რომან გოცირიძე რუსეთის საგარეო უწყების განცხადებაზე: საქართველოს ხელისუფლება ვალდებულია, უმკაცრესად გასცეს პასუხი ყველა პროვოკაციას

“ეს არის რუსეთის გათავხედებული ხელისუფლების განცხადება, რომელიც საქართველოს ხელისუფლების რბილ კრიტიკასაც კი ვერ ითმენს.”

ამის შესახებ პარლამენტის  ფრაქცია „ნაციონალური მოძრაობის“ თავმჯდომარე რომან გოცირიძემ ჟურნალისტებს განუცხადა, რითაც გამოეხმაურა რუსეთის საგარეო საქმეთა სამინისტროს გუშინდელ განცხადებას და აღნიშნა, რომ  საქართველოს ხელისუფლება საოკუპაციო ხაზთან მიმდინარე მოვლენებზე უფრო მწვავე განცხადებებს უნდა აკეთებდეს.

„როცა საერთაშორისო თანამეგობრობას არ მოვუხმობთ იმ უმსგავსობის გამო, რაც საოკუპაციო ხაზთან ხდება, ოკუპანტი სახელმწიფოს მიერ, რუსეთის ხელისუფლება ამერიკის შეერთებული შტატების საელჩოს მისწვდა, რადგან მათი განცახდება უფრო მკაცრი იყო, ვიდრე საქართველოს ხელისუფლების.

დღეს, უკრაინის საგარეო საქმეთა სამინისტრომ გააკეთა უფრო მწვავე განცხადება საოკუპაციო ხაზთან მიმდინარე მოვლენებთან დაკავშირებით, ვიდრე თავად საქართველოს ხელისუფლებამ. როცა ასე იქცევი, ასეთ პასუხს იღებ. დამამცირებელი წერილია, რომელიც საქართველოს საგარეო უწყებას არ პატიობს იოტისოდენა უკმაყოფილების გამოთქმას“, – განაცხადა რომან გოცირიძემ.

მისი თქმით, საქართველოს ხელისუფლება ვალდებულია უმკაცრესად გასცეს პასუხი ყველა პროვოკაციას და მოითხოვოს სანქციების დაწესება საქართველოში მიმდინარე მოვლენებთან დაკავშირებით.

„სანამ საქართველოს ხელისუფლება პრინციპულ პოზიციას არ დაიჭერს უკრაინის ხელისუფლების მსგავსად და საქართველოს საკითხებზე რუსეთის მიმართ სანქციების დაწესების მოთხოვნა არ იქნება, მანამდე რუსეთი ყოველთვის გაბედავს პროვოკაციას, ადამიანების გატაცებას, საოკუპაციო საზღვრის გადმოწევას და საქართველოს ხელისუფლების აბუჩად აგდებას“, – განაცხადა გოცირიძემ.

ცნობისათვის, “აშშ-ის სახელმწიფო დეპარტამენტი და საელჩო მომხდარის არსში გარკვევის გარეშე იცავენ თავიანთ ქართველ აღსაზრდელებს და ადანაშაულებენ მოსკოვსა და ცხინვალს. ეს ყველაფერი, სულ მცირე ძირს უთხრის ვაშინგტონის, როგორც ჟენევის დისკუსიების მიუკერძოებელი მონაწილის პოზიციებს“, – ამის შესახებ რუსეთის საგარეო უწყების განცხადებაშია აღნიშნული.

მსგავსი სიახლეები
კომენტარები
იტვირთება...

ეს ვებ – გვერდი იყენებს cookie– ს თქვენი გამოცდილების გასაუმჯობესებლად. ვეთანხმები დეტალურად