა მივიდეს მომავალ თაობებთან. ისევე როგორც ოკუპაცია ვნებს ქართულ სახელმწიფოს, ასევე ვნებს „მამათმავლობის“ პროპაგანდაც.

ჩვენ თუ აბსოლუტურ თავისუფლებაზე ვისაუბრებთ, მაშინ გამოვიტანოთ ხაჯიმბას სურათები, კოკოითის სურათები და ა. შ.

_ სხვაგან გადაგყავთ საუბარი.

_ რატომ გადამყავს სხვაგანა?! მაგალითად ხაჯიმბა ჩემთვის „მამათმავლობაა“.

_ ამ ლოგიკით მაშინ სახელმწიფომ რა უნდა გააკეთოს? თუ ადამიანი ლგბტქ თემის წარმომადგენელია ციხეში ჩავსვათ? აქეთ მიგყავთ საუბარი?

_ ზუსტად ეს არის ის, რაც ამ „ლიბერასტულ“ მედიას გაქვთ. მე ვთქვი, რომ ყველა ჰომოსექსუალი ციხეში ჩავსვათ-მეთქი? თქვენ რასაც მეუბნებით, ეს უკვე ცილისწამებაა. მე არ მითქვამს ასეთი რამე.

_ არც მე მითქვამს, რომ ასეთი რამე თქვით. მე ბრალს არ გდებთ, მე კითხვას გისვამთ.

_ მე აქ საუბარი მაქვს პროპაგანდაზე და არა კონკრეტულ პიროვნებებზე. რომელიმე ჰომოსექსუალი, რომელიც მამაკაცია და სურს, რომ ქალი იყოს, ჩვენ მათ არ ვებრძვით, არ მოხდეს მისი პროპაგანდა.

_ ჰომოფობიურ განცხადებებს აკეთებთ.

_ თქვენ იცით ამ სიტყვის განსაზღვრება?

_ დიახ.

_ რას ნიშნავს?

_ ლგბტქ თემის მიმართ შიშს.

_ ბერძნულად ჰომო ნიშნავს ადამიანს, ხოლო ფობია შიშს. მე არ მაქვს შიში ადამიანების მიმართ. ამიტომ, სანამ ინტერვიუზე დამირეკავთ ხოლმე, უკეთესად მოემზადეთ, რომ მეც უკეთესი პასუხები გაგცეთ. მე არ მაქვს არც ადამიანების, არც მამაკაცების და არც ჰომოსექსუალების შიში. მე მაქვს მათ მიმართ სიბრალულის გრძნობა, რომელიც ზიზღით კი არ ვარ განწყობილი, არამედ გამომდინარეობს ქრისტიანობიდან. მე მინდა, რომ ისინი კი არ დავაპატიმროთ, არამედ ისინი ჭეშმარიტების გზაზე დავაყენოთ ქრისტიანული სიყვარულით. თუ ადამიანი ასეთად არის დაბადებული, ჩვენ მას ბრალს ვერაფერში ვერ დავდებთ.

_ რასაც ამბობთ, ეს დემოკრატიული ცნებებია?

_ რა თქმა უნდა. ახლა დემოკრატია რას ნიშნავს, ეგ მითხარით.

_ ჩემი განათლების დონის ამაღლებაზე ზრუნავთ თუ ინტერვიუს მაძლევთ?

_ არა, უბრალოდ დემოკრატიის განსხვავებული გაგება არსებობს. მაგალითად, გია ბარამიძეს, რომელმაც აფრასიძეები ჩახოცა სახლში დემოკრატია სხვანაირად ესმის. ზვიად გამსახურდიას, მერაბ კოსტავასა და ილია ჭავჭავაძეს სხვანაირად ესმოდათ დემოკრატია. მე მაინტერესებს, თქვენ როგორ გესმით.

_ ბატონო სანდრო მაშინ ასე შევთანხმდეთ, თქვენ ჩაწერეთ ჩემთან ინტერვიუ და მზად ვარ ყველა კითხვაზე ამომწურავად გიპასუხოთ. ამ შემთხვევაში კი, ჟურნალისტი მე ვარ და კითხვებს მე დავსვამ.

_ მე მეგობრულად გეუბნებით. თქვენ უკვე გაბრაზებული მეუბნებით, რომ თქვენ ჩაწერეთ ჩემთან ინტერვიუო. ჟურნალისტს ნერვები არასდროს არ უნდა მოგეშალოთ.

_ არ მომშლია ნერვები, ძალიან მშვიდად ვარ.

_ მე მგონი თქვენ დამირეკეთ. მე რომ თქვენი აზრი მაინტერესებდეს, მე დაგირეკავდით.

კარგით მე აგიხსნით. ნუდისტები ხომ გაგიგიათ?! მშვიდად დადიან ქუჩაში. ხვალ რომ ქუჩაში გამოვიდნენ შიშვლები და მოინდომონ აღლუმის ჩატარება და ამ დროს თქვენ ბავშვი გამოგყავთ სკოლიდან, ეს თქვენთვის მისაღები იქნება?!

_ კიდევ მე მისვამთ კითხვას?!

_ ხომ მითხარით დამისვით კითხვაო და გისვამთ.

_ ამ შემთხვევაში ვერ ვიქნები ობიექტური.

_ ვერ იქნებით? ანუ არ გესიამოვნებათ. მაშინ, რატომ ვლახავთ მათ უფლებებს.

_ მე არ მყავს შვილები და ამიტომ ვერ ვიქნები ობიექტური. ისე კი არც ამაში ვხედავ განსაკუთრებულ პრობლემას.

_ დემოკრატია არის კანონის უზენაესობა, რომელსაც თან ახლავს მორალურ-ზნეობრივი პრინციპების განუხრელი დაცვა. გებელსის შესახებ ფილმები ხომ არ უნდა გავუშვათ?! აქედან ამოვდივარ მე, რომ ამ ფილმის გაშვება არ არის მართებული.

_ თქვენი პროტესტი არ მახსენდება გებელსის თემატიკაზე და ასეთ ფილმებთან დაკავშირებით. გქონიათ?

_ პროტესტი აქამდე როგორ მექნებოდა, როცა პირველია ასეთი ფილმი. ქართველებმა პირველად გადაიღეს ასეთი ფილმი, როდესაც მამაკაცს მამაკაცთან აქვთ სექსი. აქამდე ქართველები იღებდნენ „მონანიებას“, „დათა თუთაშხიას“. ამაზე პროტესტი რატომ უნდა გამჩენოდა? ასეთ ფილმებს ჩემს შვილებთან ერთად ვუყურებ ხოლმე.

_ გავიგე თქვენი პოზიცია. მიპასუხეთ კითხვაზე, რა ფორმით გამოხატავთ პროტესტს და ის ადამიანები, რომლებიც წავლენ ფილმის სანახავად, მათ მიმართ პროტესტს როგორ გამოხატავთ?

_ ეს იქნება აბსოლუტურად მშვიდობიანი ფორმა. თქვენ ალბათ წაკითხულიც გექნებათ და ნანახიც მსოფლიოში ერთ-ერთი ყველაზე დიდი განმათავისუფლებელი მაჰადმა განდის შესახებ ისტორია, რომელიც ერთგვარი ქრესტომათიული სახელმძღვანელოა მშვიდობიანი ბრძოლის ფორმებისა. სწორედ ამ ბრძოლის ფორმას ვირჩევთ. ჩვენ ვთვლით, რომ ასეთივე კოლონიაზატორები არიან გეი პროპაგანდის მესვეურები და ეს კოლონიზიატორები მაჰათმა განდის ბრძოლის მშვიდობიანი პრინციპებით უნდა დავამარცხოთ და არა ჭიდაობის გზით.

_ იღებთ პასუხისმგებლობას, რომ იქ არაფერი არ მოხდება?

_ თქვენ იღებთ პასუხისმგებლობას იმაზე, რომ თქვენ რედაქციაში როდესმე ვინმე ვინმეს არ მოკლავს, ან ვინმე ვინმეს არ გალახავს?!

50 000 კაცი მოვა იქ… მე ავიღებ პასუხისმგებლობას ჩემს თავზე და ჩემს თანაგუნდელებზე. ვინ პროვოკატორი იქნება შემოგზავნილი, ვინ აგენტი, ამაზე მე პასუხისმგებლობას როგორ ავიღებ?!

_ კი, მაგრამ როცა ორგანიზებას აკეთებთ, ალბათ გიფიქრიათ ამაზე…

_ 1989 წლის 9 აპრილს როდესაც მრავალათასიან მიტინგს გაუწიეს ორგანიზება, გგონიათ, რომ იქ 50 000 კაცზე, თითოეულ ადამიანზე ზვიად გამსახურდია და მერაბ კოსტავა იყვნენ პასუხისმგებელი?! პასუხისმგებლობას, „ქართული მარშის“ წევრებზე ავიღებ. აგერ სალომე ზურაბიშვილი საქართველოს პრეზიდენტია და თავის თავზე არ არის პასუხისმგებელი და მე არანაირი ბერკეტი არ მაქვს ყველა ადამიანზე პასუხისმგებელი ვიყო. ჩემი 14 წლის შვილზეც ვერ ვიქნები ბოლომდე პასუხისმგებელი. პასუხისმგებლები რომ არაფერი მოხდება, ამ ფილმის მესვეურები უნდა იყვნენ, რადგან ისინი ჩვეულებრივ პროვოკაციას ახდენენ იმისათვის, რომ კარგად გაყიდონ უცხოეთის ბაზარზე და მეტი გრანტი მიიღონ „მამათმავლურმა“ ორგანიზაციებმა.

P.S. ინტერვიუში არაერთხელ გაჟღერდა განცხადებები, რომელიც ლგბტქ თემის მისამართით შეიცავს სიძულვილის ენას. “აიპრესი” ემიჯნება ყოველგვარ ჰომოფობიურ განცხადებებს. კიდევ ერთხელ აღვნიშნავთ, რომ ინფორმაციის გავრცელების მიზანია საზოგადოებამ სათანადო შეფასება მისცეს მსგავსი სახის მოძრაობებს და მათ ლიდერებს.

ავტორი: იაგო ნაცვლიშვილი

მსგავსი სიახლეები
კომენტარები
იტვირთება...

ეს ვებ – გვერდი იყენებს cookie– ს თქვენი გამოცდილების გასაუმჯობესებლად. ვეთანხმები დეტალურად