სალია: ყველაზე დაბალხელფასიანი თანამშრომლის ხელფასსაც ვერ დაფარავს ის ფული, რაც დატოვა წინა მენეჯმენტმა

ტელეკომპანია “რუსთავი 2”-ის გენერალური დირექტორი აცხადებს, რომ კომპანიაში მძიმე ფინანსური მდგომარეობაა.

პაატა სალიას თქმით, წინა მენეჯმენტის მიერ დატოვებული ფინანსები ყველაზე დაბალანაზღაურებადი თანამშრომლების ხელფასების გასაცემადაც კი არასაკმარისია.

“იმედთან” საუბრისას პაატა სალიამ განმარტა, რომ მუშაობს დამატებითი ფინანსური რესურსების მოსაძიებლად. ის ამბობს, რომ მიუხედავად ფინანსური პრობლემებისა, ქიბარ ხალვაში ტელევიზიის გასხვისებას ამ ეტაპზე არ აპირებს.

“არ დავასტურებ, რომ ქიბარ ხალვაში არ აპირებს ტელევიზიაში ფულის ჩადებას. ვეძებთ ყველანაირ გზას, მოხდეს თანამშრომლებისთვის ხელფასების დროულად გაცემა. შეიძლება ერთი-ორი დღით დაგვიანდეს ტექნიკური მიზეზების გამო. მდგომარეობა ძალიან სავალალო დაგვხვდა ამ კუთხით. ერთი ყველაზე დაბალხელფასიანი თანამშრომლის ხელფასსაც ვერ დაფარავს ის ფული, რაც დატოვა წინა მენეჯმენტმა”,- განაცხადა პაატა სალიამ.

ცნობისათვის: სტრასბურგის სასამართლომ გააუქმა საქართველოს უზენაესი სასამართლოს გადაწყვეტილების აღსრულების შემაჩერებელი მექანიზმი. კერძოდ, 2017 წლის 2 მარტს საქართველოს უზენაესი სასამართლოს დიდმა პალატამ ტელეკომპანია „რუსთავი 2“ ქიბარ ხალვაშს მიაკუთვნა. იმავე წლის 3 მარტს კი, „რუსთავი 2“-ს მიმართვის საფუძველზე, სტრასბურგის სასამართლომ უზენაესი სასამართლოს გადაწყვეტილების აღსრულება შეაჩერა. სწორედ ამ აღსრულების შეჩერება გააუქმა სტრასბურგის სასამართლომ.

18 ივლისს ქიბარ ხალვაშმა „რუსთავი 2“-ს გენერალურ დირექტორად პაატა სალია დანიშნა, რომელმაც ამ პოზიციაზე ნიკა გვარამია შეცვალა.

მსგავსი სიახლეები
კომენტარები
იტვირთება...

ეს ვებ – გვერდი იყენებს cookie– ს თქვენი გამოცდილების გასაუმჯობესებლად. ვეთანხმები დეტალურად