პრემიერი: მთავრობა, სოციალური დახმარების ნაცვლად, შრომისუნარიან ბენეფიციარებს სამუშაო ადგილს შეთაზებს

„ნაცვლად სოციალური დახმარებისა, ჩვენს შრომისუნარიან მოქალაქეებს სამუშაო ადგილები უნდა შევთავაზოთ. ასეთი საზოგადოებრივი სამუშაო ადგილები ჩვენ შეგვიძლია ათასობით და ათიათასობით შევქმნათ“, – ამის შესახებ საქართველოს მთავრობის მეთაურმა, ირაკლი ღარიბაშვილმა მთავრობის სხდომაზე განაცხადა

პრემიერის თქმით, ქვეყანაში 600 ათასი დაუცველი მოქალაქეა, აქედან ნახევარი შრომისუნარიანია, თუმცა არ არიან მოტივირებული დასაქმდნენ.

„დღეის მდგომარეობით, დაახლოებით, 600 ათასი სოციალურად დაუცველი მოქალაქე გვყავს. მათგან თითქმის ნახევარი შრომისუნარიანია. დღეს, ისინი, არსებული სოციალური პოლიტიკის გამო, არ არიან მოტივირებულნი სამუშაოს დასაწყებად. უამრავი მაგალითი ვიცით, თუ ადამიანი ტელევიზორს ან მაცივარს შეიძენს, ქულები აკლდება და სოციალური დახმარება უწყდება. ისინი არ არიან მოტივირებულნი სეზონურ სამუშაოზე დასასაქმებლად და დამატებითი შემოსავლის მისაღებად. ეს არის კატასტროფა. ამიტომ, ჩვენ უნდა შევქმნათ ისეთი მოქნილი სისტემა, რომ, მინიმუმ, ის დახმარება, რომელიც მათ დღეს ეძლევათ, ხელფასის სახით მიიღონ, ოღონდ, კონკრეტული საზოგადოებრივი საქმინობისთვის და, ამას გარდა, შეძლონ ახალი სამუშაო ადგილების მოძიება, დამატებით. მათ უნდა ჰქონდეთ თავისუფლება, 2-3 სამუშაო, პარალელურად, იშოვონ და მეტი შემოსავალი შეიტანონ საკუთარ ოჯახებში – იყიდონ ტეევიზორიც, მაცივარიც, სახლიც და გაარემონტონ საცხოვრებელი… ეს უნდა იყოს ჩვენი მთავარი ამოცანა. დიდი სურვილი მაქვს, რომ იანვრიდან დავიწყოთ ეს ახალი პროგრამა. ვფიქრობ, ეს მთლიანად შეცვლის რეალობას“, – განაცხადა ირაკლი ღარიბაშვილმა.

კომენტარები
იტვირთება...